މިދިޔަ މަހުގެ 6 ވަނަ ދުވަހު އެމެރިކާގެ ގާނޫނު ހަދާ މަޖިލިސް ހުންނަ ކެޕިޓޮލްއަށް ވަދެގަނެ އެމެރިކާގެ ކުރީގެ ރައީސް ޑޮނަލްޑް ޓްރަމްޕުގެ ސަޕޯޓަރުން ހިންގި ކަންކަމުގެ ޒިންމާ އެމަނިކުފާނު ނަންގަވަން ޖެހިވަޑައިގަންނަވާނެ ކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
ޖޯ ބައިޑެން މިހެން ވިދާޅުވީ ޓްރަމްޕު ކުށްވެރިނުވާ ކަމަށް ސެނެޓުން ނިންމުމާ ގުޅިގެން ނެރުއްވި ބަޔާނެއްގައެވެ. ރައީސް ބައިޑެންގެ ބަޔާނުގައި ވިދާޅުވީ ގާނޫނު ހަދާ މަޖިލީހުގެ އިމާރާތް ދިފާއު ކުރަންއުޅުމުގެ ތެރޭގައި ނިޔާވި ފުލުސް އޮފިސަރު ބްރަޔަން ސިކްނިކްގެ މަގްބަރާއަށް މީގެ 2 ހަފްތާ ކުރިން އެމަނިކުފާނާއި އަނބިކަނބަލުން ޖިލް ޒިޔާރަތްކުރެއްވި ކަމަށެވެ.
އަދި ޖެނުއަރީ މަހުގެ 6 ވަނަ ދުވަހު އެމެރިކާގެ ޑިމޮކްރަސީއާ ދެކޮޅަށް ބަޔަކު ހިންގި ގަޑުބަޑުގެ ޒިންމާ ކުރީގެ ރައީސް ޑޮނަލްޑް ޓްރަމްޕު އުފުއްލަވަން ޖެހިވަޑައިގަންނަވާ ކަމަށް އަދި ކުށްވެރިވެސްވާ ކަމަށް ބައިޑަން ވިދާޅުވިއެވެ. އަދި ރިޕަބްލިކަނުންގެ ތެރެއިން ވެސް ހަތް މެންބަރަކު ހިމެނިވަޑައިގަންނަވާ ގޮތަށް ސެނެޓުގެ 57 މެންބަރަކު ވޯޓު ދެއްވާފައިވާ ކަމަށް ބައިޑަން ވިދާޅުވެފައިވެއެވެ. މި ޝަރީޢަތް ކުރިއަށް ގެންދަން ރިޕަބްލިކަނުން ވެސް ހިމެނޭ ގޮތުން ގާނޫނުހަދާ މަޖިލީހުގެ ތިރިގޭގެ އަޣުލަބިއްޔަތުން ކުރީގައި އޮތީ ނިންމައިފައެވެ. އެހެންނަމަވެސް ޓްރަމްޕު ކުށްވެރިކުރަން ބޭނުންވާ ވަރުގެ އަޣުލަބިއްޔަތެއް ވޯޓުގައި ނުލިބުނެވެ.
މިކަން ފާހަގަކުރައްވައި ބައިޑަން ވިދާޅުވީ އޭގެ މާނަޔަކީ ދައުވާތަކުގައި ސީރިއަސްކަން ނެތުމެއް ނޫން ކަމަށެވެ. އަދި ދައުވާތަކުގެ ސައްޙަކަން ނެތުމެއް ވެސް ނޫން ކަމަށެވެ. ކުށްވެރިނުވާ ކަމަށް މިއަދު ވޯޓު ދެއްވި މެންބަރުން ވެސް ޓްރަމްޕުގެ ޒިންމާ އެބައޮތްކަމާއި ގަޑުބަޑުގެ ޒިންމާ އުފުއްލަވަން ޖެހިވަޑައިގަންނަވާ ބޭފުޅަކީ ޓްރަމްޕު ކަމާއި، މަގާމުގެ މަސްއޫލިއްޔަތު އޭނާ އަދާ ނުކުރެއްވުމުގެ ކުށް ޓްރަމްޕުގެ އިސްތަށިފުޅުގައި އެޅޭކަން ގަބޫލުކުރައްވާ ކަމަށް ވިދާޅުވެފައެވެ. ގަޑުބަޑަކަށްވީ ޓްރަމްޕުގެ ސަބަބުން ކަމަށް ވެސް ގަބޫލުކުރައްވާ ކަމަށް ބައިޑަންގެ ބަޔާނުގައި ވިދާޅުވެފައިވެއެވެ.
