"ގަހަކުން ފަތެއް ހެލިލިޔަސް ހީވެޔޭ، ފަހަތުން މަގޭ އަންނަހެން ހީވެޔޭ، އެހަނދާނުގައި މޭ ތެޅޭ ގޮތް ވެއޭ"

"ގަހަކުން ފަތެއް ހެލިލިޔަސް ހީވެޔޭ، ފަހަތުން މަގޭ އަންނަހެން ހީވެޔޭ، އެހަނދާނުގައި މޭތެޅޭ ގޮތް ވެޔޭ" މިއީ މަރްހޫމް ނައިފަރު ދޮހޮއްކޮގެ އަޑުން ވަރަށް ބޮޑަށް މަޝްހޫރުކަން ލިބިގެން ދިޔަ ލަވައެއްގެ ތަންކޮޅެކެވެ. ވެގެން މިއުޅޭ ގޮތަކީ ޝައްކު ބައްޔާއި ވަސްވާސްތައް އިންތިހާ އަށް ހިތުގައި އަށަގަތީއެވެ. މީހަކު ވެރިކަމޭ، ވެއްޓެނީއޭ ބުނާ އިރަށް ގުޑުގުޑު އަޅައިގަނެ، ނިދަން އެނދަށް އަރާ ތިބި މީހުންވެސް ހޭލައްވައިގެން އަވަސް އަވަހަށް ތެޅިފޮޅި ގަންނަ ހިސާބަށް ޝައްކު ބަލި ބޮޑުވީއެވެ.

އެހެންވާނެ ނޫންތޯއޭ ދެއްކިފައި ހުރި ވާހަކަތަކާއި، އުޅެވިފައި ހުރި ގޮތާއި، ކަންކުރެވިފައިވާ ގޮތުގެ މަތިން ހިތައް އަރާ ކޮންމެ ފަހަރަކު އެހެން ބަޔަކު މަށަށްވެސް ހަމަ އެ ލަގާ ދީފާނެ ނޫންހޭ ހިތައް ނާރާ ނުދާނެ ކަމީ މުޖައްރިބު ކަމެކެވެ.

އެކަމުގެ މިފަހަރު ދެން ތަންކޮޅެއް ބޮޑުވަރެކެވެ. ޝޭޚް އިމްރާން ޖަލުގައި ބަންދުކޮށްގެން ގެންގުޅޭތާ އެއްހާސް ދުވަސް ފުރިހަމަ ވުމާ ގުޅިގެން އެކަމާ ހިތްހަމަ ނުޖެހުން ފާޅު ކުރުމަށް ބޭއްވި އެއްވުމެއްގައި ކުރީގެ ރައީސް މައުމޫނު ވާހަކަ ފުޅު ދައްކަވަމުން، ހިއްސުތަކާ އެންމެ ބޮޑަށް ކުޅެލާ ސުވިޗުގައި ކިރިޔަ ކިރިޔާ އަތްޕުޅު ޖެހޭ އިރަށް އެޔޮށް ވީ ގޮތެކެވެ. ވެރިކަމުގެ ވާހަކަ ވިދާޅުވީއެވެ. އިންތިޚާބުގެ ކުރިންވެސް ވެރިކަން ބަދަލު ކުރައްވަން ތާއީދު ކުރައްވާ ވާހަކަ ވިދާޅުވީއެވެ. އެއާއެކު ފަހުލަވާނުންތައް ހޭލާ، އެމީހަކަށް ވެވުނު ގޮތަކުން ބަލަ ގާނޫނު ކޮބާހޭ، މީ ގާނޫނީ ވެރިކަމެކޭ، ވެރިކަން ބަދަލެއް ނުކުރެވޭނޭ ކިޔާ އަޑު ހިތްޕާލައިފިއެވެ.

ފެބްރުއަރީ މަސް އޮތީ ބޯމަތިވެފައެވެ. އެ މަހުގެ 7 ވަނަ ދުވަސް އެހަރަގެން ފަތުއަޑު ކިޔާފައި އަންނަނީއެވެ. އެދުވަހުގެ ހަނދާންތައް އާވެ އާލާވަމުން އެހަރަގެން އަންނަނީއެވެ. އެހެންވީމާ، ފަތެއް ކީއްކުރަންހެއްޔެވެ. ހިންޔެއް ހިރިލިޔަސް މަށަށް ހީވަނީ ހަމަ ވެއްޓެނީއޭ، ވެއްޓެނީ އޭ ނޫންހެއްޔެވެ؟

