ރައްޔިތުންގެ މަޖިލީހުގެ ޖަލްސާގައި ބަހުސްކުރަމުން ދިޔައީ އިންޓަރނެޓްގެ އަގު ހެޔޮނުވުމާއި އެކަމަށް ޚާއްސަކުރެވިފައިވާ އިދާރާއިން ރައްޔިތުންނަށް ބޮޑެތި ގެއްލުން ތަކެއްވަމުންދާއިރުވެސް އެކަންކަން ރަނގަޅުކުރުމަށް މަސައްކަތެއްނުކުރާތީ އެމްޑީޕީގެ ޕާލަމަންޓްރީ ގްރޫޕްގެ މެމްބަރ މާފަންނު މެދު ދާއިރާގެ މެމްބަރ އިބްރާހީމް ރަޝީދު ހުށަހަޅުއްވާފައިވާ ގަރާރަށެވެ. ކޮމިއުނިކޭޝަންސް، ސައިންސް އެންޑް ޓެކްނޮލިޖީ މިނިސްޓަރު މަލީހު ޖަމާލު އާއި އެމްޑީޕީގެ ޕާލަމަންޓްރީ ގްރޫޕްގެ މެމްބަރުންނާ ދެމެދު ބަހުގެ ހޫނު ހަމަލާތަކެއް ބަދަލުކުރާތާ ވަނީ ދުވަސްތަކެއްވެފައެވެ.
މަލީހުގެ އިތުބާރު ނެތްކަމުގެ ވޯޓު ނެގުމަށް އެމްޑީޕީގެ ޕާލަމަންޓްރީ ގްރޫޕުން މަސައްކަތްކުރާތާވެސް ދުވަސްތަކެއްވެއްޖެއެވެ. އެކަން ވެގެންދާތަން ނުފެންނާތީ އެމްޑީޕީގެ މެމްބަރުން ވަނީ އެކަމުގެ ކަންބޮޑުވުންފާޅުކޮށް ވާހަކަވެސް ދައްކަވާފައެވެ.
ކޮންމެއަކަސް މިގަރާރަށް ބަހުސްކުރައްވަން ފަށްޓަވަމުން މާވަށު ދާއިރާ ތަމްސީލުކުރައްވާ އިދިކޮޅު ޕީއެންސީ މެމްބަރ އަދި ކުރީގެ އިކޮނޮމިކް މިނިސްޓަރ މުހައްމަދު ސައީދު ވިދާޅުވި ވާހަކައެއް އަޅައިގަތެވެ.
" ބައިކޮޅަށް ވަރަށް ގިނަ ގޯލްތައް ޖަހާ ދުވަހެއް ކަމަށް ވާތީ އަޅުގަނޑު ހިތަށްއެރީ މިއަދު މި މެޗަށް އަރައި ކޮންމެވެސް ވަރަކަށް ކުޅެލަންޖެހެއޭ އަޅުގަނޑުމެންވެސް ." މިހެންނެވެ.
ސައީދު އިޝާރާތްކުރެއްވީ އެމްޑީޕީގެ ސުޕަރމެޖޯރިޓީއެއްއޮވެ މިނިސްޓަރ މަލީހުގެ ޒިންމާތައް ފުރިހަމައަށް އަދާނުކުރައްވާކަމަށް ތަކުރާރުކޮށް އެމްޑީޕީން މެމްބަރުން ވިދާޅުވަމުން ގެންދެވިނަމަވެސް އެކަންކަން މަޖިލީހަށް ނުބެލި ނުވަތަ އެމްޑީޕީއަށް ނުބެލި ފިޔަވަޅެއް ނޭޅި މަލީހު އަދިވެސް އެމަގާމުގައި ހުންނެވުމެވެ. އިންޓަރނެޓްގެ އަގުހެޔޮކުރާ ވާހަކަދެކުނު ނަމަވެސް އެކަމަށް އަމަލީ ސިފައެއް ނައިސް ލަސްވާތީ އެކަމެވެ.
އެއާއެކު ހިތަށް އައި ސުވާލަކީ މަލީހު ޒިންމާދާރުކުރުވާ އިންޓަރނެޓްގެ އަގު ހެޔޮނުވެގެން އެކަމާ ސުވާލުކުރަންޖެހޭ ފަރާތްތަކަށް ސުވާލުކުރުމަށް އިދިކޮޅު މެމްބަރުން އިސްވެ މަސައްކަތް ނުކުރެވޭނެތޯއެވެ. އިދިކޮޅުގެ ޒިންމާ ފުރިހަމައަށް މަޖިލީހުގައި އެބައަދާކުރޭތޯއެވެ. ބަހުސްތަކުގައި ސަރުކާރަށް ފާޑުކިޔާ އެމްޑީޕީގެ ސުޕަރމެޖޯރިޓީގައި ކަމެއްނުވާ ވާހަކަ ދެއްކުން ފިޔަވައި އިދިކޮޅު މެމްބަރުން މައިގަނޑު ގޮތެއްގައި ކުރައްވާ ކަމެއް ފެންނާކަށްނެތެވެ. ބައެއް ފަހަރު ވަޒީރުން ހާޒިރުކޮށް ސުވާލުނުކުރާ ވާހަކައެއްނޫނެވެ. އަދި ބޮޑެތި ބައެއް މައްސަލަތައް ނަންގަވާ ކުއްލި މައްސަލަ އާއި ގަރާރުތައް ހުށަނާޅުއްވާ ވާހަކައެއްވެސް ނޫނެވެ.
