ޑރ ނަޒްލާގެ އިންޒާރު: މިއީ މިހާތަނަށް ފެނުނު އެންމެ ނުރައްކާބޮޑު ކޮވިޑް ވޭވް، ހޮސްޕިޓަލުގެ އެނދުތައްވެސް ފުރެނީ!
މިވަގުތު ބާކީ ހުރީ މަދު އެނދުތަކެއް
ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ)ގެ ތަރުޖަމާނު ޑޮކްޓަރ ނަޒްލާ ރަފީޤު
ރާއްޖެއިން މިހާރު ފެންނަމުންދާ ކޮވިޑް ކޭސްތަކަށް ބަލާއިރު، މިއީ މިހާތަނަށް ރާއްޖެއަށް ކުރިމަތިވި އެންމެ ނުރައްކާތެރި ކޮވިޑް-19 ވޭވްކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ)ގެ ތަރުޖަމާނު ޑޮކްޓަރ ނަޒްލާ ރަފީޤު ވިދާޅުވެއްޖެއެވެ.
ހުކުރު ދުވަހު ޑރ ނަޒްލާ ކުރެއްވި ޓްވީޓެއްގައި ވިދާޅުވީ، މިހާރު ފެންނަމުންދާ ވޭވްއަކީ މިހާތަނަށް ރާއްޖެއަށް ފެނުނު އެންމެ ނުރައްކާތެރި ކޮވިޑް ވޭވްކަން ޔަޤީންކަމާއެކު ވިދާޅުވެވިދާނެ ކަމަށެވެ. އެގޮތުން ހޮސްޕިޓަލުތަކުގައި އެނދުމަތި ކުރެވޭ މީހުންގެ އަދަދުތައް ކަންބޮޑުވާ މިންވަރަށް އިތުރުވެފައިވާއިރު، ހޮސްޕިޓަލުތަކުގެ ބެޑް ކެޕޭސިޓީ ފުރެމުންދާކަން ޑރ ނަޒްލާ ފާހަގަ ކުރެއްވިއެވެ. އަދި މިވަގުތު ބާކީ ހުރީ މަދު އެނދުތަކެއްކަަމަށް ޑރ ނަޒްލާ ވިދާޅުވިއެވެ.
ޑރ ނަޒްލާ ވަނީ ރާއްޖެ އޮތީ "ކްރިޓިކަލް" ޙާލަތެއްގައިކަން ބަޔާން ކުރައްވާފައެވެ. އަދި ވައިރަސް ކޮންޓްރޯލް ކުރުމުގައި އެއްބާރުލުން ދެއްވުމަށް އިލްތިމާސް ކުރައްވަމުން ޑރ ނަޒްލާ ވަނީ އިހަށް ނުވި ރައްކަލެއް ފަހުން ނުވެވޭނެކަން ހަނދުމަ ކޮށްދީފައެވެ.
ޑރ ނަޒްލާ އިތުރަށް ވިދާޅުވީ، ކޮވިޑުން ރައްކާތެރިވުމަށް އެޅިދާނެ ފިޔަވަޅުތައް އިންތިހާއަށް ފަސޭހަ ކަމަށެވެ. އެގޮތުން މާސްކް އެޅުމާއި، އިޖުތިމާއީ ގައިދުރުކަން ފަދަ ކަންކަމަށް ސަމާލުވުމަށް ޑރ ނަޒްލާ ވަނީ އިލްތިމާސް ކުރައްވާފައެވެ. އަދި ކޮންމެ މީހަކުވެސް އެމީހެއްގެ އަމިއްލަ ނަފްސާއި އެހެން މީހުން ރައްކާތެރި ކުރުމަށް ގޮވާލައްވާފައިވެއެވެ.
ރާއްޖެއިން މިހާރު ފެންނަމުންދާ ކޮވިޑް ކޭސްތައް އުޅެނީ 100ން މަތީގައެވެ. އަދި ކޮންމެ ދުވަހަކުވެސް މާލެ ސަރަޙައްދުން އެތައް ބަޔަކު ޕޮޒިޓިވްވަމުންދާއިރު، އަތޮޅު ތެރެއަށްވެސް މިވަނީ ބަލި ފެތުރިފައެވެ. އަދި މާލެ ސަރަޙައްދުގެ އިތުރުން، އައްޑޫ ސިޓީއާއި ފުވައްމުލަކު ސިޓީގައިވެސް މިވަނީ ކާފިއު ހިންގަން ފަށާފައެވެ.
