ހަރުކަށި ފިކުރުތަކުގެ ވިހަ އަސަރު މުޖުތަމައުގައި ފަތުރައި، ހަރުކަށި އަމަލުތަކުގެ ތެރެއަށް ދިވެހި ކުޑަކުދިންނާއި ޒުވާނުން ވެއްދުމަށް މަދު ބަޔަކު އަޑީގައި ތިބެގެން ކުރަމުންދާ ހީލަތްތެރި މަސައްކަތްތަކާމެދު އެންމެހާ ފަރުދުން ސަމާލުވެ ތިބުމަށް އިލްތިމާސްކޮށްފިއެވެ.

ނޭޝަނަލް ކައުންޓަރ ޓެރަރިޒަމް ސެންޓަރު (އެން.ސީ.ޓީ.ސީ.)ގެ 5 ވަނަ އަހަރީ ދުވަހާއި ގުޅިގެން ނޭޝަނަލް ކައުންޓަރ ޓެރަރިޒަމް ސެންޓަރުން ބުނީ ދިވެހިންނަކީ ޒަމާނުއްސުރެ އިސްލާމްދީނުގެ މަތިވެރި އަގީދާގައި ސާބިތުވެ ތިބެ، ގައުމީ ރޫހާއި ޖޯޝުގައި އެކުވެރިކަމާއި އެއްބައިވަންތަކަމާއެކީ، އޯގާތެރިކަމުގެ ނަމޫނާ ޘަޤާފަތެއް ދަމަހައްޓަމުން އައިސްފައިވާ ބައެއްކަމަށެވެ.

އެންސީޓީސީން ބުނީ ރާއްޖެއަކީ މިފަދަ ސުލްހަވެރި އަމާން ގައުމެއްގެ ގޮތުގައި ދެމިއޮތުމުގެ އެންމެ ބޮޑު ސިއްރަކީ މުޖްތަމައުގެ ޒަމާންވީ އެއްބައިވަންތަކަމާއި، އިސްލާމީ ރިވެތި އަހުލާގާއި، ގައުމީ ލޯތްބާއި ގައުމީ ރޫހާއި، އޯގާތެރިކަމާއެކު، އެކަކު އަނެކަކަށް އަޅާލުން ކަމަށެވެ. ނަމަވެސް ދީން ހަތިޔާރަކަށް ހަދައިގެން، ދިވެހީންގެ ތެރޭގައި އޮތް ޒަމާންވީ ރިވެތި އުސޫލުތަކާއި، ޘަޤާފީ ސިފަތައް ނައްތާލައި، ހެދިފައިވާ ގާނޫނުތަކާ ޚިލާފު އަމަލުތައް ހިންގާ، ދިވެހި މުޖުތަމައު ބައިބައިކޮށް، ފަރުދުންގެ މެދުގައި ހަސަދަޔާއި ނަފްރަތާއި ރުޅިވެރިކަން އުފައްދާ، ހަރުކަށި ފިކުރުތަކުގެ ވިހަ އަސަރު މުޖުތަމައުގައި ފަތުރައި، ހަރުކަށި އަމަލުތަކުގެ ތެރެއަށް ދިވެހި ކުޑަކުދިންނާއި ޒުވާނުން ވައްދައި، ދިވެހި މުޖުތަމައުން އެކަހެރިކޮށް، ވަކި ޖަމާއަތްތަކެއް އުފެއްދުމަށް މަދު ބަޔަކު އަޑީގައި ތިބެގެން ރާއްޖޭގެ އެކި ކަންކޮޅުތަކުގައި މަސައްކަތް ކުރަމުންދާ ކަމަށް އެންސީޓީސީން ބުނެއެވެ. އަދި ކުރަމުންދާ ހީލަތްތެރި މަސައްކަތްތަކާމެދު އެންމެހާ ފަރުދުން ހޭލުންތެރިވެ ސަމާލުވުމަށް ވަނީ އިލްތިމާސްކޮށްފައެވެ.

