ސްޕެނިޝް ލީގުގައި އާދީއްތަ ދުވަހުގެރޭ ވެލެންސިއާ ބަލިކޮށް ތާވަލުގެ ދެވަނައަށް އެންމެ ފަހުގެ ޗެމްޕިއަން ރެއާލް މެޑްރިޑް ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ރެއާލް މޮޅުވީ 2-0 ގެ ނަތީޖާއަކުންނެވެ.

މި މެޗުގައި ރެއާލުން މޮޅު ކުޅުމެއް ދެއްކިއިރު، އެ ޓީމުން ދެ ލަނޑުވެސް ޖަހާފައިވަނީ ފުރަތަމަ ހާފުގައެވެ. އެގޮތުން މެޗު ފަށައިގެން 12 ވަނަ މިނެޓުގައި ރެއާލުން ލީޑު ނެގިއިރު، މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ކަރިމް ބެންޒެމާއެވެ. އަދި ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް ޓޯނީ ކްރޫސް ވަނީ ލަނޑެއް ޖަހައި، ރެއާލަށް ލީޑު ފުޅާކޮށްދީފައެވެ.

މި މެޗުގެ ފުރަތަމަ ހާފުގައި ރެއާލުގެ ގޯލާ އަމާޒުކޮށް ވެލެންސިއާއަށް ހަމަލާއެއް އުފެއްދިފައި ނުވާއިރު، މުޅި މެޗުގައިވެސް ގޯލާ އަމާޒުކޮށް ވެލެންސިއާއަށް ފޮނުވާލެވުނީ އެންމެ ހަމަލާއެކެވެ. އެގޮތުން ދެވަނަ ހާފުގައި ވެލެންސިއާގެ މެކްސި ގޮމޭޒް ފޮނުވާލި ހަމަލާ، ރެއާލުގެ ގޯލްކީޕަރު ތުބައޫ ކޯޓުއާ ވަނީ ދިފާއުކޮށްފައެވެ.

މި މޮޅާއެކު ތާވަލުގެ ދެވަނައަށް ރެއާލް ޖެހިލިއިރު، އެ ޓީމަށް ކުޅުނު 23 މެޗުން ވަނީ 49 ޕޮއިންޓް ލިބިފައެވެ. އެއްވަނައިގައި އޮތް އެތުލެޓިކޯ މެޑްރިޑަށް 21 މެޗުން 54 ޕޮއިންޓް ލިބިފައިވާއިރު، ތިންވަނައިގައި އޮތް ބާސެލޯނާއަށް 22 މެޗުން ލިބިފައިވަނީ 46 ޕޮއިންޓެވެ. އަދި އާދީއްތަ ދުވަހުގެރޭ ރެއާލް އަތުން ބަލިވި ވެލެންސިއާ އޮތީ ތާވަލުގެ 12 ވަނައިގައި 23 މެޗުން 24 ޕޮއިންޓާއެކުއެވެ.