މިއަދު ވެކްސިން ޖަހަންދިޔަ މީހުން ނިސްބަތުން ދަށް
12 ފެބުރުއަރީ 2021 | ހުކުރު 17:30މިހާތަނަށް 27،367 މީހުން ވަނީ ވެކްސިން ޖަހާފައި
ރާއްޖޭގައި ޖަހާ ކޮވިޝީލްޑް ވެކްސިން
ކޮވިޑް-19 ވެކްސިނޭޝަން ޕްރޮގްރާމް ރާއްޖޭގައި ފަށައި ފެބްރުއަރީ 11 ވަނަ ދުވަހުގެ ހަވީރު 6:00ން 12 ވަނަ ދުވަހުގެ ހަވީރު 6:00ށް ވެކްސިން ޖަހަން ދިޔަ މީހުންގެ އަދަދު ނިސްބަތުން ދަށްވެއްޖެއެވެ.
ހެލްތު ޕްރޮޓެކްޝަން އެޖެންސީން ހާމަކޮށްފައިވާ ގޮތުން 24 ގަޑިއިރުގެ ތެރޭގައި ވެކްސިން ޖަހަން ދިޔައީ 1،902 މީހުންނެވެ. އެއީ މާލެ ސަރަހައްދުން ވެކްސިން ޖަހަން ދިޔަ 1،496 މީހުންނާއި އަތޮޅުތެރެއިން ވެކްސިން ޖެހި 406 މީހުންނެވެ.
ހެލްތު އެމަޖެންސީ އޮޕަރޭޝަން ސެންޓަރުން ވަނީ ބުރާސްފަތި ދުވަހު ވެކްސިން ޖަހަން އާންމުންގެ ފަރާތުން ލިބުނު ތަރުހީބު މަދުކަން ފާހަގަކޮށްފައެވެ.
މިހާތަނަށް އައިއިރު ޖުމްލަ 27،367 މީހުން ވަނީ ވެކްސިން ޖަހާފައެވެ. އެއީ މާލެ ސަރަހައްދުން ވެކްސިން ޖެހި 22،456 މީހުންނާއި އަތޮޅުތެރެއިން ވެކްސިން ޖެހި 4،911 މީހުންނެވެ.
ރާއްޖެއަށް ކޮވިޝީލްޑް ވެކްސިންގެ އެއްލައްކަ ޑޯޒް ލިބިފައިވާއިރު، މިއީ 50،000 މީހުންނަށް ޖެހޭނެ ވެކްސިނެވެ. ވެކްސިން ދިނުމުގެ ފުރަތަމަ ފޭސްގެ ދަށުން ފްރަންޓްލައިންގައި މަސައްކަތްކުރާ މީހުންނާއި އުމުރުން ދުވަސްވީ މީހުންނަށް ހާއްސަ ސަމާލުކަމެއްދެއެވެ.
ރާއްޖޭގެ ކޮވިޑް-19ގެ ހާލަތު ނާޒުކުވެފައިވާ މިދަނޑިވަޅުގައި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އަޅައި ވެކްސިން ޖެހުމަށް ހާއްސަ ސަމާލުކަމެއް ދިނުމަށް އެޗްއީއޯސީން ދަނީ އިލްތިމާސްކުރަމުންނެވެ. އެވެކްސިނެއް ހޯދުމަށް ގިނަ ގައުމުތަކަކުން މަސައްކަތްކުރާ ވެކްސިނެއް ރާއްޖެއަށް ހަދިޔާކޮށްފައިވާއިރު، ވެކްސިނާއި ގުޅޭގޮތުން ރައްޔިތުންގެ މެދުގައި ނުތަނަވަސްކަން އުފެދޭގޮތަށް މައުލޫމާތު ހިއްސާނުކުރުމަށް ކަމާގުޅުންހުރި ފަރާތްތަކުން ދަނީ އިލްތިމާސްކުރަމުންނެވެ.
