އަލީ ވަހީދު ފުރުވާލި މައްސަލަގައި ކަންހިނގާފައިވާ ގޮތް ބަލައިދިނުމަށް މަޖިލީހުގެ އަންހެން މެމްބަރުން ހުށަހަޅުއްވައިފި
11 ފެބުރުއަރީ 2021 | ބުރާސްފަތި 15:15މިމައްސަލާގައި ކަން ހިނގާފައިވާ ގޮތުގެ ތަފްސީލު ބައްލަވައިދެއްވުމަށް އެދޭކަމަށް ސިޓީގައިވޭ
ރައްޔިތުންގެ މަޖިލީހުގައި ހިމެނިވަޑައިގަންނަވާ އަންހެން މެމްބަރުން
ޓޫރިޒަމް މިނިސްޓަރަކަށް ހުންނަވައި އެތަނުގެ އަންހެން މުވައްޒަފުންތަކަކަށް ޖިންސީ ގޯނާކުރި މައްސަލައިގައި ދައުވާކޮށްފައިވާ އަލީ ވަހީދު ބޭރަށް ފުރުވާލުމުގައި ޕްރޮސެކިޔުޓަރ ޖެނެރަލް އޮފީހުން އަމަލުކޮށްފައިވާގޮތާއި މިމައްސަލާގައި ކަން ހިނގާފައިވާ ގޮތުގެ ތަފްސީލު ބައްލަވައިދެއްވުން އެދި ރައްޔިތުންގެ މަޖިލީހުގައި ހިމެނިވަޑައިގަންނަވާ އަންހެން މެމްބަރުން އެދިވަޑައިގެންފިއެވެ.
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އެޑްރެސްކުރައްވާ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރ އީވާ އަބްދުﷲ އާއި ތުޅާދޫ ދާއިރާގެ މެމްބަރ ހިސާން ހުސައިން އާއި އައްޑޫމީދޫ ދާއިރާގެ މެމްބަރ ރޮޒައިނާ އާދަމް އަދި ހިންނަވަރު ދާއިރާގެ މެމްބަރ ޖީހާން މަހުމޫދު ސޮއިކުރައްވާފައިވާ މިސިޓީގައި ވަނީ މިކަންކަން ބެލުމަށް ޖުޑީޝަރީ ކޮމިޓީއަށް މިމައްސަލަ ފޮނުއްވައިދެއްވުމަށް އެދި ވަޑައިގަންނަވާފައެވެ.
މިސިޓީގައި އެމެމްބަރުން ވިދާޅުވެފައިވަނީ ޖިންސީ އަނިޔާކުރުމާއި ރޭޕްކުރަން އުޅުމުގެ 7 ދައުވާއެއް ކޯޓުގައި އުފުލާފައިވާ ކުރީގެ މިނިސްޓަރ އޮފް ޓޫރިޒަމް އަލީ ވަހީދުގެ މައްޗަށް ކްރިމިނަލް ކޯޓުން ނެރެފައިވާ ފުރުން މަނާކުރުމުގެ އަމުރު ބާތިލްކޮށް ދައުވާ ލިބޭ ފަރާތަށް ރާއްޖެއިން ބޭރަށް ފުރައިގެން ދިއުމުގެ ހުއްދަ ކްރިމިނަލް ކޯޓުން ދީފައިވާ މައްސަލައިގައި ފުރުން މަނާކުރުމުގެ އަމުރު ބާތިލްކުރުމަށް ކޯޓުން ނިންމި އަޑުއެހުމުގައި ޖިންސީކުށުގެ ގިނަ ސީރިއަސް ދައުވާތަކެއް އުފުލާފައިވާ ފަރާތެއް ރާއްޖެއިން ބޭރަށް ފުރައިގެން ދިޔުމަށް ޕީޖީގެ ފަރާތުން އިއުތިރާޒުކޮށްފައިނުވާކަމަށެވެ. އަދި ސިއްހީ ފަރުވާއަށް ރާއްޖެއިން ބޭރަށް ދިޔުމަށް ކަށަވަރުކުރުމުގެ ގޮތުން ޑރ.ޔޫސުފް ޝާން ކޯޓަށް ހާޒިރުކޮށް އޭނާގެ ވާހަކަތައް އަޑުއަހާފައިވާކަމަށް ބަޔާންކޮށްފައިވާ ކަމަށެވެ.
