ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބަށް ކުރިމަތިލި ކެންޑިޑޭޓުންގެ ތެރެއިން ބައެއް ކެންޑިޑޭޓުން ނަން ނެގުމުގެ ސަބަބުން ލޯކަލް ކައުންސިލްގެ 10 މަގާމަކަށް 15 މެމްބަރުން އޮޓަމެޓިކުން އިންތިޚާބުވެފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.

އިލެކްޝަންސް ކޮމިޝަނުން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ކޮމިޝަންގެ ރައީސް އަހުމަދު ޝަރީފް ވިދާޅުވީ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީއަށް ކުރިމަތިލި މެންބަރުންގެ ތެރެއިން ޖުމްލަ 308 ކެންޑިޑޭޓުން ނަން އަނބުރާ ނަގާފައިވާ ކަމަށެވެ.

އޭގެ ތެރެއިން 169 ކެންޑިޑޭޓުން ނަން ނަގާފައި ވަނީ ލޯކަލް ކައުންސިލް އިންތިޚާބުންނެވެ. އަދި 139 ކެންޑިޑޭޓުން ނަން ނަގާފައި ވަނީ އަންހެނުންގެތަރައްގީއަށް މަސައްކަތްކުރާ ކޮމިޓީގެ އިންތިޚާބުންނެވެ.

ޝަރީފް ވިދާޅުވީ ކުރިމަތިލި މެމްބަރުންގެ ތެރެއިން ގިނަ ބަޔަކު ނަން އަނބުރާ ނަގާފައިވާތީ، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ 7 ދާއިރާއަަކަށް 28 މެމްބަރުން ހޮވިފައިވާ ކަމަށާއި ލޯކަލް ކައުންސިލް އިންތިޚާބުގެ 10 ދާއިރާއަކަށް 15 މެމްބަރުން ހޮވިފައިވާ ކަމަށެވެ. އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި ދެ ދާއިރާއަކަށް ބޭނުންވާ ވަރަށް މެމްބަރުން ކުރިމަތިލާފައި ނުވާ ކަމަށް ވެސް ވިދާޅުވިއެވެ.

އިންތިޚާބަށް ކުރިމަތިލި ސިޔާސީ ޕާޓީތަކުގެ މެމްބަރުންގެ ތެރެއިން އެންމެ ގިނައިން ނަން ނަގާފައި ވަނީ އެމްޑީޕީ އިން ކުރިމަތިލި މެމްބަރުންނެވެ. އެގޮތުން އެމްޑީޕީއިން ލޯކަލް ކައުންސިލް އިންތިޚާބަށް ކުރިމަތިލި 50 މެމްބަރުން ނަން ނަގާފައިވާއިރު އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިޚާބުން އެމްޑީޕީގެ 68 މެމްބަރުން ވަނީ ނަން ނަގާފައެވެ.

މިއާއެކު އިންތިޚާބުގައި ވާދަކުރާ މިހާރު ތިބީ ޖުމްލަ 3،934 ކެންޑިޑޭޓުންނެވެ. އެއީ ލޯކަލް ކައުންސިލް އިންތިޚާބުގައި ވާދަކުރާ 2،264 ކެންޑިޑޭޓުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި ވާދަކުރާ 1،670 ކެންޑިޑޭޓުންނެވެ. މި އިންތިޚާބުގައި އެންމެ ގިނަ ކެންޑިޑޭޓުން ވާދަކުރަނީ އެމްޑީޕީންނެވެ. އެއީ ޖުމްލަ 1،475 ކެންޑިޑޭޓުންނެވެ.

މިދިޔަ އަހަރު އޭޕްރިލްގައި ބާއްވަން ތައްޔާރުވި ލޯކަލް ކައުންސިލް އިންތިޚާބު ކޮވިޑް-19އާ ގުޅިގެން ފަސްވުމާއެކު، ކައުންސިލް އިންތިޚާބާ ގުޅިގެން އެކުލަވާލި ޚާއްސަ ގާނޫނުގައި ވާގޮތުން ކެންޑިޑޭޓުން ނަން ނެގުމުގެ ފުރުސަތު ހުޅުވައިލާފައި ވަނީ މި މަހުގެ 11 ވަނަ ދުވަހުގެ ނިޔަލަށެވެ.