އެޗްޕީއޭއިން ވެސް ޓިކްޓޮކަށް
11 ފެބުރުއަރީ 2021 | ބުރާސްފަތި 06:34ޓިކްޓޮކް ބޭނުންކުރަން ނިންމީ މައުލޫމާތު ފެތުރުމުގައި ސޯޝަލް މީޑިޔާގެ ހުރިހާ ޕްލެޓް ފޯރމެއް ވެސް ބޭނުންކުރުމަށް
އެޗްޕީއޭއިން ޓިކްޓޮކްގައި ހަދާފައިވާ އެކުންޓް
ހެލްތު ޕްރޮޓެކްޝަން އެޖެންސީ(އެޗްޕީއޭ)އިން ޒުވާނުންގެ މެދުގައި މަގުބޫލް ސޯޝަލް މީޑިޔާ ޕްލެޓް ފޯރމް ޓިކްޓޮކްގައި ރަސްމީ އެކައުންޓެއް ހުޅުވައިފިއެވެ.
މިކަމާ ގުޅިގެން ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނީ ޓިކްޓޮކް ބޭނުންކުރަން ނިންމީ މައުލޫމާތު ފެތުރުމުގައި ސޯޝަލް މީޑިޔާގެ ހުރިހާ ޕްލެޓް ފޯރމެއް ވެސް ބޭނުންކުރުމުގެ ބޭނުމުގައި ކަމަށެވެ. ޓިކްޓޮކަކީ ގިނަ އަދަދެއްގެ ޒުވާނުން ބޭނުންކުރާ ސޯޝަލް މީޑިޔާ އެޕްލިކޭޝަނަކަށްވާއިރު ވީހާވެސް ގިނަ ބަޔަކަށް އެޗްޕީއޭއިން ކުރަމުންދާ މަސައްކަތްތައް، ވަކިން ޚާއްސަކޮށް މިދުވަސްވަރު ކޮވިޑާ ގުޅޭ މައުލޫމާތު ދިނުމަކީ އަމާޒެއްކަމަށް އެޗްއީއޯސީން ބުނެއެވެ.
އެގޮތުން މާސްކު އެޅުމުގެ މުހިންމު ކަމަށާއި ވެކްސިނާ ބެހޭ ގޮތުންވެސް ޓިކްޓޮކް މެދުވެރިކޮށް މައުލޫމާތު ފޯރުކޮށްދޭނެކަމަށް އެސެންޓަރުން ބުނެއެވެ. އެޗްޕީއޭއިން މިހާރުވެސް އަންނަނީ އެކި ޕްލެޓްފޯރމްތައް ބޭނުންކޮށްގެން ކޮވިޑާ ގުޅުންހުރި އެކި މައުލޫމާތުތައް ފޯރުކޮށްދެމުންނެވެ.
އެޗްޕީއޭއިން ޓިކްޓޮކާ ގުޅިފައިވާއިރު ދާދިފަހުން ރައްޔިތުންގެ މަޖިލީހުން ވެސް ވަނީ ޓިކްޓޮކްގައި ރަސްމީ އެކައުންޓެއް ހުޅުވާފައެވެ. އެގޮތުން ޖެނުއަރީ މަހުގެ 25 ވަނަ ދުވަހު މަޖިލީހުގެ އިދާރާއިން ޓިކްޓޮކް އެކައުންޓް ހުޅުވިއިރު މިހާތަނަށް އައިއިރު ހަތަރުހާހަށްވުރެ ގިނަ މީހުން އެ އެކައުންޓް ފޮލޯރކުރެއެވެ. މަޖިލީހުގެ އިދާރާއަކީ އެންމެ ފުރަތަމަ ޓިކްޓޮކްގައި އެކައުންޓެއް ހުޅުވި ސަރުކާރުގެ އިދާރާއެވެ.
މަޖިލީހުން މިހާތަނަށް އައިއިރު 9 ވީޑިއޯއެއް އަޕްލޯޑްކޮށްފައިވާއިރު މަޖިލީހުގައި އަލަށް ހުޅުވި ލައިބްރަރީ އާއި އަރކައިވްގެ ވީޑިއޯތައް އަދި ގިނަ ދުވަސްތަކެއް ވަންދެން މަޖިލީހުގެ އިދާރާގައި މަސައްކަތްކޮށްފައިވާ މުވައްޒަފުންގެ އިންޓަރވިއުތަކާއި މަޖިލީހުގެ އިދާރާގެ ތާރީޚު ދައްކުވައިދޭ ވީޑިއޯ އަދި ކުރަމުންދާ ޚާއްސަ ކަންކަން އަންނަނީ ޓިކްޓޮކް މެދުވެރިކޮށް އާންމުންނާ ހަމައަށް ގެނެސްދެމުންނެވެ.
ޓިކްޓޮކް އަކީ ޒުވާނުންގެ މެދުގައި މަގްބޫލު ސޯޝަލް މީޑިޔާ ޕްލެޓް ފޯރމެކެވެ. ޒުވާނުން ނޫނަސް އެކި އުމުރުފުރައިގެ މީހުން ރާއްޖޭގައި އަންނަނީ ޓިކްޓޮކް ބޭނުންކުރަމުންނެވެ.