ނޭޝަނަލް ކައުންޓަރ ޓެރަރިޒަމް ސެންޓަރަކީ ނިރުބަވެރިކަމާއި ހަރުކަށިފިކުރުގެ އަމަލުތައް ހުއްޓުވުމަށް ގައުމީ ފެންވަރުގައި ކުރާ މަސައްކަތްތައް ވިލަރެސްކުރުމަށްޓަކައި މިނިސްޓްރީ އޮފް ޑިފެންސްގެ ދަށުން ހިންގަމުންގެންދާ ކޯޑިނޭޓިންގ އިދާރާއެކެވެ.

2018 ވަނަ އަހަރުގެ ނޮވެމްބަރުމަހާ ހަމަޔަށް، އެންސީޓީސީން ކުރެވުނު މަސައްކަތް ވަނީ އާއްމުންނާއި ހިސާބަށް ގެންދެވޭގޮތް ނުވެފައެވެ. މީގެ ސަބަބުން ހަރުކަށި ފިކުރު ފަތުރާ މީހުންނަށް ވަނީ ފުޅާ ދާއިރާއެއްގައި އެ ފިކުރު ފެތުރުމަށް ފުރުސަތާއި ޖާގަލިބިފައެވެ. ނަމަވެސް، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަރުކާރުން ނިރުބަވެރިކަމާއި ހަރުކަށި ފިކުރާ ދެކޮޅަށް، ގެންގުޅޭ "ޒީރޯ ޓޮލަރެންސް" ސިޔާސަތުގެ ދަށުން، ޚާއްސަ އިސްކަމެއް ދީގެން އާ ހިތްވަރަކާއެކު، ހަރުކަށި ފިކުރު ފެތުރުން ހުއްޓުވުމަށް މުހިންމު މަސައްކަތްތަކެއް ވަނީ ފަށާފައެވެ.

އެގޮތުން ރާއްޖޭގައި ހަރުކަށި ފިކުރު ފެތުރުން ހުއްޓުވުމަށް "ހޯލް އޮފް ގަވަރމަންޓް" އަދި "ހޯލް އޮފް ސޮސައިޓީ" އެޕްރޯޗެއްގެ ދަށުން، މަސައްކަތް ކުރާނެ ގޮތްތައް އޭގައި ބަޔާންކޮށްފައިވާ "ނޭޝަނަލް އެކްޝަން ޕްލޭން އޮން ޕްރިވެންޓިންގ އެންޑް ކައުންޓަރިންގ ވަޔަލެންޓް އެކްސްޓްރީމިޒަމް (2020 - 2024)" ވަނީ، ވަޒީރުންގެ މަޖީލީހުން 7 ޖުލައި 2020 ގައި ފާސްކޮށްފައެވެ. މި އެކްޝަން ޕްލޭން ތަންފީޒުކުރުމުގެ މަސައްކަތް ކަމާބެހޭ އިދާރާތަކާއި ޖަމްއިއްޔާ ޖަމާއަތްތަކާ ގުޅިގެން މިހާރު ވަނީ ފެށިފައެވެ.

މީގެ އިތުރުން، ޔޫ.އެން އޮފީސް އޮން ޑްރަގްސް އެންޑް ކްރައިމް (ޔޫ.އެން.އޯ.ޑީ.ސީ) އާއި ޔޫ.އޭ.އީގެ ހިދާޔާ ސެންޓަރާއި ސައުދީ އަރަބިއްޔާގެ ނާއިފް އަރަބް ޔުނިވަރސިޓީ ފޮރ ސެކިއުރިޓީ ސައިންސަސް ފަދަ ބައިނަލްއަގުވާމީ ޕާޓްނަރުންނާއި ރާއްޖޭގައި ހުންނަ ކަމާބެހޭ އިދާރާތަކާއި އަމިއްލަ ޖަމިއްޔާ ޖަމާއަތްތަކާ ގުޅިގެން، އާންމުން ހޭލުންތެރިކުރުވުމުގެ ޕްރޮގްރާމްތަކާއި ގާބިލްކަން އިތުރުކުރުމުގެ ޕްރޮގްރާމްތައް، ރާއްޖޭގެ އެކި ކަންކޮޅުތަކުގައި، ގިނަ އަދަދަކަށް ވަނީ ހިންގިފައެވެ.