އެމްޑީޕީގެ ޓީމު ބުރުނީ އަދި ވިލިފުށީގެ ރައްޔިތުންނާއި ބައްދަލުކޮށްފި

ލޯކަލް ކައުންސިލް އިންތިހާބަށް ތައްޔާރުވުމުގެ ގޮތުން އެމްޑީޕީން ތ.އަތޮޅަށް ކުރަމުންގެންދާ ދަތުރުގައި އެއަތޮޅު ބުރުނީ އަދި ވިލިފުށީގެ ރައްޔިތުންނާއި ބައްދަލުކޮށްފި އެވެ.

މިއަދު ހެނދު ބުރުނީއަށް ދިއުމުން އެރަށުން ވަނީ މިޓީމްގެ މެމްބަރުންނަށް ހޫނު މަރުހަބާއެއް ކިޔާފައެވެ. އަދި އެރަށުގައި ކައުންސިލް އިންތިހާބުގައި ވާދަކުރާ އެމްޑީޕީގެ ކެނޑިޑޭޓާއި ވިލީފުށީ ދާއިރާގެ އަތޮޅު ކައުންސިލް ކެނޑިޑޭޓާއެކު ވަނީ ދޮރުން ދޮރަށް ހިނގާ ރައްޔިތުންނާއި ބައްދަލުކޮށްފައެވެ.

ބުރުނީގެ ރައްޔިތުންނާއި ބައްދަލުކޮށް ވާހަކަދައްކަވަމުން އެމްޑީޕީގެ ޗެއަރޕާސަންގެ ނައިބް އަލީ ޝިޔާމް ވިދާޅުވީ މި ކައުންސިލް އިންތިހާބަކީ އެމްޑީޕީ އަދި އިސްލާޙަށް ލޯބިކުރާ ފަރާތްތަކަށް ވަރަށް މުހިއްމު އިންތިހާބެއް ކަމަށާއި ވޯޓްލާ ދުވަހު ހުރިހާ ރައްޔިތުން ނިކުމެ އަވަހަށް ވޯޓްލުމަށް އެދޭ ކަމަށެވެ.

އަދި ބުރުނީގައިވެސް ކެމްޕެއިން އިތުރަށް ވަރުގަދަކޮށް މެއި 6 ވަނަ ދުވަހު ވީހާވެސް ގިނަ މީހުން ވޯޓްލުމަށް ނިކުންނަން ހިތްވަރު ލިބޭގޮތަށް ކެމްޕެއިންގެ ކަންތައް ކުރިއަށް ގެންދިޔުމަށް އަލީ ޝިޔާމް ވިދާޅުވި އެވެ.

މީގެ އިތުރުން މިއަދު ހަވީރު އެއަތޮޅު ވިލިފުއްޓަށް އެމްޑީޕީގެ ޓީމު ދިއުމުން ވަނީ ވަރަށް ހޫނު މަރުހަބާއެއް ކިޔާފައެވެ. އަދި މިޓީމުގެ މެމްބަރުން ވަނީ މިވަގުތު ގޭބަންދުކޮށްފައި ހުރި އަދި ވިލިފުށީ ކައުންސިލްގެ ކެނޑިޑެސީ ބާތިލްކުރި އަދި މިހާރު ކައުންސިލްގެ ރައީސް ހުސެއިން ޖަބީންގެ ގެއަށް ޒިޔާރަތްކޮށް އޭނާއާއި ބައްދަލުކޮށްފައެވެ.

މިދާއިރާގެ ކެންޑިޑޭޓުންނާއި އެކު ބާއްވާ ހާއްސަ ޖަލްސާ މިރޭ ވިލިފުށީ އެމްޑީޕީ ހަރުގޭގައި އޮންނާނެ އެވެ. މިޖަލްސާގައި ވިހާވެސް ގިނަ ބަޔަކު ބައިވެރިވުމަށް އެމްޑީޕީން އެދެއެވެ.