ރާއްޖެއިން އިތުރު 209 މީހަކު ކޮވިޑް-19 އަށް ޕޮޒިޓިވްވެއްޖެއެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އާންމު ކޮށްފައިވާ ފަހުގެ ތަފާސްހިސާބުތައް ދައްކާ ގޮތުން ރާއްޖެއިން އިތުރު 209 މީހަކު ޕޮޒިޓިވްވެފައިވާއިރު، އޭގެ ތެރޭގައި މާލޭ ސަރަޙައްދުން ޕޮޒިޓިވްވި 101 މީހަކު ހިމެނެއެވެ. އަދި ރަށްރަށުން ޕޮޒިޓިވްވެފައިވާ 15 މީހަކާއި، ރިސޯޓުތަކުން ޕޮޒިޓިވްވެފައިވާ 6 މީހެއްގެ އިތުރުން، ސަފާރީތަކާއި ޔޮޓުފަހަރުތަކުން ޕޮޒިޓިވްވި 14 މީހެއް ހިމެނެއެވެ.

އޭގެ އިތުރުން، ސިނާއީ މަސައްކަތް ކުރާ ރަށްރަށުން ޕޮޒިޓިވްވި 73 މީހެއްވެސް އޭގެ ތެރޭގައި ހިމެނެއެވެ. އަދި ރާއްޖޭގެ ކޮވިޑް ކޭސްތަކުގެ ޖުމުލަ އަދަދަކީ 17،716 އެވެ. އެއާއެކު، މިވަގުތުގެ އެކްޓިވް ކޭސްތަކުގެ އަދަދުވެސް މިވަނީ 2360ށް އަރާފައެވެ. އޭގެ ތެރެއިންވެސް 190 މީހަކަށް އެޑްމިޓް ކޮށްގެން ފަރުވާދެމުން ދާ ކަމަށް އެޗްޕީއޭއިން މައުލޫމާތު ދެއެވެ.

ފާއިތުވި 24 ގަޑިއިރު ރާއްޖެއިން ކޮވިޑަށް ޓެސްޓު ކުރުމަށް ނަގާފައިވަނީ 4006 ސާމްޕަލެކެވެ. އެއާއެކު ރާއްޖެއިން ކޮވިޑަށް ޓެސްޓު ކުރުމަށް ނެގި ސާމްޕަލްތަކުގެ ޖުމުލަ އަދަދު ވަނީ 457،673ށް އަރާފައެވެ.

ރާއްޖޭގައި ކޮވިޑް-19ގެ ހާލަތު ގޯސްވަމުން ދާއިރު ހޮނިހިރު ދުވަހު ކޮވިޑް ޖެހިގެން 2 މީހަކު ވަނީ ނިޔާވެފައެވެ. އެގޮތުން ހޮސްޕިޓަލަށް ގެންދިޔަ އިރުވެސް ނިޔާވެފައިވާ މީހަކު ކޮވިޑަށް ޕޮޒިޓިވް ވެފައިވާކަން އެޗްޕީއިން ވަނީ ހާމަ ކޮށްފައެވެ. ހެލްތް ޕްރޮޓެކްޝަން އޭޖެންސީ (އެޗްޕީއޭ)ން ބުނީ ނިޔާވެފައި ވަނީ ހާލު ދެރަވެގެން އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ އިމަރޖެންސީ ރޫމަށް ރޭ ދަންވަރު 03:17 އެހާކަންހާއިރު ގެންދިޔަ އުމުރުން 59 އަހަރުގެ ދިވެހި އަންހެނެއް ކަމަށެވެ. އެއާއެކު، ރާއްޖެއިން ކޮވިޑް ޖެހިގެން ނިޔާވި މީހުންގެ ޖުމުލަ އަދަދު މިވަނީ 58ށް އަރާފައެވެ.