ވިއެޓްނާމާއި ލަންކާއަށް އޮންނަ ފުރުސަތުތައް ރާއްޖެއަށް ނެތުން އެއީ ބަލައިގަނެވޭނެ ކަމެއް ނޫން - ތޯމަސް ޒިޑެހޮވްސްކީ
26 ފެބުރުއަރީ 2021 | ހުކުރު 08:20ރާއްޖޭގެ މަހުގެ ބާވަތްތަކަށް ޔޫރަޕްގެ މާކެޓުގައި ދެވޭ އަހައްމިއްޔަތުކަން އިތުރުކުރަން ޖެހޭ
ޔޫރަޕިއަން ޕާލިމެންޓްގައި ޗެކްރިޕަބްލިކް ތަމްސީލުކުރައްވާ މެމްބަރު، ތޯމަސް ޒިޑެހޮވްސްކީ
ޔޫރަޕިއަން މާކެޓުގައި ވިއެޓްނާމާއި ސްރީލަންކާގެ މަހުގެ ބާވަތްތަކަށް އޮންނަ ފުރުސަތުތައް ރާއްޖޭގެ މަހުގެ ބާވަތްތަކަށް ނެތުން އެއީ ބަލައިގަނެވޭނެ ކަމެއް ނޫން ކަމަށް ޔޫރަޕިއަން ޕާލިމެންޓްގައި ޗެކްރިޕަބްލިކް ތަމްސީލުކުރައްވާ މެމްބަރު، ތޯމަސް ޒިޑެހޮވްސްކީ ވިދާޅުވެއްޖެއެވެ.
ރާއްޖެޓީވީއަށް ދެއްވި ޚާއްސަ އިންޓަވިއުއެއްގައި ވާހަކަދައްކަވަމުން ތޯމަސް ވިދާޅުވީ، ރާއްޖޭގެ މަހުގެ އުފެއްދުންތަކަކީ ދުނިޔޭގައި އުފައްދާ މަހުގެ އުފެއްދުންތަކުގެ ތެރެއިން އެންމެ ރަނގަޅު އެއް ޕްރޮޑަކްޓަށްވާއިރު، ރާއްޖޭގެ މަހުގެ ބާވަތްތަކަށް ޔޫރަޕްގެ މާކެޓުގައި ދެވޭ އަހައްމިއްޔަތުކަން އިތުރުކުރަން ޖެހޭކަމަށެވެ. މިގޮތަށް ރާއްޖޭގެ މަހުގެ ބާވަތްތަކަށް ޔޫރަޕުގެ މާކެޓުގައި ލިބެންޖެހޭ އަހައްމިއްޔަތުކަން އިތުރުކުރުމަށް މަސައްކަތްކުރައްވާނެ ކަމަށް ތޯމަސް ވިދާޅުވިއެވެ.
ތޯމަސް ވިދާޅުވީ މިކަމާ ގުޅޭގޮތުން އީޔޫ ކޮމިޝަނާއެކު މަޝްވަރާތައް ކުރައްވާނެ ކަމަށާއި މިކަމުގައި އީޔޫގެ ރައީސާއަށް ވަކިން ސިޓީއެއް ފޮނުއްވާނެ ކަމަށެވެ. އެކަމަނާގެ އަރިހުގައި ޑިމޮކްރަސީގެ ހަމަތަކާ އެއްގޮތަށް މަސައްކަތްކުރާ، އީޔޫގެ މިންގަނޑުތަކަށް ފެތޭ ގައުމެއް އެބަ އޮތްކަމާއި، އެގައުމަކީ ރާއްޖެކަން ފާހަގަކުރައްވައި، ރާއްޖެއާއި އީޔޫގެ ގައުމުތަކާ ދެމެދު އޮތް ގުޅުން އިތުރަށް ބަދަހިކޮށް ރާއްޖޭގެ މަހުގެ އުފެއްދުންތައް ޔޫރަޕްގެ މާކެޓަށް އިމްޕޯޓްކުރުމުގައި ދެފަރާތަށް ފައިދާކުރާނެ ރަނގަޅު އެއްބަސްވުމަކަށް ދިއުމަށް ބާރުއަޅުއްވާނެ ކަމަށް ވެސް ތޯމަސް ވިދާޅުވިއެވެ.
ރާއްޖެއާއި އީޔޫއާ ދެމެދު އޮންނަ ގުޅުން ރަނގަޅުވުމުގެ ސަބަބުން އޭގެ ގިނަ ފައިދާތަކެއް ރާއްޖެއަށް ކުރާނެ ކަމަށް ފާހަގަކުރައްވާ ވާހަކަދައްކަވަމުން ތޯމަސް ވަނީ މިގުޅުމުގެ ސަބަބުން ޔޫރަޕްގެ ގައުމުތަކުގެ ފަހުގެ ސައިންޓިފިކް އުފެއްދުންތަކުގެ އެހީގައި ރާއްޖޭގެ ފަތުރުވެރިކަން އިތުރަށް ފުޅާކުރުމުގެ މަގު ތަނަވަސްވެގެންދާނެ ކަމަށް ވިދާޅުވެފައެވެ.
ތޯމާސް މިގޮތަށް ވާހަކަ ދައްކަވާފައިވާއިރު، ރާއްޖެއިން ވަނީ ފާއިތުވި އަހަރުގެ ނޮވެމްބަރު 23 ވަނަ ދުވަހު ބޭއްވި ރާއްޖެ އާއި އީޔޫގެ ޕޮލިސީ ޑައިލޮގްގެ ފަސްވަނަ ބުރުގައި ދިވެހި ކަނޑުމަހުގެ ބާވަތްތަކުން ޑިއުޓީ މައާފުކޮށްދިނުމަށް އީޔޫގައި އެދިފައެވެ. މި ބައްދަލުވުމުގައި ބައިވެރިވި އީޔޫގެ ސަފީރުން ވަނީ ދިވެހި ކަނޑުމަހުގެ ބާވަތްތައް ޔޫރަޕަށް އެތެރެކުރުމަށް ހުރި ފުރުސަތުތަކާ ބެހޭ ގޮތުން އިތުރަށް މަޝްވަރާކުރުމުގެ ޝައުޤުވެރިކަން ފާޅުކުރައްވާފައެވެ.