އެހެންކަމުން މިމައްސަލާގައި އެފަދައިން ޕީޖީ އަމަލުކޮށްފައިވޭތޯ އާއި މިމައްސަލާގައި ކަން ހިނގާފައިވާ ގޮތުގެ ތަފްސީލު ބައްލަވައިދެއްވުމަށް އެދޭކަމަށް ސިޓީގައިވެއެވެ.
އަދި ޖިންސީ އަނިޔާ ދިނުމުގެ މިފަދަ ބޮޑެތި ސީރިއަސް ތުހުމަތުތަކެއްކޮށް، ތަހުގީގުކުރެވި ދައުވާ އުފުލާފައިވާ މައްސަލައެއްގައި ދައުވާ އުފުލާފައިވާ ފަރާތެއް ރާއްޖެއިން ބޭރަށް ފުރައިގެން ދިއުމަކީ އެމެމްބަރުން ކަންބޮޑުވެވަޑައިގަންނަވާ ކަމެއްކަމަށް ސިޓީގައިވެއެވެ. އެމެމްބަރުންގެ ނަޒަރުގައި މިއީ މައްސަލައިގައި އަނިޔާ ލިބުނު ފަރާތްތަކަށް ތަހައްމަލުކުރަންޖެހުނު އިތުރު އަނިޔާއެއްކަމަށާއި އެހެންކަމުން މިމައްސަލާގައި ދައުވާ ލިބޭ ފަރާތް ކޯޓަށް ހާޒިރުކޮށް ޝަރީޢަތް ފެށުމުގެ ގޮތުން ޕީޖީން އަޅުއްވަން ނިންމާފައިވާ ފިޔަވަޅުތަކަކީ ކޮބައިކަން ސާފުކޮށްދެއްވުމަށްވެސް އެމެމްބަރުން ވަނީ އެދިވަޑައިގަންނަވާފައެވެ.
މީގެއިތުުރުން މިޒާތުގެ މައްސަލަތައް ތަކުރާރުވިޔަ ނުދިނުމަށްޓަކައި ޖިނާއީ އަދަލުގެ ނިޒާމުގެ ތެރެއިން ގެންނަންޖެހޭ ބަދަލުތަކަކީ ކޮބައިތޯ ދެނެގަނެ އެ ބަދަލުތައް ތަންފީޒުކުރުމަށްޓަކައި އެޅުއްވެން ހުރި ފިޔަވަޅުތައް އަޅުއްވައިދިނުމަށްވެސް އެދޭކަމަށް ސިޓީގައިވެއެވެ.
ހަތް ދައުވާއެއް އުފުލާ ޝަރީޢަތް ފެށިތަނުން އޭނާ ފުރުވާލުމުން ސަރުކާރާއި ޕީޖީ ހުސައިން ޝަމީމުގެ އިތުރުން ކޯޓުތަކަށް ފާޑުކިޔުންތައް ވަނީ އަމާޒުވެފައެވެ. އަދި މިކަމުގައި ޕީޖީން ބުނެފައިވަނީ އަލީ ވަހީދުގެ ޕާސްޕޯޓް ދޫކުރި މައްސަލާގައި، އެ އަމުރު ނެރުމުގައި، އާންމުކޮށް މިބާވަތުގެ އަމުރު ނެރުއްވުުމުގައި އަމަލުކުރާ އުސޫލުތަކާ ޚިލާފަށް އަމަލުކޮށްފައިވާ މައްސަލަ، ކަމާބެހޭ މުއައްސަސާތަކުގެ ސަމާލުކަމަށް ގެނައުމުގެ މަސައްކަތް ކުރަމުންދާކަމަށެވެ.
