މުޒާހަރާތައް ހޫނުވެ މިޔަންމާގައި ސޯޝަލް މީޑިއާ އެޕްތައް ބޭނުންކުރުން މަނާކޮށްފި
9 ފެބުރުއަރީ 2021 | އަންގާރަ 10:45މިޔަންމާގައި ވަނީ ފޭސްބުކް، ޓްވިޓަރ އިންސްޓަގްރާމް އަދި ވަޓްސްއެޕް ބޭނުންކުރުން މަނާކޮށްފައި
މިޔަންމާގައި ކުރަމުންދާ މުޒާހަރާތަކުގެ ތެރެއިން
މުޒާހަރާތައް ހޫނުވެ މިޔަންމާގައި ސޯޝަލް މީޑިއާ އެޕްތައް ބޭނުންކުރުން މަނާކޮށްފިއެވެ.
މިޔަންމާގައި މިދިޔަ ނޮވެމްބަރުމަހު ބޭއްވި އާންމު އިންތިޚާބުގެ މައްސަލަ ހޫނުވެ މިޔަންމާގެ ސްޓޭޓް ކައުންސިލަރ އައުން ސާން ސޫޗީ އަސްކަރިއްޔާގެ ބެލުމުގެ ދަށަށް ވަނީ ގެންގޮސްފައެވެ. މިޔަންމާގެ ލީޑަރު އަން ސަން ސޫކީގެ މައްޗަށް ދައުވާތަކެއް ވެސް ވަނީ އުފުލާފައެވެ. ބީބީސީގައި ރިޕޯޓް ކޮށްފައިވާ ގޮތުން ސޫކީގެ މައްޗަށް އުފުލާފައިވާ ދައުވާތަކުގެ ތެރޭގައި ޤަވާއިދާ ޚިލާފަށް ކޮމިއުނިކޭޝަން ރޭޑިއޯތަކެއް އެތެރެކޮށް ގެންގުޅުއްވިކަމުގެ ދައުވާއާއި، އެ ޤައުމުގެ އިމްޕޯޓް އެކްސްޕޯޓް ޤާނޫނުތަކާ ޚިލާފަށް އަމަލު ކުރެއްވިކަމުގެ ކުށުގެ ދައުވާ ވެސް ހިމެނެއެވެ.
ފުލުހުންނާ ޙަވާލާދީ ބީބީސީގައި ރިޕޯޓް ކޮށްފައިވާ ގޮތުން މިހިނގާ ފެބްރުއަރީ މަހުގެ 15 ވަނަ ދުވަހުގެ ނިޔަލަށް ސޫކީ ބަންދުގައި ބެހެއްޓުމަށް ވަނީ އަމުރު ކޮށްފައެވެ. އަދި ސޫކީ މިވަގުތު ހުންނެވީ ނައިޕިޓޯގައި އެކަމަނާ ހުންނަވާ ގެކޮޅުގައި ބަންދު ކޮށްފައިކަމަށް ވެސް ރިޕޯޓުތައް ބުނެއެވެ.
އޭގެ އިތުރުން، އެ ޤައުމުގެ ރައީސް ވިން މިންޓްގެ މައްޗަށް ވެސް ދައުވާތަކެއް އުފުލާފައިވާ ކަމަށާއި، ވިން މިވަގުތު ހުންނެވީ ޖަލު ބަންދުގައި ކަމަށް ވެސް ރިޕޯޓުތައް ބުނެއެވެ. އަދި ވިންގެ މައްޗަށް ދައުވާ އުފުލާފައިވަނީ ކޮވިޑާ ގުޅިގެން އަޅުއްވާފައިވާ ފިޔަވަޅުތަކަކާ ގުޅިގެން ކަމަށް ވެސް ރިޕޯޓުތައް ބުނެއެވެ.
