އިންފުލުއެންޒާ ވެކްސިން ޖެހުމަށް އެޗްޕީއޭއިން އިލްތިމާސްކޮށްފި
30 މެއި 2018 | ބުދަ 06:03ވެކްސިން ޖަހައިދޭނީ ދަމަނަވެއްޓާއި ސެނެހިޔާ، ހުޅުމާލެ ހޮސްޕިޓަލް، އައިޖީއެމްއެޗް އަދި އޭޑީކޭ ހޮސްޕިޓަލުން ކަމަށް އެޗްޕީއޭއިން ބުނޭ
ވެކްސިން ދެނީ. އިންފުލުއެންޒާ ވެކްސިން ޖެހުމަށް އެޗްޕީއޭއިން އިލްތިމާސް ކުރޭ
އިންފުލުއެންޒާއިން ރައްކާތެރިވުމަށް އިންފުލުއެންޒާ ވެކްސިން ޖެހުމަށް ހެލްތު ޕްރޮޓެކްޝަން އެޖެންސީ(އެޗްޕީއޭ)އިން އިލްތިމާސް ކޮށްފިއެވެ.
އިންފްލުއެންޒާ ވެކްސިން ދިނުމަށް އިލްތިމާސްކޮށް އެޗްޕީއޭއިން ވަނީ އެ އޭޖެންސީން ހޮސްޕިޓަލްތައް މެދުވެރިކޮށް ވެކްސިން ޖަހައިދިނުމުގެ ހިދުމަތް ފަށާފައިވާކަން ހާމަކޮށް ވެކްސިން ޖަހައިދޭ ގޮތުގެ ގައިޑްލައިނެއް ނެރެފަ އެވެ. އެޗްޕީއޭއިން ބުނާގޮތުގައި އުމުރުން 6 މަހުން މަތީގެ ކޮންމެ މީހަކަށްވެސް އިންފުލުއެންޒާ ވެކްސިން ޖެހޭނެއެވެ.
އެގޮތުން އިންފުލުއެންޒާ ވެކްސިން ޖަހައިދޭނީ ދަމަނަވެއްޓާއި ސެނެހިޔާ، ހުޅުމާލެ ހޮސްޕިޓަލް، އައިޖީއެމްއެޗް އަދި އޭޑީކޭ ހޮސްޕިޓަލުން ކަމަށް އެޗްޕީއޭއިން ބުނެއެވެ.
ސެނެހިޔާގައި ޑޮކްޓަރަށް ދައްކައި ބޭސް ސިޓީ ހައްދައި ވެކްސިން ޖަހައިދޭނީ ކޮންމެ ދުވަހަކު ހެނދުނު 10:00 އިން މެންދުރު 14:00 އަށެވެ. އަދި ރޭގަނޑު 20:00 އިން 12:00 އަށެވެ. ދަމަނަވެށީގައި ހެނދުނު 10:15 އިން މެންދުރު 13:30 އަށެވެ. އަދި ރޭގަނޑު ނުވައަކުން 10:00 އަށް ވެކްސިން ޖަހައިދޭނެ އެވެ. ހުޅުމާލެ ހޮސްޕިޓަލުގައި ވެކްސިން ޖަހައިދިނުމުގެ ހިދުމަތް ދޭނީ އާދީއްތަ އަދި ހުކުރު ދުވަސް ފިޔަވައި މެންދުރު 12:00 އިން 13:00 އަށެވެ.
އައިޖީއެމްއެޗާއި އޭޑީކޭގައި ހިދުމަތްދޭ ގަޑިތައް އެ ހޮސްޕިޓަލްތަކަށް ގުޅުމުން އެކަމުގެ މައުލޫމާތު ސާފުވާނެކަމަށް އެޗްޕީއޭއިން ބުނެއެވެ.
އިންފްލުއެންޒާ ވެކްސިން ޖަހަން އެޗްޕީއޭއިން އިލްތިމާސްކޮށްފައިވާއިރު އެ އޭޖެންސީން ބުދަ ދުވަހު އާންމުކުރި ތަފާސްހިސާބުތަކަށް ބަލާއިރު އިންފްލުއެންޒާގެ ކޭސްތައް ދަނީ އިތުރުވަމުންނެވެ.
