އެސްޓްރަޒެނިކާ ވެކްސިނަށް އެމަރޖެންސީކޮށް ބޭނުންކުރުމުގެ ހުއްދަ މިމަހުގެ މެދެއްހާ ހިސާބުގައި ދެވޭވަރުވާނެ: ޑަބްލިޔުއެޗްއޯ
11 ފެބުރުއަރީ 2021 | ބުރާސްފަތި 08:28އެސްޓްރަޒެނިކާ ވެކްސިން ހުރިހާ އުމުރު ފުރައެއްގެ މީހުންގެ ގަޔަށް ޖެހުމަށް ވެސް ރަނގަޅު
އެސްޓްރަޒެނިކާ ވެކްސިންގެ ސާމްޕަލެއް
އެސްޓްރަޒެނިކާ އާއި އޮކްސްފޯރޑުން ކޮވިޑަށް އުފައްދަމުން އަންނަ ވެކްސިން އެމަރޖެންސީކޮށް ބޭނުންކުރުމަށް ހުއްދަދިނުމަށްޓަކައި އެންމެ ފަހު މަރުހަލާގައި އުޅޭއިރު ފެބްރުއަރީ މަހުގެ މެދެއްހާ ހިސާބުގައި އެވެކްސިން ބޭނުންކުރުމަށް ހުއްދަދެވޭވަރުވާނެ ކަމަށް ދުނިޔޭގެ ސިއްހަތު ޖަމުޢިއްޔާ (ޑަބްލިޔުއެޗްއޯ)އިން ބުނެފިއެވެ.
ޑަބްލިޔުއެޗްއޯ އަށް ވެކްސިނާ ގުޅޭގޮތުން ލަފާދޭ ޕެނަލުން ވަނީ އެސްޓްރަޒެނިކާގެ ވެކްސިނަކީ ބޭނުންކުރުމަށް ރަނގަޅު ވެކްސިނެއްކަމަށް ބުނެފައެވެ. މިއާއެކު އެސްޓަރަޒެނިކާގެ ވެކްސިނަށް އެމަރޖެންސީކޮށް ބޭނުންކުރުމަށް ހުއްދަ ވަރަށް އަވަހަށް ލިބޭނެކަމަށް ވަނީ ބެލެވިފައެވެ.
އެޕެނަލުން ބުނީ ކޮވިޑުގައި ގިނަ އަދަދެއްގެ ބަޔެއްގެ ފުރާނަދާއިރު އެކަމުން އިންސާނީ ނަސްލު ސަލާމަތްކުރުމަށްޓަކައި ވެކްސިން ޖެހުމަކީ މިވަގުތު މުހިންމު ކަމެއްކަމަށެވެ. އެހެންކަމުން މިހާރަށް ލިބިފައި ހުރި މައުލޫމާތުތަކަށް ބަލާއިރު ވެކްސިނުން ކުރާ އަސަރު ރަނގަޅުނަމަ އެވެކްސިން ބޭނުންކުރުމަށް ލަފާދިނުމަކީ މައްސަލައެއް ނޫންކަމަށް ޕެނަލުން ބުނެއެވެ.
މާހިރުންގެ ޕެނަލުން ބުނެފައިވަނީ އެސްޓްރަޒެނިކާ ވެކްސިން ހުރިހާ އުމުރު ފުރައެއްގެ މީހުންގެ ގަޔަށް ޖެހުމަށް ވެސް ރަނގަޅުކަމަށެވެ.
