ބްރޯޑްކޮމްގެ ހުސްވެެފައިވާ މަގާމަށް ފަޒީން އަދި ޝިފްޒާއަށް ރުހުން ދިނުމަށް ފެންނަކަމަށް ކޮމިޓީން ފާސްކޮށްފި
25 ފެބުރުއަރީ 2021 | ބުރާސްފަތި 09:02ބްރޯޑްކޮމްއަށް މެމްބަރަކު މި ޢައްޔަނުކުރަނީ މިދިޔަ އަހަރުގެ އޮކްޓޫބަރު މަހުގެ 28 ވަނަ ދުވަހު ކޮމިޝަންގެ މެންބަރުކަމުން ޒީނާ އިސްތިޢުފާ ދެއްވުމުން
ރައީސް އިސްކަންދެއްވާ ތަރުތީބުން 11 ބޭފުޅެއްގެ ނަން މަޖިލީހަށް ފޮނުއްވާފައިވޭ
މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް)އިން ހުސްވެެފައިވާ މަގާމަށް މެމްބަރަކު ޢައްޔަނުކުރުމަށް ހުޅުވާލި ފުރުޞަތުގައި އެކަމަށް ކުރިމަތިލީ 11 ބޭފުޅެއްގެ ނަން ދިރާސާ ކުރުމަށް ފަހު މިނިވަން މުއައްސަސާތަކުގެ ކޮމިޓީން ބ. ތުޅާދޫ ހޭޒްލީން، މުހައްމަދު ފަޒީން އަދި ޏ. ފުވައްމުލަކު މާދަނޑު، އާސާން، ޝިފްޒާ މުސްތަފާއަށް ރުހުން ދިނުމަށް ފެންނަކަމަށް ނިންމައިފިއެވެ.
8 ފެބްރުއަރީ ވީ ހޯމަ ދުވަހުގެ ބޭއްވި ރައްޔިތުންގެ މަޖިލީހުގެ ޖަލްސާގައި ބްރޯޑްކޮމްއަށް މެމްބަރަކު ޢައްޔަން ކުރެއްވުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ ސިޓީފުޅު އަމީން އާންމު ފާތުމަތު ނިއުޝާ އިއްވަވައި ދެއްވާފައިވެއެވެ. ރައީސުލްޖުމްހޫރިއްޔާގެ ސިޓީފުޅުގައި ވަނީ ބްރޯޑްކޮމްއަށް ޢައްޔަންކުރުމަށްޓަކައި ހުޅުވާލި ފުރުޞަތުގައި އެކަމަށް އެދި ހުށަހެޅުއްވި ބޭފުޅުންގެ ތެރެއިން ރައީސް އިސްކަންދެއްވާ ތަރުތީބުން 11 ބޭފުޅެއްގެ ނަން ވަނީ މަޖިލީހަށް ފޮނުއްވާފައެވެ.
މި މައްސަލަ ދިރާސާކޮށް ނިންމިގޮތުގެ ރިޕޯޓުގައި މިނިވަން މުއައްސަސާތަކުގެ ކޮމިޓީން ބުނީ ރައީސުލްޖުމްހޫރިއްޔާ ނަން ފޮނުވާފައިވާ ފަރާތްތަކާ ކޮމިޓީން އިންޓަރވިއު ކުރެއްވުމަށްފަހު، ރައްޔިތުންގެ މަޖިލީހުގެ ގަވާއިދުގެ 201 ވަނަ މާއްދާގެ(ށ) ގައިވާ ގޮތުގެމަތިން ރައްޔިތުންގެ މަޖިލީހުގެ ތަޅުމަށް ފޮނުވާނެ ނަމެއް ކަނޑައެޅުމަށްޓަކައި ކޮންމެ ނަމަކަށް ވަކިވަކިން ވޯޓަށް އަހާފައިވާނެ ކަމަށެވެ.
އެގޮތުން މި ދެނަން ފާސްކޮށްފައިވަނީ ކޮމިޓީގެބައްދަލުވުމަށް ހާޒިރުވެވަޑައިގެން ވޯޓު ދިން މެންބަރުންގެ 2/3 (ތިންބައިކުޅަ ދެބައި) އަޣުލަބިއްޔަތުން ކަމަށް އެ ރިޕޯޓުގައި ވެއެވެ.
ބްރޯޑްކޮމް އަށް މެމްބަރަކު މިޢައްޔަންކުރަނީ މިދިޔަ އަހަރުގެ އޮކްޓޫބަރު މަހުގެ 28 ވަނަ ދުވަހު ކޮމިޝަންގެ މެންބަރުކަމުން ޒީނާ ޒާހިރު އިސްތިޢުފާ ދެއްވުމާ ގުޅިގެންނެވެ. ޒީނާ އިސްތިޢުފާ ދެއްވީ އެ ދުވަހުގެ ރައްޔިތުން މަޖިލީހުގައި އޭނާ އެ މަގާމުން ވަކި ކުރުމުގެ މައްސަލަ އެޖެންޑާކުރެވިފައި ވަނިކޮށެވެ.
ބްރޯޑްކޮމްގައި ހަތް މެމްބަރުން ތިބެންޖެހެއެވެ. އެގޮތުން މި ވަގުތު ކޮމިޝަންގައި ތިއްބެވީ ކޮމިޝަންގެ ރައީސް މަރިޔަމް ވަހީދާ، ނައިބު ރައީސް އަހުމަދު ގައިސް، ކޮމިޝަނަރ އަމްޖަދު ވަހީދު، ކޮމިޝަނަރ އަލީ ޔޫސުފް، ކޮމިޝަނަރ އާމިނަތު އަމީނާ އަދި ކޮމިޝަނަރ އާމިނަތު ސަރާހަތު އިއްޒަތެވެ.
