ޗައިނާގައި ގައުމީ ސަލާމަށް އިހުތިރާމް ކުޑަކޮށްފި ނަމަ ތިން އަހަަރުގެ ޖަލު ހުކުމެއް

ގައުމީ ސަލާމަށް އިހުތިރާމް ކުޑަކުރުމަކީ ގިނަވެގެން ތިން އަހަރަށް ޖަލަށް ލެވިދާނެ ޖިނާއީ ކުށެއް ކަމަށް ޗައިނާގެ ގާނޫނުހަދާ މަޖިލީހުން ފާސްކޮށްފިއެވެ.

ކޮމިއުނިސްޓް ޕާޓީގެ މެމްބަރުން ކޮންޓްރޯލްކުރާ، ނޭޝަނަލް ޕީޕަލްސް ކޮންގްރެސްއިން ހޮނިހިރު ދުވަހު ފާސްކުރި އިސްލާހުގައިވާ ގޮތުން އެފަދަ ކުށެއް ކުރި މީހަކު ގިނަވެގެން ތިން އަހަރަށް ޖަލަށް ލެވިދާނެއެވެ.

ގާނޫނުހަދާ މަޖިލީހުގެ މެމްބަރުން ގެންދަވަނީ މިފަދަ ގާނޫނުތައް، ވަކިން އޮންނަ ހޮންކޮންގ އަދި މަކާއޯގައި ވެސް ތަންފީޒުކުރަން މަސައްކަތް ކުރަމުންނެވެ.

މިއީ ޒަމާނީ ޑިމޮކްރަސީގެ ރޫހު އަށަގަންނަމުން އަންނަ ތަންތަނުގައި ގައުމިއްޔަތާ ދެކޮޅު ހަރަކާތްތައް އިތުރުވާ ކަމަށް ބުނެ ޗައިނާއިން އަޅަމުންދާ ފިޔަވަޅުތަކެކެވެ.

ބެއިޖިންގެ މައި ސަރުކާރަށް ވަފާތެރި ފަރާތްތަކުގެ ކޮންޓްރޯލް އޮންނަ ހޮންކޮންގގައި ވަނީ ގައުމީ ސަލާމުގެ ގާނޫނު އިތުރުން މިފަދަ ގާނޫނުތައް ތަންފީޒުކުރަން ފަށާފައެވެ.

ހޮންކޮންގ އާއި މަކާއޯގައި ޑެމޮކްރަސީއަށް ގޮވާލާ ފަރާތްތަކަށް ވަނީ ޚިޔާލު ފާޅުކުރުމުގެ މިނިވަންކަން އިތުރަށް ހަނިކުރުމަށް މިފަދަ ގާނޫނުތައް ބޭނުންކޮށްފާނެ ކަމުގެ ބިރު ހީވެފައެވެ.

ގައުމީ ސަލާމަށް އިހުތިރާމް ކުޑަކުރުމުގެ ބައެއް އަމަލުތައް ހިންގާފައިވާއިރު މިދިޔަ މަހު ފުޓްބޯޅަ މެޗެއްގައި ވެސް ވަނީ އެފަދަ އަމަލެއް ހިންގާފައެވެ. މެލޭޝިއާއާ ދެކޮޅަށް ކުޅުނު ކޮލިފައިން މެޗެއް ފެށުމުގެ ކުރިން ގައުމީ ސަލާން ކީއިރު އެ ގައުމުގެ ސަޕޯޓަރުންގެ ތެރެއިން އެއްބަޔަކު އަޑުލެއްވިއިރު އަނެއް ބަޔަކު ތިބީ ފުރަގަހަށް އެނބުރިއެވެ.

ސައުތު ޗައިނާ މޯނިންގ ޕޯސްޓް އިން ކޮށްފައިވާ ސުވާލަކަށް ޖަވާބުދެއްވަމުން ހޮންގކޮންގގެ ޑެޕިއުޓީ އަދި އެގްޒެކްޓިވް ކައުންސިލަރ ވިދާޅުވީ "ގާނޫނަށް އަމަލުކުރަން ފެށުމާ އެކު ކޮޅަށް ތެދުވެ އިހުތިރާމް އަދާކުރަން ޖެހޭނެ،" ކަމަށެވެ.

"އެކަކު އެހި ހިނގަމުންދާ މީހަކު ހުއްޓެން ޖެހޭނެ ހޭ. އާނ ހަމަ ހުއްޓެން ޖެހޭނެ"

ގާނޫނަށް މި އިސްލާހު ގެނެވިފައި މިވަނީ ބާރުގަދަ ފާގަތި ގައުމަކަށް ޗައިނާ ހެދުމުގެ ތަސައްވުރާ އެކު ފަސްއަހަރުގެ ދެވަނަ ދައުރަކަށް ކޮމިއުނިސްޓް ޕާޓީގެ ލީޑަރުގެ މަގާމަށް ޝީ ޖިން ޕިން އައްޔަން ކުރެވިފައި ވަނިކޮށެވެ.

އިނގިރޭސިންގެ އަޅުވެތިކަމުގައި ކުރިން އޮތް ހޮންގ ކޮންގ 1997ވަނަ އަހަރު ޗައިނާގެ ބާރުގެ ދަށަށް ގެންގޮސްފައި ވަނީ ހޮންގ ކޮން އަމިއްލަ މިނިވަންކަމާ އެކު އެ ސަރަހައްދު ވަކި ސަރުކާރަކާއި މިނިވަން ޝަރުއީ ނިޒާމެއްގެ ދަށުން އެއްގައުމެއްގައި ދެ ނިޒާމެއްގެ ދަށުން ވެރިކަން ހިންގުމުގެ ފުރުސަތު ދޭނެ ކަމަށް ބުނެއެވެ. ނަމަވެސް ޗައިނާއިން ހޮންގ ކޮންގގައި ވެރިކަން ހިންގަމުން ގެންދާތާ 20 އަހަރުވެފައިވާއިރު ބެއިޖިންގގެ ލީޑަރުންނާއި ޑިމޮކްރަސީއަށް ގޮވާލަމުންދާ ޒުވާން ޖީލާ މެދު ޚިޔާލު ތަފާތުވުން ދަނީ ބޮޑުވަމުންނެވެ. އޭގެ ތެރެއިން ބައެއް ފަރާތްތަކުން ދަނީ އިގްތިސާދީ ހަބެއްގެ ގޮތުގައި އޮތް ހޮންގކޮންގ ޗައިނާއިން ވަކިވުމަށް ގޮވާލަމުންނެވެ.