މަރު ކޮމިޝަންގެ މެމްބަރ މިސްބާހު އައްބާސްއާއި ހޯމް މިނިސްޓްރީގެ ސްޓޭޓް މިނިސްޓަރ އަލީ ނަޒީރު ތާލިބާނުންގެ ޓްރެއިނިން ހެދިކަމުގެ ތުހުމަތު ނައިފަރު ދާއިރާގެ ޕީޕީއެމް މެމްބަރ އަހުމަދު ޝިޔާމް ކުރެއްވުމުން އެކަން ބެލުމަށް މަޖިލީހުން ނިންމައިފިއެވެ.
ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި މިއުޒިކާއެކު ޒުވާނުން އުފާފާޅުކުރާ މަރުކަޒުުތައް ގައިމުކުރުމަށް ގޮވަލައި ހުށަހަޅާފައިވާ ގަރާރަށް ބަހުސް ކުރައްވަމުން ޝިޔާމް ވިދާޅުވީ މަރުކޮމިޝަންގެ މެމްބަރ މިސްބާހުއާއި ހޯމް މިނިސްޓްރީގެ ސްޓޭޓް މިނިސްޓަރ އަލީ ނަޒީރު އެފަދަ ޓްރެއިނިންގއެއް ހެއްދެވިތޯ މަޖިލީހުން ބަލަންޖެހޭކަމަށެވެ.
މަރުކޮމިޝަންގެ މެމްބަރު މިސްބާހު އައްބާސް އަޅުގަނޑުމެން އެބަޖެހޭ ހިސްޓްރީ ބަލާލަން. އަޅުގަނޑުމެން އެބަޖެހޭ މިސްބާހު އައްބާސް ތާލިބާނާއިއެކީގައި ޓްރެއިނިންގ ހެދިތޯ ބަލާލަން. އެންޓި ޓެރަރިޒަމް ނުވަތަ ކައުންޓަރ ޓެރަރިޒަމް މިއޮންނަ ޔުނިޓް އެބޯޑު ނުވަތަ އެކޮމިޓީ ގައި އެބަ އިނދޭ އަލީ ނަޒީރު. ހޯމް މިނިސްޓްރީގެ ސްޓޭޓް މިނިސްޓަރ އަލީ ނަޒީރު. އަޅުގަނޑުމެން އެބަޖެހޭ ބަލާލަން އަލީ ނަޒީރުވެސް މިޓްރެއިނިންގ ހެދިތޯ. ކޮބައިތޯ އަލީ ނަޒީރުގެ ބެކްގްރައުންޑް އަކީ. ޒުވާނުންތަކަކަށް އިނގިލި ދިއްކުރެވޭ މައްސަލައަކަށްވާތީވެ އަޅުގަނޑުމެން މިދަންނަވަނީ މިވާހަކަ.އަހުމަދު ޝިޔާމް / ނައިފަރު ދާއިރާގެ މެމްބަރ
ޝިޔާމް މިމޭރުމުން ވާހަކަދެއްކެވުމުން ރިޔާސަތުގައި އިންނެވި މަޖިލީހުގެ ރައީސް، ރައީސް މުހައްމަދު ނަޝީދު ވަނީ މެމްބަރުގެ ވާހަކަފުޅުގައި ފާހަގަކުރެއްވި ދެބޭފުޅުން ތާލިބާންގެ ތަމްރީނަށް ދިޔަތޯ ސުވާލު އުފައްދަވާފައިވާތީ އެކަން ބެލުމަށް އަމީން އާންމު އަރިހުން އެދިވަޑައިގަންނަވާފައެވެ.
މެމްބަރުގެ ވާހަކަފުޅުގައި މިސްބާހު އައްބާހާއި އަލީ ނަޒީރު، އެދެބޭފުޅުން ތާލިބާނުންގެ ތަމްރީނަށް ދިޔަތޯ ސުވާލު އުފައްދަވާފައިވާތީ އަޅުގަނޑު އަމީން އާންމުގެ އަރިހުގައި ދަންނަވައިފިން ދައުލަތުގެ ސަރުކާރުގެ ކަމާބެހޭ ފަރާތްތަކަށް ލިޔެގެން އެ ބޭފުޅުންނަކީ ތިޔަ ވިދާޅުވާ ބާވަތުގެ ތަމްރީނެއްގައި ނުވަތަ ތިވިދާޅުވި ބާވަތެއްގެ ވިސްނުމަށް ލެބިވަޑައިގެން ތިއްބެވި ބޭފުޅުންތޯ ސާފުކުރުމަށް. މިމަޖިލީހުން ކުރަންޖެހޭނެކަމެއް އެއީ.މުހައްމަދު ނަޝީދު/ ރައްޔިތުންގެ މަޖިލީހުގެ ރައީސް
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ އިންސާފު ހޯދައިދިނުމަށް ރައީސުލްޖުމްހޫރިއްޔާ އުފައްދަވާފައިވާ ކޮމިޝަންގައި މިސްބާހު އިންނަވާއިރު އަހަރަކަށްވުރެ ގިނަ ދުވަސްވީފަހުން އެކޮމިޝަނުން ވަނީ އަންގާރަ ދުވަހު ނޫސްވެރިންގެ ބައްދަލުވުމެއް ބާއްވާފައެވެ. ކޮމިޝަނުން ކުރަމުންދާ މަސައްކަތްތަކުގެ އެންމެފަހުގެ މައުލޫމާތު ދެއްވުމަށް ނޫސްވެރިންނާއި ބައްދަލުކުރެއްވީ މިސްބާހުއެވެ. ކޮމިޝަންގެ މަސައްކަތްތައް ލަސްވަމުންދާތީއާއި ނަތީޖާ ހާސިލްވާތަން ފެންނަމުންނުދާތީ ގިނަ ބަޔެއްގެ ފާޑުކިޔުން ކޮމިޝަނަށް އަމާޒުވެފައިވާއިރު ރައްޔިތުންގެ މަޖިލީހުގެ ރައީސްވެސް މީގެކުރިން ވަނީ މަރުކޮމިޝަނަށް ފާޑުވިދާޅުވެ ވާހަކަދައްކަވާފައެވެ.
ހޯމް މިނިސްޓްރީގެ ސްޓޭޓް މިނިސްޓަރ އަލީ ނަޒީރަކީ ނޭޝަނަލް ކައުންޓަ ޓެރެރިޒަމް ސެންޓަރ (އެންސީޓީސީ)ގެ ކައުންޓަރ ރެޑިކަލައިޒޭޝަން ކޮމިޓީގައި ހޯމް މިނިސްޓްރީގެ ފަރާތުން އިންނަވާ ބޭފުޅާއެވެ. އެންސީޓީސީއަކީ ޓެރަރިޒަމުގެ ޢަމަލުތަކާ ގުޅިގެން އެކަންކަން ހުއްޓުވުމަށްޓަކައި ފިޔަވަޅު އެޅުމުގެ އިސްފަރާތެވެ.
