18 އަހަރާއި 55 އަހަރާއި ދެމެދުގެ މީހުންނަށް ވެކްސިން ދެނީ
12 ފެބުރުއަރީ 2021 | ހުކުރު 23:36އުމުރުން 18 އަހަރާއި 55 އަހަރާ ދެމެދުގެ މީހުންގެ އިތުރުން 55 އަހަރުން މަތީގެ މީހުންނަށްވެސް ހޮނިހިރު ދުވަހު ވެކްސިން ދޭނެ
މީހަކަށް ވެކްސިން ޖަހަނީ
މާލެ ސަރަހައްދުގައި ދިރިއުޅޭ މީހުންގެ ތެރެއިން އުމުރުން 18 އަހަރާއި 55 އަހަރާ ދެމެދުގެ މީހުންގެ ތެރެއިން ދިގު މުއްދަތަކަށް ބޭސް ބޭނުންކުރާ ފަރާތްތަކަށް ވެކްސިންދިނުމަށް ފެބްރުއަރީ 13 ވާ ހޮނިހިރު ދުވަހު ފަށާނެކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެކަމާއި ގުޅިގެން އެޗްޕީއޭއިން ބުނީ އުމުރުން 18 އަހަރާއި 55 އަހަރާ ދެމެދުގެ މީހުންގެ އިތުރުން 55 އަހަރުން މަތީގެ މީހުންނަށްވެސް ހޮނިހިރު ދުވަހު ވެކްސިން ދޭނެކަމަށެވެ. އެގޮތުން ވެކްސިން ދިނުން ކުރިޔަށްދާނީ ސޯޝަލް ސެންޓަރާއި އިސްލާމިކް މަރުކަޒާއި ވިލިމާލެ ޒުވާނުންގެ މަރުކަޒު އަދި ހުޅުމާލެ ވެކްސިނޭޝަން ސެންޓަރުގައެވެ. މިއިން ކޮންމެ ތަނެއްގައިވެސް ވިލިމާލެ ޒުވާނުން މަރުކަޒު ފިޔަވައި ވެކްސިން ދޭނީ ހެނދުނު 9ން ފެށިގެން ހަވީރު 5 ޖަހަންދެންނެވެ. ވިލިމާލެ ޒުވާނުންގެ މަރުކަޒުގައި ވެކްސިންދޭނީ ހެނދުނު 9ން މެންދުރު 1 ޖަހަންދެންނެވެ.
ވެކްސިން ޖަހަންދާއިރު ސަމާލުކަންދޭން ޖެހޭ ވަކި ކަންތައްތަކެއް އެޗްޕީއޭއިން ވަނީ ބަޔާންކޮށްފައެވެ. އޭގެތެރޭގައި ހިމެނެނީ އައިޑީކާޑު ނުވަތަ ކާކުކަން އިނގޭ ރަސްމީ ލިޔުމެއް ގެންދިޔުމާއި ކޮވިޑް-19ގެ އެެއްވެސް އަލާމާތެއް ނެތުމާއި ކަރަންޓީންގައި ހުރި މީހަކަށް ނުވުމުގެ އިތުރުން ގަޔަށް ދޫ، ފަސޭހައިން ވެކްސިންޖަހާތަން (ކޮނޑު) ދެއްކޭނެ ހެދުމެއް ލުމެވެ. އަދި ވެކްސިން ޖަހަންދާއިރު ރަނގަޅަށް ކައިގެން ހުރުމާއި އަމިއްލަ ފެންފުޅިއެއް ގެންދިޔުމާއި ވެކްސިން ޖަހަންދާއިރު އެކުގައި އެކަަކަށްވުރެ ގިނަ މީހުން ނުގެންދިޔުމާއި ބޭނުންކުރަމުންދާ ބޭހެއްވާނަމަ ބޭހުގެ މައުލޫމާތު ގެންދިޔުން ވެސް މުހިންމު ކަމަށް އެޗްޕީއޭ އިން ވަނީ ބުނެފައެވެ.
ރާއްޖޭގައި ކޮވިޑް ވެކްސިނޭޝަން ޕްރޮގްރާމް ފަށާފައިވަނީ މިފެބްރުއަރީ މަހުގެ 1 ވަނަ ދުވަހުއެވެ. މިހާތަނަށް އައިއިރު ރާއްޖޭގެ 27،367 މީހުންނަށް ވަނީ ވެކްސިން ދީފައެވެ. އޭގެތެރޭގައި ހިމެނެނީ މާލެ ސަރަހައްދުގެ 22،456 މީހުންނާއި އަތޮޅުތަކުގެ 4911 މީހުންނެވެ. އެޗްޕީއޭއިން ބުނީ ފާއިތުވި 24 ގަޑިއިރު ވެކްސިން ޖަހަން ދިޔަ މީހުން އެހެން ދުވަސްތަކާއި އަޅާބަލާއިރު ނިސްބަތުން މަދުކަމަށެވެ.
