13 އަހަރަށްފަހު އަލަބާ ބަޔާން ދޫކޮށްލަނީ

ދުނިޔޭގެ ޗެމްޕިއަން ބަޔާން މިއުނިކުގައި 13 އަހަރު ހޭދަކުރުމަށްފަހު، އެ ޓީމު ދޫކޮށްލަން އޮސްޓްރިއާގެ ޑިފެންޑަރު ޑޭވިޑް އަލަބާ ނިންމައިފިއެވެ.

އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި އަލަބާ ވަނީ މި ސީޒަން ނިމުމުން ބަޔާން ދޫކޮށްލާނެކަން ހާމަކޮށްފައެވެ. އަލަބާ ބަޔާން ދޫކޮށްލާއިރު، ބަޔާނާއެކު އޭނާ ހަދާފައިވާ އެއްބަސްވުން މި ސީޒަން ނިމުމުން ހަމަވާނެއެވެ. އެހެންކަމުން މީގެ ކުރިން ބަޔާނުން އަލަބާގެ އެއްބަސްވުން އާކުރަން މަސައްކަތްކުރި ނަމަވެސް، އެކަން ކާމިޔާބުވާގޮތެއް ނުވިއެވެ.

އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި އަލަބާ ބުނީ މިހާރު އޭނާގެ އަމާޒަކީ ބަޔާން ދޫކޮށް، ކެރިއަރުގައި އައު ޗެލެންޖަކާ ކުރިމަތިލުން ކަމަށެވެ. އެކަމަކު ކުރިއަށް އޮތް ސީޒަނުގައި ގުޅޭނެ ޓީމެއް އަދި ކަނޑަނާޅާ ކަމަށްވެސް އަލަބާ ވަނީ ބުނެފައެވެ.

މި ސީޒަން ނިމުމުން އަލަބާ ބަޔާން ދޫކޮށްލާއިރު، އިނގިރޭސި ޕްރިމިއާ ލީގުގެ އެންމެ ފަހުގެ ދެ ޗެމްޕިއަނުން ކަމަށްވާ މެންޗެސްޓާ ސިޓީ އާއި ލިވަޕޫލުން އަންނަނީ އޭނާއަށް ފާރަލަމުންނެވެ. އަދި އަލަބާއާ ހަވާލާދީ ބައެއް މީޑިއާތަކުން ރިޕޯޓުކުރާ ގޮތުގައި އޭނާގެ ޝައުގުވެރިކަން ހުރީ ޕްރިމިއާ ލީގުގެ ކުލަބަކަށް ބަދަލުވުމަށެވެ.

އޮސްޓްރިއާގެ ޔޫތު ޓީމުތަކުން ފާހަގަވި އަލަބާ އެންމެ ފުރަތަމަ ބަޔާނުގެ ޔޫތު ޓީމާ ގުޅުނީ 2008 ވަނަ އަހަރުއެވެ. އޭގެ ފަހުން 2010 ވަނަ އަހަރު ބަޔާނުގެ ސީނިއާ ޓީމަށް އަލަބާ ޕްރޮމޯޓުވިއިރު، އޭގެ ފަހުން އެއް ސީޒަނުގައި އަލަބާ ވަނީ ލޯނު އެއްބަސްވުމެއްގެ ދަށުން ހޮފެންހެއިމަށްވެސް ކުޅެފައެވެ.

އެކަމަކު ފަހުން ބަޔާނުގެ ސީނިއާ ޓީމުގެ މުހިންމު މެމްބަރަކަށް އަލަބާ ވިއިރު، އޭނާ ވަނީ މިހާތަނަށް ބަޔާނަށް 415 މެޗު ކުޅެދީ 33 ލަނޑު ޖަހާފައެވެ. އަދި ވަނީ ބަޔާނާއެކު ޖަރުމަން ލީގު ނުވަ ފަހަރު، ޔުއެފާ ޗެމްޕިއަންސް ލީގު ދެ ފަހަރު އަދި ފީފާ ކުލަބު ވޯލްޑް ކަޕް ދެ ފަހަރު ކާމިޔާބުކޮށްފައެވެ.