ރާއްޖޭގައި މިހާރު އުޅެނީ ހަމައެކަނި އިނގިރޭސިވިލާތުގެ ވޭރިއެންޓް ކަަމަކަށް ނުނިންމޭނެ
ނޫސްވެރިންގެ ބައްދަލުވުމުގައި ޑރ.ނަޒްލާ މުސްތަފާ ވާހަކަދައްކަވަނީ
ރާއްޖޭގައި ކޮވިޑް-19ގެ އިނގިރޭސިވިލާތު ވޭރިއަންޓް އުޅޭކަމުގެ ހެކި ލިބިފައިވާ ކަމަށާއި، ޔަގީންކަން ދެވޭނީ އިތުރަށް ބަލަން ޖެހޭކަންކަން ބެލުމަށްފަހު ކަަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީން) ބުނެފިއެވެ.
ބުދަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫޕުން ޑރ. ނަޒްލާ މުސްތަފާ ވިދާޅުވީ ރާއްޖެއިން ފެނިފައިވާ ކޮވިޑް-19ގެ ވައްތަރުތައް ޓެސްޓްކުރުމަށް ރާއްޖެއިން ބޭރަށް ފޮނުވާފައިވާ ކަމަށެވެ. އަދި ރާއްޖޭގައި އައު ވޭރިއެންޓް އުޅުމުގެ ފުރުސަތު ބޮޑުކަން ޑރ. ނަޒްލާ ފާހަގަކުރެއްވިއެވެ.
ރާއްޖެއަކީ މީހުން ދަތުރުކުރާ ގައުމެއްކަން ފާހަގަކުރައްވައި ޑރ. ނަޒްލާ ވިދާޅުވީ މިދިޔަ ޑިސެންބަރު މަހުގެ ތެރޭގައި ވެސް ގިނަ އަދަދެއްގެ ފަތުރުވެރިން ރާއްޖެއަށް ޒިޔާރަތްކޮށްފައިވާ ކަމަށެވެ. އެހެންކަމުން ރާއްޖޭގައި މިހާރު އުޅެނީ ހަމައެކަނި އިނގިރޭސިވިލާތުގެ ވޭރިއެންޓް ކަަމަށް ނުނިންމޭނެ ކަމަށާއި، އެހެން ވޭރިއެންޓް ވެސް އުޅުމުގެ ފުރުސަތު އެބައޮތް ކަމަށެވެ.
މީގެ އިތުރުން ޑރ. ނަޒްލާ ވިދާޅުވީ އައު ވޭރިއެންޓަށް އެސްޓްރަޒެނެކާ އަދި ކޮވިޝީލްޑް ވެކްސިންގެ އަސަރު ވަރަށް ބޮޑަށް ކުރާ ކަމަށާއި، ގައުމުތަކުގައި ވެކްސިންއަށް ވަރަށް ބޮޑަށް ޑިމާންޑް ބޮޑުވެފައިވާ ކަމަށެވެ.
ޑރ. ނަޒްލާ ވިދާޅުވީ ބަލި ކޮންޓްރޯލްކުރުމަށް ހުރިހާ ރައްޔިތުން އަވަހަށް ވެކްސިންޖެހުމަކީ ވަރަށް މުހިންމު ކަމަށާއި، ވައިރަސް ކޮންޓްރޯލްނުވެ ފެތުރެމުންދާ ވަރަކަށް އައު ވޭރިއެންޓް އިތުރުވުމުގެ ފުރުސަތު ބޮޑު ކަމަށެވެ.
