އިނގިރޭސި ޕްރިމިއާ ލީގުގައި ހޮނިހިރު ދުވަހުގެ ހަވީރު ކުޅުނު މެޗުން ލެސްޓާ ސިޓީން ފަހަތުން އަރައި އެންމެ ފަހުގެ ޗެމްޕިއަން ލިވަޕޫލް ބަލިކޮށްފިއެވެ.

އަމިއްލަ ދަނޑުގައި ކުޅުނު މެޗުން ލެސްޓާ މޮޅުވީ 3-1 ގެ ނަތީޖާއަކުންނެވެ. މި މެޗުން ލިވަޕޫލް ބަލިވިއިރު، ލީގުގައި އެންމެ ފަހުން ކުޅުނު ތިން މެޗުންވެސް އެ ޓީމު ވަނީ ބަލިވެފައެވެ.

ހޮނިހިރު ދުވަހުގެ ހަވީރު ކުޅުނު މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗުގެ ކުރީކޮޅު ލިވަޕޫލުގެ ދެ ފޯވާޑުން ކަމަށްވާ ސަޑިއޯ މާނޭ އާއި މުޙައްމަދު ސަލާހަށް ވަނީ ލީޑު ނެގުމަށް ރަނގަޅު ފުރުސަތުތަކެއް ލިބި ބޭކާރުވެފައެވެ. އޭގެ ފަހުން މެޗުގެ 28 ވަނަ މިނެޓުގައި ލިވަޕޫލުގެ ފޯވާޑް ރޮބާޓޯ ފިރްމީނޯއަށްވެސް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ބޯޅަ ލެސްޓާގެ ގޯލްކީޕަރު ޕީޓާ ޝްމައިކަލް ވަނީ ދިފާއުކޮށްފައެވެ.

އޭގެ ފަހުން މި ހާފުގައި އެންމެ ހުސް ފުރުސަތުތަކެއް ލިބިގެންދިޔައީ ލެސްޓާގެ ފޯވާޑް ޖެމީ ވާޑިއަށެވެ. އެގޮތުން ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް ވާޑީއަށް ލީޑު ނެގުމަށް ރަނގަޅު ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ.

މި މެޗުގެ ދެވަނަ ހާފު ފަށައިގެން ލިވަޕޫލުން ކުޅުން ރަނގަޅުކުރިއިރު، މެޗުގެ 56 ވަނަ މިނެޓުގައި އެ ޓީމުގެ ޑިފެންޑަރު ޓްރެންޓް އަލެކްސަންޑަ-އާނޯލްޑް ފޮނުވާލި ހިލޭ ޖެހުމެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ. އެކަމަކު އޭގެ ފަހުން މެޗުގެ 67 ވަނަ މިނެޓުގައި ފިރްމީނޯ ދިން ޕާހަކުން ސަލާހު ވަނީ ލަނޑެއް ޖަހައި ލިވަޕޫލަށް ލީޑު ނަގައިދީފައެވެ.

މި މެޗުގައި ލެސްޓާއިން އެ ޓީމު ކޮޅަށް ނަތީޖާ އަނބުރާލީ ހަ މިނެޓު ތެރޭ ޖެހި ތިން ލަނޑާއެކުއެވެ. އެގޮތުން މެޗުގެ 79 ވަނަ މިނެޓުގައި ހިލޭ ޖެހުމަކުން ޖޭމްސް މެޑިސަން ލެސްޓާއަށް ނަތީޖާ އެއްވަރުކޮށްދިންއިރު، އޭގެ ދެ މިނެޓު ފަހުން ލިވަޕޫލުގެ ގޯލްކީޕަރު އެލިސަން ބެކާ ހެދި ގޯހެއްގެ ފައިދާ ނަގައި ވާޑީ ވަނީ ލެސްޓާ ކޮޅަށް ނަތީޖާ އަނބުރާލާފައެވެ. އަދި އޭގެ ހަތަރު މިނެޓު ފަހުން ލެސްޓާއަށް ލީޑު ފުޅާކޮށްދިނީ ހާވީ ބާންސްއެވެ.

މި މޮޅާއެކު ތާވަލުގެ ދެވަނައަށް ލެސްޓާ ޖެހިލިއިރު، އެ ޓީމަށް ވަނީ ކުޅުނު 24 މެޗުން 46 ޕޮއިންޓް ލިބިފައެވެ. އަދި ތާވަލުގެ ހަތަރުވަނައިގައި އޮތް ލިވަޕޫލަށް 24 މެޗުން ލިބިފައިވަނީ 40 ޕޮއިންޓެވެ.