ހުޅުމާލެ ސެންޓްރަލް ޕާކުގައި ތަރައްޤީ ކުރި ރެކްރިއޭޝަނަލް ޒޯނާއި އިންޓަރެކްޓިވް ޒޯން ރަސްމީކޮށް ހުޅުވައިފި
21 ފެބުރުއަރީ 2021 | އާދީއްތަ 05:53މި ސަރަހައްދުތައް ހުޅުއްވައިދެއްވީ ފޮރިން މިނިސްޓަރ އަބްދުﷲ ޝާހިދު އާއި އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ. ސުބުރަމަންޔަން ޖައިޝަންކަރު
ރެކްރިއޭޝަނަލް ޒޯނާއި އިންޓަރެކްޓިވް ޒޯން ރަސްމީކޮށް ހުޅުވުމުގެ ރަސްމިއްޔާތުގެ ތެރެއިން
ހުޅުމާލެ ފޭސް 1 ގެ ސެންޓްރަލް ޕާކުގައި ތަރައްޤީ ކުރި ރެކްރިއޭޝަނަލް ޒޯނާއި އިންޓަރެކްޓިވް ޒޯން ރަސްމީކޮށް ހުޅުވައިފިއެވެ.
ހޮނިހިރު ދުވަހު ބޭއްވި ރަސްމިއްޔާތެއްގައި މި ސަރަހައްދުތައް ހުޅުއްވައިދެއްވީ ފޮރިން މިނިސްޓަރ އަބްދުﷲ ޝާހިދު އާއި އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ. ސުބުރަމަންޔަން ޖައިޝަންކަރުއެވެ.
ހުޅުމާލެ ޑިވަލޮޕްމަންޓް ކޯޕަރޭޝަން (އެޗްޑީސީ) އިން ބުނީ މި ދެ ސަރަހައްދުގެ މަޝްރޫއަކީ ވެސް އިންޑިއާގެ ހިލޭ އެހީގެ ދަށުން ކުރިއަށް ގެންދެވުނު މަޝްރޫއެއް ކަމަށެވެ. އަދި ރެކްރިއޭޝަނަލް ޒޯނާއި އިންޓަރެކްޓިވް ޒޯންގައި ހިމެނެނީ ސްކޭޓިންގ އޭރިއާ، އައުޓްޑޯ ޖިމް، ވިއުއިންގ ޕްލެޓްފޯމް، ކުޑަކުދިން ކުޅޭ ސަރަހައްދެއްގެ އިތުރުން ޕާކިންގ ޒޯނަކާއި ކުޑަކުދިންނަށް ބައިސިކަލް ދުއްވުމަށް ހާއްސަ ރޫޓެކެވެ.
މި ރަސްމިއްޔާތުގައި ވާހަކަދައްކަވަމުން އެޗްޑީސީގެ ޑެޕިއުޓީ މެނޭޖިންގ ޑިރެކްޓަރ އަހްމަދު އާތިފް ވަނީ ހުޅުމާލެ ސެންޓްރަލް ޕާކް ސަރަަހައްދަކީ ހުޅުމާލެ ތަރައްޤީކުރުމަށް މުހިންމު އެއް ޕްރޮޖެކްޓްކަމުގައި ފާހަގަކުރައްވައި އިންޑިއާ ސަރުކާރަށް ޝުކުރު އަދާކުރައްވާފައެވެ. އަދި މިގޮތަށް އާންމުންނަށް ހުޅުވާލެވޭ ސަރަހައްދުތައް ހެޔޮގޮތުގައި ބޭނުންކުރުމަށް ވެސް އިލްތިމާސްކޮށްފައިވެއެވެ.
މި ރަސްމިއްޔާތުގައި އިންޑިއަން ހައިކޮމިޝަންގެ އިސް ބޭފުޅުންނާއި ހުޅުމާލެ ދާއިރާގެ މެމްބަރު އަލީ ނިޔާޒް ވެސް ބައިވެރިވެވަޑައިގެންނެވިއެވެ.
