ވޯލްޑް ޓްރޭޑް އޯގަނައިޒޭޝަން، ޑަބްލިޔު.ޓީ.އޯ.ގެ ވެރިޔާގެ މަޤާމަށް ފުރަތަމަ ފަހަރަށް އަންހެން ވެރިއަކު އައްޔަންކޮށްފިއެވެ.

ޑަބްލިއުޓީއޯގެ ޑިރެކްޓަރ ޖެނެރަލް ކަމަށް އައްޔަންކޮށްފައިވަނީ، ނައިޖީރިއާގެ ކުރީގެ ފިނޭންސް މިނިސްޓަރ އެންގޯޒީ އޮކޮންޖޯ އިވެއެލާއެވެ. އެންގޯޒީ އޮކޮންޖޯ އިވެއެލާއަކީ އެމެރިކާގެ ރައްޔިތުކަން ލިބިވަޑައިގެންފައިވާ ބޭފުޅެއްކަމުގައިވާއިރު އެކަމަނާ މި މަޤާމަށް ހޮވިވަޑައިގަތުމުން އެކަމަނާ ވެގެންގޮސްފައި މިވަނީ މި ޖަމުޢިއްޔާގެ އެންމެ ފުރަތަމަ އަންހެން ވެރިޔާގެ އިތުރުން ކަޅު ނަސްލުގެ ވެރިޔާއަށް ވެސް މެއެވެ.

ވޯލްޑް ޓްރޭޑް އޯގަނައިޒޭޝަންގެ ޑިރެކްޓަރ ޖެނަރަލްގެ މަޤާމަށް ކުރިމަތިލުމަށް އެޖަމުޢިއްޔާގެ މެމްބަރު ޤައުމުތަކަށް ހުޅުވާލި ފުރުޞަތުގައި 8 ޤައުމަކުން ވަނީ އެމަޤާމަށް ނަން ހުށަހަޅާފައެވެ. ނަން ހުށަހެޅި ޤައުމުތަކަކީ، މިސްރު، ދެކުނު ކޮރެޔާ، މެކްސިކޯ، މޯލްޑޯވާ، ނައިޖީރިއާ، ސައުދީ އަރަބިއްޔާ އަދި އިނގިރޭސިވިލާތެވެ. މިޤައުމުތަކުން ވަނީ ވިޔަފާރީގެ ދާއިރާއިން ތަޖުރިބާކާރު ބޭފުޅުންތަކެއްގެ ނަން ހުށަހަޅާފައެވެ. އެހެންނަމަވެސް މި 8 ފަރާތުގެ ތެރެއިން 2 ބޭފުޅެއްގެ ނަން ޝޯޓްލިސްޓްކުރުމަށްފަހު މެމްބަރު ޤައުމުތަކުގެ މެދުގައި ނެގި ވޯޓަކުން ޑަބްލިއުޓީއޯގެ ޑިރެކްޓަރ ޖެނެރަލްއަކަށް އޮކޮންޖޯ އިވެއެލާ މިވަނީ އައްޔަންކޮށްފައެވެ.

އޮކޮންޖޯ އިވެއެލާއަކީ ނައިޖީރިއާގެ ފިނޭންސް މިނިސްޓަރުކަމުގެ ދެ ދައުރާއި ފޮރިން މިިނިސްޓަރކަމުގެ މަޤާމު ވެސް ކުޑަ ދުވަސްކޮޅަކަށް ފުރުއްވާފައިވާ ބޭފުޅެކެވެ. އެކަމަނާއަކީ ވޯލްޑް ބޭންކްގައި ވެސް މުހިންމު ގިނަ މަސައްކަތްތަކެއް ކުރައްވާފައިވާ ބޭފުޅެކެވެ. އެގޮތުން ވޯލްޑް ބޭންކްގައި އިކޮނޮމިސްޓެއްގެ ގޮތުން ގިނަ ދުވަސްތަކެއް ވަންދެން ޚިދުމަތްކުރައްވާފައިވާއިރު މި ބޭންކްގެ ދެވަނައަށް އެންމެ އިސް މަޤާމުކަމުގައިވާ ބޭންކުގެ މެނޭޖިންގ ޑިރެކްޓަރކަމުގެ މަޤާމު ވެސް އޮކޮންޖޯ އިވެއެލާ ވަނީ ފުރުއްވާފައެވެ. އޮކޮންޖޯ އިވެއެލާ ވަނީ އިންޓަނޭޝަނަލް ވެކްސިންސް އެލަޔަންސް، ގަވީގެ ބޯޑުގެ ޗެއަރކަން ވެސް ކުރައްވާފައެވެ.

އޮކޮންޖޯ އިވެއެލާ އާއި އެންމެ ގާތުން ވާދަކުރައްވާފައިވަނީ ދެކުނު ކޮރެޔާގެ ޓްރޭޑް މިނިސްޓަރ ޔޫ މިޔުންގް ހީއެވެ. އޮކޮންޖޯ އިވެއެލާއާ ޚިލާފަށް ދެކުނު ކޮރެޔާގެ ޓްރޭޑް މިނިސްޓަރ ޔޫ މިޔުންގް ހީއަކީ ޓްރޭޑް ސްޕެޝަލިސްޓެކެވެ.

ޑަބްލިއުޓީއޯގެ ޑިރެކްޓަރ ޖެނެރަލްއަކަށް އޮކޮންޖޯ އިވެއެލާ ހަމަޖެއްސެވުމުން، އެކަމަނާ ވަނީ އެންމެ އިސްކަމެއް ދެއްވާނީ އެ ޖަމިއްޔާއިން ކޮވިޑްގެ ޙާލަތުން އަރައިގަތުމަށް ކުރާ މަސައްކަތް އިތުރުކޮށް ފަޤީރު ޤައުމުތަކާއި މުއްސަނދި ޤައުމުތަކާ ދެމެދުވާ ފަރަޤު ކުޑަކުރުމަށް މަސައްކަތްކުރައްވާނެ ކަމަށް ވިދާޅުވެފައެވެ. ޑަބްލިއުޓީއޯގެ ޑިރެކްޓަރ ޖެނެރަލްއަކަށް އޮކޮންޖޯ އިވެއެލާ ހަމަޖެއްސުމަށް ޑަބްލިއުޓީއޯގެ މެމްބަރު ޤައުމުތަކުން ރުހުން ދީފައިވާއިރު، ޗައިނާއާއެކު އޮތް ވިޔަފާރީގެ ހަނގުރާމަ ހޫނުވެ އެ ޖަމުޢިއްޔާއިން ވަކިވުމަށް އިންޒާރުދީފައިވާ އެމެރިކާގެ ކުރީގެ ރައީސް ޓްރަމްޕްގެ ސަރުކާރުން އޮކޮންޖޯ އިވެއެލާއަށް ވެސް ރުހުން ދީފައެއް ނުވެއެވެ.