އެޗްޕީއޭއިން ނިންމުންތައް ނިންމަމުން ދަނީ ބަލި އިތުރަށް ފެތުރަނަ ނުދިނުމަށް: މަބްރޫކް

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އެންގުމެއް އެންގުމުގެ ބޭނުމަކީ އެއްރަށުން އަނެއް ރަށަށް ބަލިފެތުރުން ހުއްޓުވުން ކަމަށާއި، އެގޮތަށް އަމަލު ނުކުރާނަމަ އިތުރު ނިންމުންތައް ނިންމާނެ ކަމަށް ސަރުކާރުން ހާމަކޮށްފިއެވެ.

ކޮވިޑް-19 ގެ ޓާސްކްފޯސް އިން ބޭއްވި ނޫސްވެރިންގެ ބައްދަލުވުމުގައި ޓާސްކްފޯހުގެ ތަރުޖަމާނު މަބްރޫކް އަޒީޒު ވިދާޅުވީ އެޗްޕީއޭއިން ނިންމާ ނިންމުމުގެ ބޭނުކަމީ ބަލި ފެތުރުން ހުއްޓުވުން ނުވަތަ ވީ އެންމެ ބޮޑަކަށް މަދުކުރެއްވުން ކަމަށެވެ. އަދި މި ވިސްނުމުގެ ދަށުން ހެލްތް ޕްރޮޓެކްޝަން އެޖެންސީން ވިސްނާފައި ހުރީ އެއްރަށުން އަނެއް ރަށަށް ދަތުރުކުރާ މީހުންގެ އަދަދު މަދުކުރުމާއި އިންޑެކްސް ކޭސްތައް އެއްރަށުން އަނެއް ރަށަށް ނުދާ ކަމުގައިވާނަމަ މި ބަލި ފެތުރުން ހުއްޓުވުން ފަސޭހަވާނެތީ ކަމަށެވެ.

Advertisement

އެޗްޕީއޭއިން އަންގާފައިވާ އެންގުންތަކުގައި ފާހަގަކޮށްފައިވާ ކަންތައްތަކުގެ ތެރޭގައި ރިޒޯޓުތަކުގައި މަސައްކަތްކުރާ މުވައްޒަފުންނަށް މި މުއްދަތުގެ ތެރޭގައި ވަޒީފާ އަދާކުރުމަށް ރިޒޯޓަށް ދެވިދާނެކަމަށާއި، ނަމަވެސް އެހެން ދެ މުވައްޒަފުންވެސް ހިމެނޭގޮތަށް އެއްވެސް މުވައްޒަފަކަށް މި މުއްދަތުގެ ތެރޭގައި ރިޒޯޓުން ފޭބުމުގެ ހުއްދައެއް ނެތްކަމަށެވެ. ނަމަވެސް ފަތުރުވެރިން ފުރަން އެއަރޕޯޓްއަށް ގެންދަންޖެހޭ ހާލަތުގައި އެކަމަށް ދާ މުވައްޒަފުން ފަތުރުވެރިން ފުރުވާލުމަށްފަހު، އަނބުރާ ރިޒޯޓަށް އަންނަގޮތަށް، މި މުވައްޒަފުން ރިޒޯޓުން ފޭބުމުގެ ހުއްދަ އޮންނާނެ ކަމަށާއި، މި ފަރާތްތައް ދަތުރުކުރަމުންދާ ގޮތުގެ މަޢުލޫމާތު ރިޒޯޓުތަކުން ބެލެހެއްޓެވުމަށް ވަނީ އަންގާފައެވެ.

މީގެ އިތުރުން ރިޒޯޓުތަކަށް މުދާ އުފުލާ އުޅަނދުފަހަރުގައި މަސައްކަތްކުރައްވާ ފަރާތްތަކުން ރިޒޯޓަށް މުދާ ފޯރުކޮށްދިނުމަށް ޖެޓީއާ ހިސާބަށް ދެވިދާނެކަމަށާއި، ނަމަވެސް މި ފަރާތްތައްވެސް ރިޒޯޓަށް އެތެރެވެފައިވާނަމަ، އެ ފަރާތްތައްވެސް މި މުއްދަތުގެ ތެރޭގައި ރިޒޯޓުން ފޭބުމުގެ ހުއްދައެއް ނެތްކަމަށް އެޗްޕީއޭގެ ނިންމުމުގައިވެއެވެ.

ހަމަ މިއާއެކު އެއް ރިޒޯޓުން އަނެއް ރިޒޯޓަށް އެއްވެސް މުވައްޒަފަކަށް އަދި އެއްވެސް ފަތުރުވެރިއަކަށް މި މުއްދަތުގެ ތެރޭގައި ނުދެވޭނެކަމަށްވެސް އެޗްޕީއޭގެ ނިންމުމުގައި ބުނެފައިއެވެ. މީގެ އިތުރުން ރާއްޖެ އަންނަ ފަތުރުވެރިން އަންނަ އިރު ބުކިން ހަދާފައިވާ ރަށް ނޫން އެހެން ރަށަކަށް ނުދެވޭނެ ކަމަށާއި، އެއްރިސޯޓުން އަނެއް ރިސޯޓަށް ނުވަތަ ރަށަކަށް ވެސް ފަތުރުވެރިންނަށް ނުދެވޭނެ ކަމަށް ވެސް ނޫސްވެރިންގެ ބައްދަލުވުމުގައި މަބްރޫކު ވަނީ ވިދާޅުވެފައެވެ.