ރިޔާސީ ބަޔާނަށް އިދިކޮޅު ރައްދު: އެއްވެސް އަސާސެއް ނެތް ގިނަ ތުހުމަތުތަކެއް ސަރުކާރަށް!
އެޗްޕީއޭއާއި ސިއްޙީ ޚިދުމަތްތެރިންނަށް ބާރު ދިނުމަކީ ގޯހެއްކަމަށް ސިފަވާގޮތައް ޖަވާބުދީފަވޭ
އަހްމަދު ސަލީމް (ރެޑްވޭވް ސަލީމް)
މިއަހަރަށް ރައްޔިތުންގެ މަޖިލީހުގެ ޖަލްސާތައް ހުޅުއްވައިދެއްވުމަށް ބޭއްވި ޖަލްސާގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިއްވެވި ރިޔާސީ ބަޔާނަށް އިދިކޮޅުން ދިން ޖަވާބުގައި، އެއްވެސް އަސާސެއް ނެތް ގިނަ ތުހުމަތުތަކެއް ސަރުކާރަށް އަމާޒުކޮށްފިއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިއްވެވި ރިޔާސީ ބަޔާނަށް އިދިކޮޅުން ދޭ ޖަވާބު މަޖިލީހުގެ ތަޅުމުގައި އިއްވަވާދެއްވާފައިވަނީ، އިދިކޮޅު މައި ސިޔާސީ ޕާޓީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ޕާލިމަންޓަރީ ގްރޫޕްގެ ލީޑަރު އަދި މަޖިލީހުގެ މައިނޯރިޓީ ލީޑަރު އޭދަފުށީ ދާއިރާ މެމްބަރ އަހްމަދު ސަލީމެވެ. އޭދަފުށީ ދާއިރާގެ މެމްބަރު އިއްވެވި ރިޔާސީ ބަޔާނުގެ ޖަވާބުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިއްވެވި ރިޔާސީ ބަޔާނުގައި ފާހަގަކުރެއްވި ގިނަ ކަންކަމަށް އަލިއަޅުއްވާލައްވާފައެއް ނުވެއެވެ. އަދި މި ޖަވާބުގައި އިދިކޮޅުން ވަނީ އެ ފަރާތުން މިފަހަކަށް އައިސް ތަކުރާރުކުރަމުންދާ ކުރީގެ ރައީސް އަބްދުﷲ ޔާމީން މިނިވަންކުރުމަށް ގޮވާލާ ގޮވާލުން ތަކުރާރުކުރައްވާފައެވެ. އަދި ދޮގު ހެކި އުފެއްދުމާއި، ޖޭއެސްސީ ސިޔާސީ ކުރުމާއި، އެކި ބޭނުންތަކުގައި އުފައްދާފައިވާ ކޮމިޝަންތަކުގެ މަސައްކަތްތަކަށްވަނީ އެއްވެސް އަސާސެއްނެތި ފާޑު ވިދާޅުވެފައެވެ. މީގެ އިތުރުން ރާއްޖެއަށް އެންމެ ބޭނުންޖެހިފައިވާ ވަގުތު އިންޑިއާއިން ވެދެއްވަމުންދާ އެހީތަކާ ގުޅޭގޮތުން ވެސް ޙަޤީޤަތާއި ޚިލާފު ވާހަކަތަކެއް މި ޖަވާބުގައިވަނީ އިއްވާފައެވެ. އެގޮތުން މިދިޔަ ޖަނަވަރީމަހު އިންޑިއާ ސަރުކާރުގެ އެހީގައި އެކުވެނި ސަރަހައްދުގައި ތަރައްޤީކުރި ސިންތެޓިކް ޓްރެކް ހުޅުވުމުގެ ހަރަކާތްތަކުގެ ތެރެއިން އިސްލާމް ދީނާ ޚިލާފުކަންތައްތަކެއް ކުރިކަމަށް ވަނީ ބުނެފައެވެ. ރާއްޖޭގެ ހުރިހާ ބޮޑެތި މީޑިއާއަކުން ލައިވްކުރި މި އިވެންޓްގައި މިފަދަ ހަރަކާތެއް ހިނގާފައެއް ނުވެއެވެ.