ރައީސް މައުމޫނުގެ ވާހަކަފުޅުގައި ބަޣާވާތް ކުރާ ވާހަކައެއް ވިދާޅެއް ނުވެއެވެ. ވިދާޅުވީ ވެރިކަން ބަދަލު ކުރަން ތާއީދު ކުރައްވާ ވާހަކައެވެ. އިންތިޚާބު އޮންނާނެ ކަމެއް އެނގިވަޑައި ނުގަނެޔޭވެސް ވިދާޅުވިއެވެ. އަދި އިންތިޚާބު އޮތަސް ހަދާނީ ކޮން ގޮތެއް ކަމެއް އެނގިވަޑައި ނުގަންނަވާ ކަމަށްވެސް ވިދާޅުވިއެވެ. އެހެން ކަމުން ކަންކަން އިސްލާހު ކުރަން ކޮންމެހެން އިންތިޚާބަކާ ހަމައަށް ރައްޔިތުން ނުރުހޭ ސަރުކާރެއް ބަދަލު ނުކުރަންވީ ކީއްވެތޯ އޭ ވިދާޅުވެ ދެއްކެވި ވާހަކަފުޅެއް މިއޮތީ ބޮޑުތާ ޖެހިފައެވެ.

ރައީސް މައުމޫނު މިވާހަކަފުޅު ދައްކަވާ ނިމިވަޑައިގަނެގެން ގެއަށް ވަޑައިގަނެވޭނެ ކަމެއްވެސް ނޭނގެއެވެ. ސަރުކާރުގެ މީޑިއާއިން އެޔޮށް އައީ ބްރޭކިންގ ނިއުސް އެވެ. ޑިފެންސް މިނިސްޓަރު ހުންނެވީ އަނެއް ކޮޅުން ފޯނުގައެވެ. ވަގުތަކީ ދަންވަރުގެ ވަގުތެވެ. ޑިފެންސް މިނިސްޓަރަށް ރައީސް މައުމޫނު ދެއްކެވި ވާހަކަފުޅު ރަނގަޅަށް އެނގި ވަޑައިގެންނެވި ކަމެއް ނޭގެއެވެ. ޑިފެންސް މިނިސްޓަރު ދެއްކެވި ވާހަކަފުޅާ ރައީސް މައުމޫނު ދެއްކެވި ވާހަކަފުޅާ ގުޅުމެއްވެސް ނެތެވެ. ތެދުތެދަށް ދަންވަންޔާ ޑިފެންސް މިނިސްޓަރު ދެއްކެވި ވާހަކަފުޅު ދޭހަވަނީ ރާއްޖޭގެ ވެރިކަން ބަދަލު ކުރެވޭނެ ގޮތްތައް ގާނޫނު އަސާސީގައި ބަޔާންވެފައި އޮތް ގޮތް އެމަނިކުފާނަށް އެނގިވަޑައި ނުގަންނަވާ ކަމަށެވެ. ގާނޫނު އަސާސީގައި ވެރިކަން ބަދަލު ކުރެވޭ ގޮތް ކޮންމެ މީހަކަށްމެ އެނގޭ މިންވަރަށް ބަޔާން ކޮށްފައި އޮތް ކަމަށް ވިދާޅުވި އިރު އެމަނިކުފާނު ގާނޫނު އަސާސީ 100 ވަނަ މާއްދާ ފެނިވަޑައިގަނެފައި އޮތް ކަމަކަށް ގަބޫލެއް ނުކުރެވެއެވެ. އެމަނިކުފާނަށް އެނގިވަޑައިގަންނަވަނީ ވެރިކަން ބަދަލު ކުރެވޭނީ ރައްޔިތުންގެ ވޯޓަކުން އެކަނި ކަމަށެވެ. ނޫނެކެވެ. އެއީ ހަމައެކަނި ގޮތެއް ވެސް ނޫނެވެ. ރައްޔިތުންގެ މަޖިލިހުގެ އަޣުލަބިއްޔަތުން ފާސް ކުރާ ގަރާރަކުން ރައީސުލްޖުމްހޫރިއްޔާ ގެޔަށްވެސް ފޮނުވާލެވިދާނެއެވެ. އެއީ އަދި ރައްޔިތުންގެ ވޯޓެއް ނޫނެވެ. އެކަމަކު އެއީވެސް ގާނޫނު އަސާސީގެ ތެރެއިންނެވެ.

