ރިޔާސީ ދައުރު ނިމުމުގެ ކުރިން ގުއަންޓަނާމޯބޭ ޖަލު ބަންދުކުރައްވާނެކަމުގެ އިޝާރާތެއް އެމެރިކާގެ ރައީސް ޖޯ ބައިޑެއް ދެއްވައިފިއެވެ.

ގުއަންޓަނާމޯބޭ ޖަލަކީ ޓެރަރިޒަމްގެ ތުހުމަތުގައި މީހުން ބަންދުކުރާ ޖަލެކެވެ. އަދި އެތަނަކީ ގައިދީންނަށް އަނިޔާވެރި އެތައް ކަމެއް ކޮށްފައިވާ ރިކޯޑް އޮންނަ ޖަލެކެވެ. ގުއަންޓަނާމޯބޭ ޖަލު ބަންދުކުރުމަކީ އެމެރިކާގެ ކުރީގެ ރައީސް ބަރަކް އޮބާމާގެ ވެރިކަމުގައި އެމަނިކުފާނު ވެވަޑައިގެންނެވި ވައުދުފުޅެކެވެ. އެއިރު ނައިބް ރައީސްކަމުގައި ހުންނެވީ ޖޯ ބައިޑެންއެވެ. ހުކުރު ދުވަހު ވައިޓްހައުސްއިން ބުނެފައިވަނީ މިކަން ކުރުމަށް ރައީސް ބައިޑެން ނިންމަވާފައިވާ އިރު، މިއީ ރައީސް އޮބާމާގެ ވެރިކަމުގައި ވެވަޑައިގެންނެވި ވައުދުފުޅެއް ކަމަށެވެ.

ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވައިޓް ހައުސްގެ ސްޕޯކްސްވުމަން ޖެން ސަކީ ވިދާޅުވީ ބައިޑަންގެ ރިޔާސީ ދައުރުގެ ތެރޭގައި ކިއުބާގައި ހުންނަ ގުއަންޓަނާމޯބޭ ބަންދުކުރެވިދާނެ ކަމަށެވެ. އޭނާ ވިދާޅުވީ މިކަމާއި ގުޅިގެން ނެޝަނަލް ސެކިއުރިޓީ ކައުންސިލާ ވެސް މަޝްވަރާ ކުރައްވަމުން ގެންދަވާ ކަމަށެވެ.

2016 ވަނަ އަހަރު ރިޔާސީ ކެމްޕެއިންގެ ތެރެއިން ކުރީގެ ރައީސް ޑޮނަލްޑް ޓްރަމްޕް ވަނީ ގުއަންޓަނާމޯބޭ ޖަލު ހުޅުވާފައި ބަހައްޓާނެ ކަމަށް ވިދާޅުވެފައެވެ. އަދި އެތަން ފުރާލާނީ ގޯސް މީހުން ލައިގެން ކަމަށް ވިދާޅުވެފައިވާ އިރު، ވެރިކަމަށް އައުމަށް ފަހު ކުރީގެ ސަރުކާރުން އެކަން އެގޮތަށް ކުރިއެވެ.