އެހެންނަމަވެސް 19 ވަނަ މަޖިލީހުން ސަރުކާރު ޒިންމާދާރުކުރުވައި ފާރަވެރިވެ ޖަވާބުދާރީވުމަށް މިހާތަނަށް ކޮށްފައިވާ ބޮޑެތި ކަންތައްތަކުގައި އިސްރޯލެއް އަދާކޮށްފައިވަނީ ވެރިކަން ކުރާ މައި ޕާޓީ އެމްޑީޕީން އިސްނަގައިގެންކަން ފާހަގަކޮށްލަންޖެހެއެވެ. މިސާލަކަށް ކޮވިޑާއި ގުޅިގެން ކުރިމަތިވި އެންމެ ބޮޑު ކޮރަޕްޝަންގެ މައްސަލަކަމަށްވާ ވެންޓިލޭޓަރުގެ މައްސަލައަކީ މަޖިލީހުން އިސްނަގައިގެން ކުރި މަސައްކަތުގެ ސަބަބުން ފެންމަތިވެގެންދިޔަ ކަމެކެވެ. އެކަން ކޮށްފައިވަނީ އެމްޑީޕީގެ ޕާލަމަންޓްރީ ގްރޫޕުން އިސްނަގައިގެންނެވެ.
ކޮވިޑާއި ގުޅިގެން ކޮރަޕްޝަންގެ އަމަލުތައް ހިންގާކަމަށް އިދިކޮޅު މެމްބަރުން ތަޅުމުގައި ވިދާޅުވުން ފިޔަވައި ކުރެއްވުނު މަސައްކަތެއް ފެންނާކަށްނެތެވެ. އެހެންކަމުން ބައިކޮޅަށް ގޯލު ޖަހައިގެންވެސް މަޖިލީހުން ކުރަންޖެހޭ މަސައްކަތްތައް އެމްޑީޕީކުރުން ނޫންގޮތެއް މިއަދު ނެތެވެ.
މަޖިލީހުގެ މަސައްކަތްތަކުގެ ތެރޭގައި ސަރުކާރު ޖަވާބުދާރީކޮށް ޒިންމާދާރުކުރުވުމާއި ފާރަވެރިވުން ހިމެނޭއިރު މީގެކުރިން އެމަސައްކަތް ކުރާތަން ފެނުނީ މަޖިލީހުގައި ތިއްބަވާ އިދިކޮޅު މެމްބަރުންނެވެ. އެހެންނަމަވެސް ސުޕަރމެޖޯރިޓީއާއެކު އެމްޑީޕީން އަންނަނީ ސަރުކާރަށް ބޭނުންވާ ކަންކަމުގައި އެއްބާރުލުން ދިނުމާއެކު ސަރުކާރަށް ފާޑުކިޔާ ސަރުކާރު ޖަވާބުދާރީވެސް ކުރުވަމުންނެވެ. އެކަން އަމަލީގޮތުން ދައްކަމުންވެސްމެއެވެ.
87 މެމްބަރުން މިމަޖިލީހުގައި ތިއްބަވާއިރު ވެރިކަން ކުރާ މައި ޕާޓީ އެމްޑީޕީގެ 65 މެމްބަރުން ތިއްބަވައެވެ. އިދިކޮޅު ޕީޕީއެމް ޕީއެންސީގެ ތިއްބަވަނީ 9 މެމްބަރުންނެވެ. އެމްޑީއޭގެ ތިއްބަވަނީ 2 މެމްބަރުންނެވެ. އާންމުކޮށް މަޖިލީހުގައި އިދިކޮޅު މެމްބަރުންގެ ގޮތުގައި ތަމްސީލުކުރައްވަނީ މި 11 މެމްބަރުންނެވެ. މި 11 މެމްބަރުންނަށް ގޯލެއް ނުޖެހޭކަމަށްވާނަމަ ބައިކޮޅަށް ގޯލުޖަހައިގެންވެސް ކުޅުން ކުރިޔަށް ގެންދަން އެބަޖެހެއެވެ. 5 އަހަރުގެ މުއްދަތަށް ކުރިޔަށްދާ މިމެޗްގައި އަދިވެސް އެތައް ފަހަރަކު ބައިކޮޅަށް އެމްޑީޕީން ގޯލު ޖަހާނެކަމަށް ބެލެވެއެވެ. ނަމަވެސް މެޗް ނިމުމުގެކުރިން އިދިކޮޅުން އެއް ގޯލު ޖަހައިގެން ނަމަވެސް މަޖިލީހުގައި އިދިކޮޅުގެ ޓީމެއް އޮތްކަން ހާމަކުރުން ކިހިނެއްވާނެތޯއެވެ.
