ދިވެހި ރާއްޖޭގައި، އިންޑިއާގެ ނޭވީއިން ބޭނުންކުރަމުންދާ ޑޯނިޔާ މަތިންދާބޯޓު ބޭނުންކުރުމަށް ވެފައިވާ އެއްބަސްވުމުގެ ތަފްސީލް ހާމަކުރަން ނުޖެހޭކަމަށް އިންފޮމޭޝަން ކޮމިޝަނުން ނިންމައިފިއެވެ. މި މައްސަލައިގައި ގޮތް ނިންމުމަށް 3 ބައްދަލުވުމެއް ބާއްވާފައިވާއިރު، މައްސަލައިގައި ގޮތް ނިންމާފައިވަނީ ފެބުރުއަރީ 17 ވަނަ ދުވަހު ބޭއްވި ބައްދަލުވުމުގައެވެ.

ދިވެހިރާއްޖޭގައި، އިންޑިއާގެ ނޭވީގައި ބޭނުންކުރަމުންދާ ޑޯނިއާ މަތިންދާ ބޯޓެއް ބޭނުން ކުރުމާ ގުޅޭ ގޮތުން ދިވެހިރާއްޖެއާއި އިންޑިއާއާ ދެމެދު ހެދިފައިވާ އެއްބަސްވުމުގެ ކޮޕީއެއް ހޯދުމަށް މައްސަލަ ހުށަހެޅި ފަރާތުން، 23 ޖުލައި 2020 ގައިހުށަހެޅުމުން މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން ހޯދުމަށް އެދުނު މަޢުލޫމާތު ދީފިނަމަ ޤައުމީ ސަލާމަތަށް ނުރައްކާ ވެދާނޭ ކަމަށް ބުނެ ޑިފެންސް މިނިސްޓްރީން ވަނީ ޖަވާބު ދީފައިވެއެވެ. އަދި މި ޖަވާބާމެދު ހިތްހަމަނުޖެހޭތީ ޤާނޫނުގެދަށުން މުރާޖާ ކުރުމުން މައްސަލަ ރައްދުވާ އިދާރާގެ އިންފޮމޭޝަން އޮފިސަރުގެ އެ ނިންމުން ރަނގަޅު ކަމަށް މުރާޖާކޮމިޓީގެ ތިން މެންބަރުންގެ އިއްތިފާގުން ނިންމާފައިވާކަމަށް ވަނީ ހާމަކޮށްފައެވެ.

އިންފޮމޭޝަން ކޮމިޝަރގެ އޮފީހުން ވަނީ މިގޮތަށް ނިންމުން ނިންމާ މި މައްސަލައިގައި ފާހަގަކުރެވުނު 9 ނުކުތާއެއް ތަފްސީލުކޮށްފައެވެ. އެގޮތުން ހޯދުމަށް އެދުނު މަޢުލޫމާތު ދީފިނަމަ އެކުރެވެނީ ކުށެއްކަމަށާއި ދޭދޭ ދެގައުމެއްގެ ދެމެދުގައި އޮންނަ ގުޅުމަށް ބުރޫއަރާފާނެކަމަށާއި ގައުމީ ސަލާމަތަށް ނުރައްކާވެދާނޭ ކަމަށް ގަބޫލުކުރެވޭކަމަށް ޑިފެންސް މިނިިސްޓްރީން ޖަވާބުދީފައިވާކަމަށް އިންފޮމޭޝަން ކޮމިޝަނަރގެ އޮފީހުންވަނީ ހާމަކޮށްފައެވެ. އަދި އެދިފައިވާ މައުލޫމާތު ކަމާ ނުބެހޭ ފަރާތްތަކަށް ހިއްސާކުރުމުން ގައުމީ ސަލާމަތަށް ނޭދެވޭ އަސަރެއް ކޮށްފާނެކަމަށް ސިފައިންގެ ލަފާދޭ މަޖިލީހުން ނިންމުމުން އެ މައުލޫމާތު އެހެން އެއްވެސް ފަރާތަކާ ހިއްސާކުރުމާ ބެހޭގޮތުން ގޮތް ކިޔައި އެހެން ގޮތަކަށް ބަދަލު ނުކުރެވޭނެ ކަމަށް، ޑިފެންސް މިނިސްޓްރީގެ މުރާޖައާ ކޮމިޓީގެނިންމުމުގައި ބަޔާންކޮށްފައިވާކަމަށް ވަނީ ނިންމާފައެވެ.

މީގެ އިތުރުން މައްސަލައާ ގުޅިގެން ބެލި ބެލުމުން، ރާއްޖެ ގެނައި އިންޑިއާ ސިފައިންގެ އަސްކަރީ މަތިންދާ ބޯޓާ ގުޅޭ ބައެއް މައުލޫމާތު އާންމުކޮށްފައި ހުރިކަން ވަނީ ފާހަގަކޮށްފައެވެ. އެގޮތުން އެމްއެންޑީއެފްއާއި ރާއްޖޭގައި ހުންނަ އިންޑިއާ އެމްބަސީގެ ރަސްމީ ޓްވިޓާ އެކައުންޓާއި އެމްއެންޑީއެފްގެ ރަސްމީ ވެބްސައިޓުގައި މި ބޯޓާގުޅޭ މަޢުލޫމާތު ހާމަކޮށްފައިވެއެވެ.

މި ސަބަބުތަކަށް ބަލާ، ހޯދަން އެދިފައިވާ މައުލޫމާތަކީ، ގާނޫނުގެ 25ވަނަ މާއްދާގައި ބަޔާންކޮށްފައިވާ ފަދައިން ދޭދޭ ދެ ގައުމުގެ ގުޅުމަށް، ނުރަނގަޅު އަސަރެއް ކޮށްފާނެ ކަމަށް ބެލެވޭ މައުލޫމާތަކަށް ވުމާއެކު، ގާނޫނުގެ 20ވަނަ މާއްދާގައި ބަޔާންކޮށްފައިވާ އުސޫލަށް ރިއާޔަތްކުރާއިރު، އެދިފައިވާ މައުލޫމާތު ހާމަކުރުމުން ރައްކާތެރިކޮށްދޭ މަސްލަހަތަށް ވުރެ ހާމަނުކުރުމުން ރައްކާތެރިކޮށްދޭ މަސްލަހަތު ބޮޑުކަން ފާހަގަކޮށް ޑޯނިޔާ މަތިންދާބޯޓު ބޭނުންކުރުމަށް ވެފައިވާ އެއްބަސްވުމުގެ ތަފްސީލް ހާމަކުރަން ނުޖެހޭކަމަށް އިންފޮމޭޝަން ކޮމިޝަނަރުގެ އޮފީހުން ވަނީ ނިންމާފައެވެ.