ދަންވަރުގެ ބްރޭކިންގ ނިއުސް އަށް ޑިފެންސް މިނިސްޓަރު އަރާވަޑައިގެންނެވި އިރު އެނގިވަޑައި ނުގަންނަވާ އެހެން ވާހަކަ އެއްވެސް އެބައޮތެވެ. އެމަނިކުފާނު އެ ވެރިކަމެއް ވެއްޓިދާނެ އަތީ ބިރުފުޅު ގަންނަ ވެރިކަމުގެ އެންމެ މަތީ މަގާމުގައި ހުންނެވި ޔާމީން އަބްދުލް ގައްޔޫމް ދައްކަވާފައިވާ ވާހަކަފުޅެކެވެ. އޭރު އެމަނިކުފާނުގެ އަދި ވެރިކަމަށް ވަޑައެއް ނުގަންނަވައެވެ. އެއީ އެކަމާ ހިތްޕުޅާވެގެން އުޅުއްވި ދުވަސް ވަރެވެ.

އަޑު އައްސަވާށެވެ. ޔާމީން ވިދާޅުވަނީ:

"ބައްލަވާ، ސިޔާސީ ޕާޓީތައް އުފެދުނީމާ، އޮޕޮސިޝަން ޕާޓީއެއްގެ ބޭނުމަކަށް ވާނީ ސަރުކާރު ޖަވާބުދާރީ ކުރުވަމުން، ކުރުވަމުން ގޮސް، ސަރުކާރަކީ ގާނޫނު ތަކާ އެއްގޮތައް ރައްޔިތުންނަށް ފައިދާވެރި ވެރިކަމެއް ނުކުރެވޭ ކަމަށް ވަންޏާ، ރައްޔިތުން ރުހޭ ވެރިކަމެއް ނުކުރެވޭ ކަމަށް ވަންޏާ، އޮޕޮސިޝަނުން (އިދިކޮޅު ޕާޓީތަކުން) ކުރަންޖެހޭ ކަމެކޭ ވެރިކަން ވައްޓާލުމަކީ"

އެ ވާހަކަފުޅު ދައްކަވައިގެން ޔާމީން އަބްދުލް ގައްޔޫމުގެ މައްޗަށް ހުކުމެއް އައިސްފައި ނުވާކަން ޑިފެންސް މިނިސްޓަރަށް އެނގިވަޑައިގަންނަވާ ބާވައެވެ؟ ވެރިކަން ވައްޓާލުމަކީ އިދިކޮޅު ފަރާތްތަކުން ކުރަންޖެހޭ ކަމެއް ކަމަށް މީހަކު ބުނެގެން ކުށްވެރި ނުވާނެ ކަމުގެ ހެއްކަކީ މިހާރު ވެރިކަމުގައި ހުންނެވި އަބްދުﷲ ޔާމީންގެ މިދެންނެވި ވާހަކަފުޅެވެ.

ވާދަވެރި ސިޔާސީ ޕާޓީތައް އުފެދި ދައުލަތުން ޚަރަދު ދީގެން ހިންގަމުންދާއިރު އެހާ ހިތްބަލި ވެގެން ސިޔާސީ އިސް ސަފުގައި ތިބެވޭނެ ކަމަށް ގަބޫލު ކުރުމަކީ މޮޔަ ކަމެކެވެ. ވެރިކަމޭ ވެރިކަން ބަދަލު ކުރަނީ އޭ ބުނާ އިރަށް ތެޅި ފޮޅި ގަންނަނީ ބިތުފަންގި ނަގާފާނެއަތީ ބިރުން ކަމަށް ވެދާނެއެވެ. ލިބިފައި ހުރި މޮޅު ތަކާއި، މަންފާތައް އަތުން ބީވެ އެއެއްޗެހި ލިބިފައި ހުރި ގޮތް ބަޔަކު ބަލާފާނެ އަތީ ތުރުތުރު އަޅަނީ ކަމަށް ވެދާނެއެވެ. މި ސަރުކާރު މިހެން އޮވެގެން ކެވެން ހުރި ކެޔޮ ދެން އިތުރަށް ނުކެވިދާނެއަތީ މޭ ތެޅޭ ގޮތް ވަނީ ކަމަށްވެސް ވެދާނެއެވެ. އެކަމަކު ހަގީގަތަކީ ހަގީގަތެކެވެ. ދައުރުގެ ފުރަތަމަ ކޮޅު ވިޔަސް، މެދުތެރެއިންވެސް ފަހަތު ކޮޅުން ވިޔަސް ގާނޫނީ ގޮތުން ވެރިކަން ވައްޓާލެވިދާނެ ގޮތްތައް އެބަހުއްޓެވެ. ގަބޫލު ވިޔަސް ނުވިޔަސް ކޯފާވިޔަސް ނުވިޔަސް ވަގުތު ޖެހުމުން ހިނގަން ހުރި ކަމެއް ނަމަ ހިނގާނެއެވެ. ވެއްޓެން އޮތް ވެރި ކަމެއް ވެއްޓޭނެއެވެ. އަރަން އޮތް ވެރިކަމެއް އަރާނެއެވެ.