މިއަދު އަޅުގަޑު ފިކުރު މިކުރަނީ އެދުވަހު ގާނޫނުހަދާ މަޖިލީހުގެ އިމާރާތާއި ގާނޫނުއަސާސީއާއި އެމެރިކާގެ ޑިމޮކްރަސީގެ ދިފާއުގައި ތެދުވި ހިތްވަރުގަދަ ބަތޮލުންނާ މެދުގައި. އެދުވަހު ހަށިގަނޑާއި ފުރާނަ ދެތަންވި މީހުންނާ މެދުގައި. އެދުވަހުގެ ބިރުވެރިކަމުން ފުރާނަ ސަލާމަތްވިޔަސް މުޅި އުމުރު ދުވަހަށް އެ ބިރުވެރި ހަނދާންތަކާއެކު އުޅެންޖެހިފައިވާ މީހުންނާމެދުގައި. ޑިމޮކްރެޓުންނާއި ރިޕަބްލިކަނުން ވެސް ހިމެނޭގޮތުން. ފަނޑިޔާރުންނާއި އިންތިޚާބާ ބެހޭ އޮފިޝަލުން ވެސް ޝާމިލްވާނޭ ގޮތުން. ގާނޫނުހަދާ މަޖިލީހަށް ރައްޔިތުން އިންތިހާބު ކޮށްފައިވާ މެންބަރުން ވެސް ހިމެނޭނެ ހެން،އެމެރިކާގެ ރައީސް ޖޯ ބައިޑަން
ބައިޑެންގެ ބަޔާނުގައި ބުނެފައިވަނީ ޖެނުއަރީ 6ގެ ހާދިސާއަކީ އެމެރިކާގެ ތާރީޚުގެ އަނދިރި ސަފުހާއެއް ކަމަށާއި، އެއީ އަނދިކަމުގެ ބާބެއް ކަމަށެވެ. އެހާދިސާއިން ކަށަވަރުވަނީ ޑިމޮކްރަސީގެ ނާޒުކްކަމާއި، އަބަދުވެސް ޑިމޮކްރަސީ ދިފާޢުކުރަން ޖެހޭކަން ކަމަށް ބައިޑަން ވިދާޅުވިއެވެ. އެކަމަށް އަބަދުވެސް ހޭލައި ފާރަވެރިވެގެން ތިބެންޖެހޭ ކަމަށާއި، ހަމަނުޖެހުންތަކާއި ހައްދުފަހަނަޅައި ދިއުމަށް އެމެރިކާގެ މުޖުތަމަޢުން ޖާގައެއް ނެތް ކަމަށް ބައިޑަން ވިދާޅުވިއެވެ. އަދި ތެދު ދިފާއުކޮށް ދޮގު ބަލިކުރުމަކީ އެމެރިކާގެ ކޮންމެ ރައްޔިތެއްގެ ވެސް ޒިންމާއެއް ކަމަށާއި، ޚާއްސަކޮށް ލީޑަރުންގެ ޒިންމާއެއް ކަމަށް ބައިޑަން ވިދާޅުވިއެވެ.
އެންމެފަހުން ހިނގައިދިޔަ ނާތަހުޒީބު އަދި ހުތުރުވެގެންވާ ކުރިމަތިލުންފަދަ ކަންކަން ކުރިއަށްއޮތްތަނުގައި ވެސް ހުއްޓުވޭނީ އެކަމަށް ޖާގަނުދީ ގައުމުގެ ޒަޚަމްތައް ފަސޭހަވެ ފިލައިގެންދާނީ މިމަގުން ޒިންމާ އަދާކުރެވިގެން ކަމަށް ބައިޑަން ވިދާޅުވިއެވެ. އަދި އެންމެންގެ ވެސް އަޒުމަކަށް ހަދަންވީ މި އަމާޒު ކަމަށާއި، އެންމެން ގުޅިގެން ކުރިއަށްދާންވީ އަމާޒަކީ މިއީ ކަމަށް ބައިޑަން ވިދާޅުވިއެވެ.
