މިސްބާހު އާއި ނަޒީރު ތާލިބާނުންގެ ޓްރެއިނިންގ ހެދިކަމުގެ ތުހުމަތު ކުރެއްވީ ނައިފަރު ދާއިރާގެ މެމްބަރ ޝިޔާމް
މަރު ކޮމިޝަންގެ މެމްބަރ މިސްބާހު އައްބާސް އަދި ހޯމް މިނިސްޓްރީގެ ސްޓޭޓް މިނިސްޓަރ އަލީ ނަޒީރު
މަރު ކޮމިޝަންގެ މެމްބަރ މިސްބާހު އައްބާސްއާއި ހޯމް މިނިސްޓްރީގެ ސްޓޭޓް މިނިސްޓަރ އަލީ ނަޒީރު ތާލިބާނުންގެ ޓްރެއިނިން ހެދިކަމުގެ ތުހުމަތު ނައިފަރު ދާއިރާގެ ޕީޕީއެމް މެމްބަރ އަހުމަދު ޝިޔާމް ކުރެއްވުމުން އެކަން ބެލުމަށް މަޖިލީހުން ނިންމައިފިއެވެ.
ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި މިއުޒިކާއެކު ޒުވާނުން އުފާފާޅުކުރާ މަރުކަޒުުތައް ގައިމުކުރުމަށް ގޮވަލައި ހުށަހަޅާފައިވާ ގަރާރަށް ބަހުސް ކުރައްވަމުން ޝިޔާމް ވިދާޅުވީ މަރުކޮމިޝަންގެ މެމްބަރ މިސްބާހުއާއި ހޯމް މިނިސްޓްރީގެ ސްޓޭޓް މިނިސްޓަރ އަލީ ނަޒީރު އެފަދަ ޓްރެއިނިންގއެއް ހެއްދެވިތޯ މަޖިލީހުން ބަލަންޖެހޭކަމަށެވެ.
ޝިޔާމް މިމޭރުމުން ވާހަކަދެއްކެވުމުން ރިޔާސަތުގައި އިންނެވި މަޖިލީހުގެ ރައީސް، ރައީސް މުހައްމަދު ނަޝީދު ވަނީ މެމްބަރުގެ ވާހަކަފުޅުގައި ފާހަގަކުރެއްވި ދެބޭފުޅުން ތާލިބާންގެ ތަމްރީނަށް ދިޔަތޯ ސުވާލު އުފައްދަވާފައިވާތީ އެކަން ބެލުމަށް އަމީން އާންމު އަރިހުން އެދިވަޑައިގަންނަވާފައެވެ.
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ އިންސާފު ހޯދައިދިނުމަށް ރައީސުލްޖުމްހޫރިއްޔާ އުފައްދަވާފައިވާ ކޮމިޝަންގައި މިސްބާހު އިންނަވާއިރު އަހަރަކަށްވުރެ ގިނަ ދުވަސްވީފަހުން އެކޮމިޝަނުން ވަނީ އަންގާރަ ދުވަހު ނޫސްވެރިންގެ ބައްދަލުވުމެއް ބާއްވާފައެވެ. ކޮމިޝަނުން ކުރަމުންދާ މަސައްކަތްތަކުގެ އެންމެފަހުގެ މައުލޫމާތު ދެއްވުމަށް ނޫސްވެރިންނާއި ބައްދަލުކުރެއްވީ މިސްބާހުއެވެ. ކޮމިޝަންގެ މަސައްކަތްތައް ލަސްވަމުންދާތީއާއި ނަތީޖާ ހާސިލްވާތަން ފެންނަމުންނުދާތީ ގިނަ ބަޔެއްގެ ފާޑުކިޔުން ކޮމިޝަނަށް އަމާޒުވެފައިވާއިރު ރައްޔިތުންގެ މަޖިލީހުގެ ރައީސްވެސް މީގެކުރިން ވަނީ މަރުކޮމިޝަނަށް ފާޑުވިދާޅުވެ ވާހަކަދައްކަވާފައެވެ.
ހޯމް މިނިސްޓްރީގެ ސްޓޭޓް މިނިސްޓަރ އަލީ ނަޒީރަކީ ނޭޝަނަލް ކައުންޓަ ޓެރެރިޒަމް ސެންޓަރ (އެންސީޓީސީ)ގެ ކައުންޓަރ ރެޑިކަލައިޒޭޝަން ކޮމިޓީގައި ހޯމް މިނިސްޓްރީގެ ފަރާތުން އިންނަވާ ބޭފުޅާއެވެ. އެންސީޓީސީއަކީ ޓެރަރިޒަމުގެ ޢަމަލުތަކާ ގުޅިގެން އެކަންކަން ހުއްޓުވުމަށްޓަކައި ފިޔަވަޅު އެޅުމުގެ އިސްފަރާތެވެ.