މި ޖަވާބުގައި އިދިކޮޅުންވަނީ، ކޮވިޑްގެ ޙާލަތުގައި އެޗްޕީއޭއާއި ސިއްޙީ ޚިދުމަތްތެރިންނަށް ބާރު ދިނުމަކީ ގޯހެއްކަމަށް ސިފަވާގޮތައް ޖަވާބުދީފައެވެ. އެގޮތުން ކޮވިޑްގެ ޙާލަތުގައި، މި ޙާލަަތުގެ ކަންކަން އެންމެ ރަނގަޅަށް ފަހުމުވާނެ އެޗްޕީއޭ އާއި ސިއްޙީ ޚިދުމަތްތެރިންނަށް ބާރުތަކެއް ދިނުމަކީ އެކަމުގެ ސަބަބުން ރައްޔިތުންގެ އާންމު ދިރިއުޅުމާއި، އިޖުތިމާޢި އަދި އިޤްތިޞާދީކަންކަން ބޮއްސުންލައިގެން ދިޔަ ކަމެއްކަމަށް ވަނީ ބުނެފައެވެ. އަދި އަތޮޅުތަކުގައި ކޮވިޑްގެ ކޭސްތައް ގިނަވީ ސަރުކާރުން ކުރާ ދަތުރުތަކުން ކަމަށް ބުނެ އެއްވެސް އަސާސެއް އަދި އެއްވެސް ހެއްކެތްގެ މައްޗަށް ބިނާނުވާ ތުހުމަތުތަކެއް އިދިކޮޅުންވަނީ އަމާޒުކޮށްފައެވެ. ރާއްޖޭގެ ފަރުތަކުގެ ހާލަތު ދެނެގަތުމާއި، ކަނޑުގެ މާހައުލާއި މަސްމަހާ މެހީގެ އާބާދީގެ ދިރާސާކުރުމަށް ބްލޫ ޕްރޮސްޕަރިޓީ ކޯލިޝަންއާ ގުޅިގެން ކުރިއަށްދަނީ ރާއްޖޭގެ ސިޔާދަތައް ނުރައްކާވެ، ރާއްޖޭގެ ކަނޑު ފަޅާއި ފަރުތަކަށް ގެއްލުން ހުރިކަމެއްކަމަށް ބުނެ އިދިކޮޮޅުން އަމުނަމުންދިޔަ އަސާސެއްނެތް ތުހުމަތުތަކުގެ ލިސްޓްވަނީ ދަންމާލާފައެވެ. މީގެ އިތުރުން ވެސް މަސްވެރިކަމުގެ ދާއިރާއަށް ގެނައި ބަދަލުތަކާއި، އެގްރޯ ނެޓް ކުންފުނީގެ ހިންގުމަކީ ދައުލަތައް ގެއްލުންވާކަމެއްކަމަށް ބުނެފައިވާއިރު، މިކަމުގެ ވެސް އެއްވެސް ހެއްކެއް ރިޔާސީ ބަޔާނުގެ ޖަވާބުގައި ހިމަނާފައެއް ނުވެއެވެ.
ގާތްގަނޑަކަށް 34 ވަރަކަށް މިނެޓަށް ދެމިގެންދިޔަ ރިޔާސީ ބަޔާން އިއްވެވުމުން މަޖިލީހުގެ ރައީސް ރައީސް މުޙައްމަދު ނަޝީދުވަނީ ޤާނޫނު އަސާސީއާ އެއްގޮތައް ރިޔާސީ ބަޔާނަށް އިދިކޮޅުން ޖަވާބުދެއްވުމުން އެކަމަށް ޝުކުރުއަދާކުރައްވާފައެވެ.
ރައީސުލްޖުމްހޫރިއްޔާ ރިޔާސީ ބަޔާން އިއްވަވާފައިވަނީ ފެބްރުއަރީ މަހުގެ 4 ވަނަ ދުވަހުއެވެ. އެދުވަހުގެ ޖަލްސާގައި ވާހަކަދައްކަވަމުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ރިޔާސީ ބަޔާނަށް ޖަވާބުދެއްވުމަށް މައިނޯރިޓީ ލީޑަރ ތައްޔާރުވެ ވަޑައިގެންނެވުމުން އެކަން އިންތިޒާމު ކުރައްވާނެކަމަށެވެ.
ރިޔާސީ ބަޔާނަކީ ގައުމުގެ ހާލަތު އެވަގުތު އޮތްގޮތާއި ހާލަތު ރަނގަޅުކުރުމަށް އިތުރަށް ކުރާނެ ކަންކަން ބަޔާންކޮށް ރައީސުލްޖުމްހޫރިއްޔާ އިއްވަވާ ބަޔާނެކެވެ. ގާނޫނު އަސާސީގެ 84 ވަނަ މާއްދާގައިވާގޮތުން ރައީސުލްޖުމްހޫރިއްޔާ ރިޔާސީ ބަޔާން އިއްވަވަން ޖެހިވަޑައިގަންނަވާއިރު ރައްޔިތުންގެ މަޖިލީހުގެ ގަވާއިދުގެ 32 ވަނަ މާއްދާގައިވާގޮތުން ރައީސުލްޖުމްހޫރިއްޔާ ރިޔާސީ ބަޔާން އިއްވެވުމުން އެއިރެއްގައި ސަރުކާރު ހިންގާ ޕާޓީ ނޫން ދެން މަޖިލީހުގައި އެންމެ ގިނައިން މެމްބަރުން ތިބި ޕާޓީއަކުން ރިޔާސީ ބަޔާނަށް ޖަވާބު ދޭން ޖެހެއެވެ. އެ ޖަވާބު ތައްޔާރުކުރަން ޖެހެނީ ވެސް ރައީސުލްޖުމްހޫރިއްޔާ ނިސްބަތްވެވަޑައިގަންނަވާ ޕާޓީ ނޫން ދެން ތިބި ޕާޓީތަކުގެ މެމްބަރުންގެ ހިޔާލު ހިމަނައިގެންނެވެ. އަދި މި ޖަވާބު ރިޔާސީ ބަޔާން އިއްވާތާ 14 ދުވަސް ތެރޭގައި އިއްވުން ވެސް ގަވާއިދުގައި ބުނާގޮތުން ލާޒިމްވެއެވެ.
މިފަހަރުގެ ރިޔާސީ ބަޔާނަށް އިދިކޮޅުން ވަނީ ގިނަ ފާޑުކިޔުންތަކެއް އަމާޒުކޮށްފައެވެ. އަދި ރިޔާސީ ބަޔާން އިއްވެވި ޖަލްސާ އިދިކޮޅު ޕީޕީއެމް/ޕީއެންސީ ކޯލިޝަނުން ވަނީ ބޮއިކަޓްކޮށްފައެވެ.
