ޗައިނާގެ ވޫހާނުން ޑިސެމްބަރު މަހު ކޮވިޑަށް ޕޮޒިޓިވްވި މީހުންގެ އަދަދު އޮޅުވާލައިފައިވާ ކަމުގެ ހެކިތަކެއް ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ)ގެ ޓީމަށް ފެނިފައިވާ ކަމަށް ރިޕޯޓްތަކުން ބުނެފިއެވެ.
ކޮވިޑް-19 އުފެދުނު ގޮތުގެ ތަފްސީލު ދިރާސާކުރުމަށް ޑަބްލިއުއެޗްއޯގެ ޓީމެއް ޗައިނާގެ ވޫހާނަށް ގޮސް ބެލި ބެލުމުން ކޮވިޑްގެ ކޭސްތަކުގެ އަދަދު އޮޅުވާލުމަށް މަސައްކަތް ކޮށްފައިވާ ކަމުގެ ހެކިތަކެއް ފެނިފައިވާ ކަމަށް ބޭރުގެ ބައެއް މީޑިއާތަކުން ވަނީ ރިޕޯޓުކޮށްފައެވެ.
ޗައިނާއަށްދިޔަ ޑަބްލިއުއެޗްއޯގެ ޓީމުން ވަނީ ވޫހާން ސިޓީގެ އެތައް ހާސް މީހެއްގެ ގައިން ބްލަޑް ސާމްޕަލް ނަގައިފައެވެ. އަދި އެ ސާމްޕަލްތައް ބެލުމުގެ ހުއްދަ މިހާތަނަށް ޗައިނާއިން ދީފައި ނުވާއިރު، ހުއްދަ ލިބުމާއެކު މި ސާމްޕަލްތައް ވެސް ޑަބްލިއުއެޗްއޯގެ ޓީމުން ބަލާނެއެވެ.
ޑަބްލިއުއެޗްއޯގެ އިންވެސްޓިގޭޝަނުގެ ލީޑް އިންވެސްޓިގޭޓަރ ޕީޓާ ބެން އެމްބެރެކް ވިދާޅުވީ ޗައިނާއިން ކޮވިޑް އެންމެ ފުރަތަމަ ފެނުމާއެކު، ވައިރަސް ނަގާފައިވަނީ ވަރަށް އާދައިގެ ގޮތަކަށް ކަމަށާއި، އެކަމުގެ ސަބަބުން ވައިރަސް މުޅި ސިޓީއަށް ފެތުރި ދުނިޔޭގެ އެކި ކަންކޮޅުތަކަށް ހަލުވިކަމާއެކު ފެތުރިގެންދިޔަ ކަމަށެވެ. އަދި މިކަމުގައި ޗައިނާގެ ސިއްހީ އިދާރާތަކުން ވަރަށް ބޮޑަށް އިހުމާލުވެފައިވާކަން ފާހަގަކުރެވޭ ކަމަށް ބެން ވިދާޅުވިއެވެ.
ޑަބްލިއުއެޗްއޯގެ ޓީމުން ޗައިނާގެ ވޫހާނަށް ވައިރަސް އުފެދުނު ގޮތް ދިރާސާ ކުރުމަށް ދިޔައީ ޖަނަވަރީ މަހުގައެވެ. އަދި ޗައިނާގައި ޑަބްލިއުއެޗްއޯގެ ޓީމުން ހަތަރު ހަފްތާ މަޑުކޮށް ވައިރަސް އުފެދުނު ގޮތުގެ ދިރާސާތައް ވަނީ ކޮށްފައެވެ. އަދި މި ދިރާސާތަކުގެ ރިޕޯޓްތައް މާރޗް މަހުގެ މެދުތެރޭ އާންމު ކުރުމަށް ވަނީ ނިންމާފައެވެ.
