އިނގިރޭސި ޕްރިމިއާ ލީގުގައި ބުދަ ދުވަހުގެރޭ އެވަޓަން ބަލިކޮށް ތާވަލުގެ އެއްވަނައިގައި މެންޗެސްޓާ ސިޓީން 10 ޕޮއިންޓުގެ ލީޑެއް ނަގައިފިއެވެ.

ރަށުން ބޭރުގައި ކުޅުނު މެޗުން ސިޓީ މޮޅުވީ 3-1 ގެ ނަތީޖާއަކުންނެވެ. މި މޮޅާއެކު ސިޓީން ވަނީ ހުރިހާ މުބާރާތެއްގައި އެންމެ ފަހުން ކުޅުނު 17 މެޗުންވެސް މޮޅުވެފައެވެ. އަދި ލީގުގައި އެންމެ ފަހުން ކުޅުނު 12 މެޗުންވެސް ސިޓީ ވަނީ މޮޅުވެފައެވެ.

ހޮނިހިރު ދުވަހުގެރޭ ކުޅުނު މެޗުގައި ސިޓީން މޮޅު ކުޅުމެއް ދެއްކިއިރު، މެޗުގައި އެންމެ ފުރަތަމަ ލަނޑު ޖަހާ ލީޑު ނެގީވެސް އެ ޓީމުންނެވެ. އެގޮތުން މެޗުގެ 32 ވަނަ މިނެޓުގައި ސިޓީއަށް ލީޑު ނަގައިދިން ލަނޑު ކާމިޔާބުކޮށްދިނީ ފިލް ފޯޑެންއެވެ. އެކަމަކު އޭގެ ފަސް މިނެޓު ފަހުން ރިޗާލިސަން ވަނީ ލަނޑެއް ޖަހައި އެވަޓަނަށް ނަތީޖާ އެއްވަރުކޮށްދީފައެވެ.

މި މެޗުގައި ސިޓީން ދެވަނަ ފަހަރަށް ލީޑު ނެގީ 63 ވަނަ މިނެޓުގައި ރިޔާދު މާރޭޒް ކާމިޔާބުކުރި ލަނޑުންނެވެ. އޭނާ މި ލަނޑު ކާމިޔާބުކުރި އޭރިއާ ބޭރުން ފޮނުވާލި ހަމަލާއަކުންނެވެ. އަދި 77 ވަނަ މިނެޓުގައި ބެނާޑޯ ސިލްވާ ވަނީ ލަނޑެއް ޖަހައި ސިޓީއަށް ލީޑު ފުޅާކޮށްދީފައެވެ.

މި މޮޅާއެކު ތާވަލުގެ އެއްވަނައިގައި ސިޓީން 10 ޕޮއިންޓުގެ ލީޑެއް ނެގިއިރު، އެ ޓީމަށް ވަނީ ކުޅުނު 24 މެޗުން 56 ޕޮއިންޓް ލިބިފައެވެ. ދެވަނައިގައި އޮތް މެންޗެސްޓާ ޔުނައިޓެޑާއި، ތިންވަނައިގައި އޮތް ލެސްޓާ ސިޓީއަށް 24 މެޗުން ލިބިފައިވަނީ 46 ޕޮއިންޓެވެ. އަދި ބުދަ ދުވަހުގެރޭ ސިޓީ އަތުން ބަލިވި އެވަޓަން އޮތީ ތާވަލުގެ ހަތްވަނައިގައި 23 މެޗުން 37 ޕޮއިންޓާއެކުއެވެ.