އިންޑިއާގެ ކޮވިޑް-19 ވެކްސިނޭޝަން ޕްރޮގްރާމްގެ ތިން ވަނަ މަރުހަލާ މަރޗް މަހު ފެށޭނެ ކަމަށް އެގައުމުގެ ޔޫނިއަން ހެލްތު މިނިސްޓަރ ހަރޝް ވަރްދަން ވިދާޅުވެއްޖެއެވެ.

ހަރޝް ވަރްދަން ވިދާޅުވީ މަރޗް މަހުގެ ތެރޭގައި އިންޑިއާގެ ވެކްސިނޭޝަން ޕްރޮގްރާމްގެ ތިން ވަނަ މަރުހަލާ ފަށާނެ ކަމަށާއި، މި މަރުހަލާގައި ހައި ރިސްކު މީހުންނަށާއި އުމުރުން 50 އަހަރުން މަތީގެ މީހުންނަށް އިސްކަންދެވޭނެ ކަމަށެވެ.

މިއަހަރުގެ ޖެނުއަރީ މަހުގެ 16 ވަނަ ދުވަހު އިންޑިއާގައި ކޮވިޑް-19 ވެކްސިނޭޝަން ޕްރޮގްރާމް ފަށާފައިވާއިރު، މިހާތަނަށް ހަ މިލިއަނެއްހާ މީހުންނަށް އެގައުމުން ވަނީ ވެކްސިން ދީފައެވެ. އިންޑިއާގެ ހެލްތު މިނިސްޓްރީން ބުނެފައި ވަނީ 21 ދުވަހުގެ ތެރޭގައި ފަސް މިލިއަނަށްވުރެ ގިނަ މީހުންނަށް ވެކްސިން ދިން ފުރަތަމަ ގައުމަށް އިންޑިއާ ވެފައިވާ ކަމަށެވެ.

އިންޑިއާގައި މިވަގުުތު ކޮވިޑް-19 ގެ ދެ ވެކްސިނެއް ބޭނުންކުރުމުގެ ހުއްދަ ދީފައިވާއިރު، އެއީ ބާރަތް ބައޯޓެކްގެ ކޮވެކްސް ފެސިލިޓީއާއި ސިރަމް އިންސްޓިޓިއުޓުން އުފައްދާ އެސްޓްރަޒެނެކާ-އޮކްސްފޯޑްގެ ކޮވިޝީލްޑެވެ.

އިންޑިއާގެ ޔޫނިއަން ހެލްތު މިނިސްޓަރ ވަނީ ވެކްސިން ޖަހާފައިވާ ބައެއް ފަރާތްތައް މަރުވެގެން ރިޕޯޓްކޮށްފައިވާ ކަމަށާއި އެހެން ނަމަވެސް އެއީ ވެކްސިންގެ ސަބަބުން މަރުވި މަރެއްކަން ސާބިތުވެފައި ނުވާކަމަށް ވިދާޅުވެފައެވެ. އަދި އާބާދީގެ ހަ މިލިއަނެއްހާ މީހުންނަށް ވެކްސިން ޖަހާފައިވާ އިރު، ސައިޑް އިފެކްޓްތައް ރިޕޯޓްކުރަނީ 0.000312 އިންސައްތަ މީހުން ކަމަށް ވެސް މިނިސްޓަރ ހަރޝް ވަރްދަން ވިދާޅުވިއެވެ.