ރާއްޖޭގައި ކޮވިޑް-19ގެ އިނގިރޭސިވިލާތު ވޭރިއަންޓް އުޅޭކަމުގެ ހެކި ލިބިފައިވާ ކަމަށާއި، ޔަގީންކަން ދެވޭނީ އިތުރަށް ބަލަން ޖެހޭކަންކަން ބެލުމަށްފަހު ކަަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީން) ބުނެފިއެވެ.
ބުދަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫޕުން ޑރ. ނަޒްލާ މުސްތަފާ ވިދާޅުވީ ރާއްޖެއިން ފެނިފައިވާ ކޮވިޑް-19ގެ ވައްތަރުތައް ޓެސްޓްކުރުމަށް ރާއްޖެއިން ބޭރަށް ފޮނުވާފައިވާ ކަމަށެވެ. އަދި ރާއްޖޭގައި އައު ވޭރިއެންޓް އުޅުމުގެ ފުރުސަތު ބޮޑުކަން ޑރ. ނަޒްލާ ފާހަގަކުރެއްވިއެވެ.
އަޅުގަނޑުމެންގެ އަތުގައި ހުރި ކިޓުން އަސްލު ސީކުއެންސިންގ ހެދީމަ ބޮޑަށް އެނގެނީ އެއީ ކޮން ވޭރިއެންޓެއްކަން. އެކަމަކު އަޅުގަނޑުމެންގެ އަތުގައި ހުރި ކިޓުން އެސްޖީން ޑްރޮޕް ނޫނީ ޔޫކޭ ވޭރިއެންޓް ގޮތަށް ފާހަގަވޭ. އެކަމަކު އަޅުގަނޑުމެންނަކަށް ނުބުނެވޭނެ ޔޫކޭ ވޭރިއެންޓް އެބަ އުޅެއެކޭ. އެކަމަކު މިހާރު ގާތްގަނޑަކަށް މަދުވެގެން ހަތަރު ވޭރިއެންޓް އެބައުޅޭ. ޔޫކޭ ވޭރިއެންޓް، ސައުތް އެފްރިކާ ވޭރިއެންޓް، ބްރެޒިލް އަދި ޑެނިޝް ވޭރިއެންޓް. އެހެންވީމަ އަޅުގަނޑުމެން ސީކުއެންސް ފޮނުވާފައި ވާނީ. އެހެން ވޭރިއެންޓް ރާއްޖޭގައި އުޅުމުގެ ފުރުސަތު އޮންނާނެ.ޑރ.ނަޒްލާ މުސްތަފާ
ރާއްޖެއަކީ މީހުން ދަތުރުކުރާ ގައުމެއްކަން ފާހަގަކުރައްވައި ޑރ. ނަޒްލާ ވިދާޅުވީ މިދިޔަ ޑިސެންބަރު މަހުގެ ތެރޭގައި ވެސް ގިނަ އަދަދެއްގެ ފަތުރުވެރިން ރާއްޖެއަށް ޒިޔާރަތްކޮށްފައިވާ ކަމަށެވެ. އެހެންކަމުން ރާއްޖޭގައި މިހާރު އުޅެނީ ހަމައެކަނި އިނގިރޭސިވިލާތުގެ ވޭރިއެންޓް ކަަމަށް ނުނިންމޭނެ ކަމަށާއި، އެހެން ވޭރިއެންޓް ވެސް އުޅުމުގެ ފުރުސަތު އެބައޮތް ކަމަށެވެ.
މީގެ އިތުރުން ޑރ. ނަޒްލާ ވިދާޅުވީ އައު ވޭރިއެންޓަށް އެސްޓްރަޒެނެކާ އަދި ކޮވިޝީލްޑް ވެކްސިންގެ އަސަރު ވަރަށް ބޮޑަށް ކުރާ ކަމަށާއި، ގައުމުތަކުގައި ވެކްސިންއަށް ވަރަށް ބޮޑަށް ޑިމާންޑް ބޮޑުވެފައިވާ ކަމަށެވެ.
ޔޫރަޕްގެ ގައުމުތަކުގައި ވެކްސިނަށް ހަނގުރާމަ ކުރެވޭ އެބަ އެއްގައުމުން އަނެއް ގައުމަށް ވެކްސިން ނުދީގެން ވެސް. އެހެންވީމަ އަޅުގަނޑުމެންނަށް ހީވަނީ ކުޑަ މުޖުތަމައުއެއްގައި ނަސީބު ގަދަހެން މިހާ ފަސޭހައިން ވެކްސިން ލިބިފައިވާތީ. ދެން ބައެއް ފަހަރު ހައިރިސްކް މީހުން ވެކްސިން ޖަހަން ގެންދަން ނޫނީ ދުވަސްވީ މީހުން ވެކްސިން ޖަހަން ގެންދަން ކުޑަކޮށް ފަސްޖެހޭ. އެކަމަކު ފާހަގަކުރަން ޖެހޭ ކަމަކީ އެމީހުން ބަލި ވެއްޖެއްޔާމުން ވަރަށް ބޮޑަށް ބަލިވުމުގެ ފުރުސަތު އެބަ އޮތްކަން. އަދި ޚާއްސަކޮށް ވޭރިއެންޓް އުޅޭއިރު ހަމައެކަނި ދުވަސްވީ މީހުންނެއް ނޫން ، އަޅުގަނޑުމެންނަށް ފާހަގަވޭ ހަމަ ގާތްގަނޑަކަށް 40 އަހަރުގެ މީހުން ވެސް ވަރަށް ބަލިވާކަން.ޑރ.ނަޒްލާ މުސްތަފާ
ޑރ. ނަޒްލާ ވިދާޅުވީ ބަލި ކޮންޓްރޯލްކުރުމަށް ހުރިހާ ރައްޔިތުން އަވަހަށް ވެކްސިންޖެހުމަކީ ވަރަށް މުހިންމު ކަމަށާއި، ވައިރަސް ކޮންޓްރޯލްނުވެ ފެތުރެމުންދާ ވަރަކަށް އައު ވޭރިއެންޓް އިތުރުވުމުގެ ފުރުސަތު ބޮޑު ކަމަށެވެ.
