އިނގިރޭސި ވިލާތަށް ދާދިފަހުން ބޮމުގެ ހަމަލާ ދިން ސަލްމާން އަބޭދީއާ ގުޅޭ ގޮތުން އާންމުން ކުރިން ދިން އިންޒާރުތަކާ މެދު އިނގިރޭސި ވިލާތުގެ  އެތެރޭގެ އިންޓެލިޖެންސް ކަންކަން ބަލަހައްޓާ އިދާރާ ކަމަށްވާ އެމްއައި5 އިން އަމަލު ކުރި ގޮތް، މުރާޖައާ ކުރުމަށް އެ އިދާރާއިން ނިންމައިފިއެވެ.

ރިޕޯޓުތައް ބުނާ ގޮތުން މެއި މަހުގެ 22 ވަނަ ދުވަހުގެ ރޭ އަމިއްލަ ހަށިގަނޑުގައި ބޮން ހަރުކޮށް ގޮއްވާލައިގެން މެންޗެސްޓާ އެރީނާ އަށް ހަަމަލާ ދިނުމުގެ ކުރިން، ތިން ފަހަރެއްގެ މަތިން އެމްއައި 5 އަށް އޭނާގެ ހައްދުފަަހަނައަޅައިފައިވާ ވިސްނުމާ ބެހޭ ގޮތުން ރިޕޯޓުތައް ލިބިފައި ވެއެވެ. އެމްއައި 5 އިން ކުރާ ތަހުގީގުގައި އަބޭދީ އާއި ބެހޭ ގޮތުން ލިބިފައިވާ ރިޕޯޓުތަކާ މެދު ކަަން ކުރީ ކިހިނެއްތޯ ފުޅާދާއިރާއެއްގައި ދިރާސާ ކުރާނެއެވެ.

ހޯމް ސެކްރެޓަރީ އެމްބާ ރަޑް ވިދާޅުވީ އެއީ އެ އިދާރާ އިން ނިންމި ރަނގަޅު ނިންމުމެއް ކަމަށެވެ.

މެންޗެސްޓާ ސިޓީގެ މެންޗެސްޓާ އެރީނާ އަށް އަބެދީ ދިން ހަމަލާގައި 22 މީހުން މަރުވިއެވެ. މިހާދިސާއާ ގުޅިގެން 14 މީހަކާއި ދަނީ ސުވާލު ކުރެވެމުންނެވެ.

ހަމަލާގެ ތަހުގީގާ ގުޅޭ ގޮތުން އިނގިރޭސި ފުލުހުން ބުނެފައި ވަނީ، "ކުރިއެރުންތަކެއް ހޯދަމުން އަންނަ ކަމަށެވެ."

އެމެރިކާގެ މަޝްހޫރު ލަވަކިޔުންތެރިޔާ އާރިއާނާ ގްރާންޑޭގެ ޝޯ އަށް ފަހު މެންޗެސްޓަރ އެރީނާއަށް ދީފައިވާ ބޮމުގެ ހަމަލާގެ ޒިންމާ އިސްލާމިކް ސްޓޭޓް ނުވަތަ އައިއެސް އިން ވަނީ އުފުލާފައެވެ. ހަމަލާ ދިން ވަގުތު އެތަނުގައި ތިބި ބައެއް ފަރާތްތަކުން ބުނީ، ބޮން ގޮއްވާފައި ވަނީ އާރިއާނާ ފަހު ލަވަ ނިންމާލައި "ޝުކުރިއްޔާ މެންޗެސްޓަރ"އޭ ބުނެ ސްޓޭޖުން ފޭބި ވަގުތު ކަމަށެވެ.  މި ހަމަލާގައި އާރިއާނާއަށް އަނިޔާ ނުވާއިރު، އޭނާ ވަނީ އެކަމާ ގުޅިގެން "ހިތުގައި ޖެހިއްޖެ" ކަމަށް ބުނެ، ޓްވީޓް ކޮށްފައެވެ.