މިޔަމަންމާގެ އަސްކަރިއްޔާއިން ބަޣާވާތްކޮށް ސޫކީއާއި ސަރުކާރުގެ އިސްވެރިން ބަންދުކުރީ މިޔަންމާގެ ޤާނޫނު ހަދާ މަޖިލީހުގެ އިންތިޚާބުގެ ސޫކީ ނިސްބަތްވާ މިޔަންމާގެ ވެރިކަން ކުރާ ނެޝަނަލް ލީގް ފޯ ޑިމޮކްރަސީ (އެންއެލްޑީ) ޕާޓީން ބޮޑު އަޣްލަބިއްޔަތަކުން ކާމިޔާބު ކޮށްފައިވާކަން އިއުލާން ކޮށްފައިވަނިކޮށެވެ.
އަސްކަރިއްޔާގެ އަމަލުތައް ހުރިގޮތުގެ ސަބަބުން މިކަމުގެ ރައްޔިތުންގެ މެދުގައި ޚިޔާލު ތަފާތުވެ މުޒާހަރާތައް ވަނީ ކުރަން ފަށާފައެވެ.
މިޔަންމާގައި އަސްކަރިއްޔާއިން ބަޣާވާތްކޮށް ސޫޗީ ބަންދުކޮށްފައިވާ ކަމުގެ ރިޕޯޓުތައް ފެތުރެމުންދާއިރު، އެޤައުމުގެ ދައުލަތުގެ މީޑިއާ ވެސް ވަނީ އަސްކަރިއްޔާ އިން ހިސާރު ކޮށްފައި ކަމަށް ރިޕޯޓުތައް ބުނެއެވެ. އަދި އިންޓަރނެޓްގެ ޚިދުމަތާއި ފޯނުގެ ޚިދުމަތައް ބުރޫ އަރާފައިވާ ކަމަށްވެސް ރިޕޯޓުތައް ބުނެއެވެ. ޚަބަރުތައް ބުނާގޮތުން މިހާރުވަނީ ރައްޔިތުންގެ މެދުގައި ޚިޔާލު ތަފާތުވެ މުޒާހަރާތައް ފެށުމުން އެ ޤައުމުގައި ސޯޝަލް މީޑިއާ އެޕްތައް ބޭނުންކުރުން މަނާކޮށްފައެވެ. އެގޮތުން މިޔަންމާގައި ވަނީ ފޭސްބުކް، ޓްވިޓަރ އިންސްޓަގްރާމް އަދި ވަޓްސްއެޕް ބޭނުންކުރުން މަނާކޮށްފައެވެ.
މިޔަންމާގެ ޑިމޮކްރަޓިކް ލީޑަރު އަން ސަން ސޫޗީގެ ސަރުކާރު ވައްޓާލާ އެ ޤައުމުގެ ސިފައިން ގެނައި ބަޣާވާތާ ދެކޮޅަށް ކުރާ މުޒާހަރާތަކުގެ ސަބަބުން އެޤައުމުގައި ކޯވިޑް ޓެސްޓްކުރާ މިންވަރު ވަރަށް ބޮޑަށް ވަނީ ދަށަށް ގޮސްފައެވެ. އަސްކަރިއްޔާގެ ބަޣާވާތާ ދެކޮޅު ހެދުމުގެ ގޮތުން އެ ގައުމުގެ މުވައްޒަފުން މަސައްކަތް ހުއްޓާލުމަށްފަހު ގިނަ އަދަދެއްގެ ބަޔަކު ވަނީ މަގުމައްޗަށް ނުކުމެ އަސްކަރިއްޔާ ދެކޮޅަށް މުޒާހަރާކުރަން ފަށާފައެވެ. އޭގެތެރޭގައި ގިނަ ޢަދަދެއްގެ ޑޮކްޓަރުންނާއި ނަރުހުން ވެސް ހިމެނެއެވެ. މި މީހުންނާ ދެކޮޅަށް ފުލުހުންގެ ވެހިކަލްތައް ނުކުމެ ބާރު ސްޕީޑްގައި އަންނަނީ ފެންވެސް ޖަހަމުންނެވެ. މުޒާހަރާއަށް ނުކުންނަ މީހުންނަށް ފިޔަވަޅު އަޅާނެކަމުގެ އިންޒާރު ސިފައިން ދިން ނަމަވެސް މުޒާހަރާކުރާތާ ތިންދުވަސްވެފައިވާއިރު މިކަމުގައި ބައިވެރިވާ މީހުން ވެސް އަންނަނީ ގިނަވަމުންނެވެ.
