ރައީސުލްޖުމްހޫރިއްޔާގެ ނައިބު ފައިސަލް ނަސީމް ކޮވިޝީލްޑް ވެކްސިން ޖައްސަވައިފިއެވެ.

ހޯމަ ދުވަހު ނައިބު ރައީސް ކުރެއްވި ޓްވީޓެއްގައި ވިދާޅުވީ، އެމަނިކުފާނު ވެކްސިންގެ ފުރަތަމަ ޑޯޒު ޖެއްސެވިކަމަށެވެ. އަދި ގައުމީ ރޫހެއްގައި ދިވެހި އެންމެހާ ރައްޔިތުން މިކަމުގައި ބައިވެރިވުމަށް ނައިބު ރައީސް ވަނީ އިލްތިމާސް ކުރައްވައިފައެވެ.

ނައިބު ރައީސް ފައިސަލް ނަސީމް ހޯމަ ދުވަހު ވެކްސިން ޖެއްސެވިއިރު، މީގެ ކުރިން މި ހިނގާ ފެބްރުއަރީ މަހުގެ 1 ވަނަ ދުވަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހާއި، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އިތުރުން އުއްތަމަ ފަނޑިޔާރު، މުއުތަސިމް އަދުނާނުވެސް ވަނީ ވެކްސިން ޖައްސަވާފައެވެ.

ވެކްސިނަށް އާންމުންގެ ފަރާތުން ބޮޑު ތަރުހީބެއް ލިބެމުން އަންނަކަމަށް ހެލްތު އިމަރޖެންސީ ސެންޓަރުގެ ތަރުޖަމާނު ޑރ. ނަޒްލާ ރަފީގު ވަނީ ވިދާޅުވެފައެވެ. ޑރ. ނަޒްލާ ވިދާޅުވީ ވެކްސިނޭޝަން ޕްރޮގްރާމް މާލެސިޓީގެ އިތުރުން އަތޮޅުތެރޭގައި ކުރިއަށްދާއިރު އެ މަންޒަރު ވަރަށް އުފާވެރިކަމަށެވެ. ވެކްސިންޖެހުމަށް ގިނަ ބަޔަކު އަންނަ ކަމަށާއި، ސަޕޯޓު ވަރަށް ބޮޑަށް ލިބެމުންދާ ކަމަށް ޑރ. ނަޒްލާ ވިދާޅުވިއެވެ. އަދި މަސައްކަތް ކުރަމުންދަނީ ވީހާ ވެސް ގިނަ ބަޔަކަށް ވެކްސިން ދިނުމަށް ކަމަށް ޑރ. ނަޒްލާ ވިދާޅުވިއެވެ.

ރާއްޖެއިން މިހާތަނަށް ވެކްސިން ޖެހި މީހުންގެ އަދަދު 9،752ށް އަރާފައިވާއިރު، މާލެ ސަރަހައްދުން 7،963 މީހަކު މިހާތަނަށް ވަނީ ވެކްސިން ޖަހާފައެވެ. އަދި އަތޮޅު ތެރެއިން 1،789 މީހަކު ވަނީ ވެކްސިން ޖަހާފައެވެ.