އަޔަލޭންޑްގެ ބޯޑަރުތަކުން ފަސޭހައިން ވިޔަފާރިކުރުމުގެ ފުރުސަތު ދިނުމަށް އިނގިރޭސިވިލާތުން ގޮވާލައިފި

އަޔަލޭންޑްގެ ބޯޑަރުތަކުން ފަސޭހައިން ވިޔަފާރިކުރުމުގެ ފުރުސަތު ދިނުމަށް އިނގިރޭސިވިލާތުން ގޮވާލައިފިއެވެ.

އިނގިރޭސިވިލާތް ވިލާތުގެ އިއްތިހާދުން މިދިޔަ އަހަރުގެ ޑިސެމްބަރު 31ގައި ވަކިވެފައިވާއިރު، އިނގިރޭސިވިލާތް ވިލާތުގެ އިއްތިހާދުން ވަކިވުމަށްފަހު ވަނީ އީޔޫގެ ސިންގަލް މާކެޓުގައި ވިޔަފާރިކުރާއިރު އިތުރު ޓެރިފްއެއް ނުނަގާގޮތަށް އެއްބަސްވެފައެވެ. އެހެންނަމަވެސް ބްރެކްސިޓަށްފަހު އިނގިރޭސި ވެރިކަމުގެ ދަށުގައި އޮންނަ އުތުރު އަޔަލެންޑާއި އީޔޫގެ މެންބަރު ޤައުމެއްކަމަށްވާ ރިޕަބްލިކް އޮފް އަޔަލެންޑާ ދެމެދު އޮންނަ ބޯޑަރުގައި ކަސްޓަމްސްގެ ކަންކަން ހިނގަމުންދާންޖެހޭނެ ގޮތާއިމެދު ގޮތެއް ނުނިންމުމުގެ ސަބަބުން ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. އެގޮތުން މި ބޯޑަރު މިދިޔަ ހަފުތާގައި އިނގިރޭސިވިލާތައް ދަތުރުނުކުރެވޭގޮތަށް ވަނީ ބަންދުވެސް ކޮށްފައެވެ. މިކަމާއި ގުޅޭގޮތުން އިނގިރޭސިވިލާތުގެ ބޮޑު ވަޒީރު ބޮރިސް ޖޮންސަން ވަނީ އަޔަލޭންޑްގެ ބޯޑަރުތަކުން ފަސޭހައިން ވިޔަފާރިކުރުމުގެ ފުރުސަތު ދިނުމަށް ގޮވާލާފައެވެ. ބޮޑުވަޒީރު ޖޮންސަންއާއި އުތުރު އަޔަލެންޑްގެ ޑިމޮކްރަޓިކް ޔޫނިއަނިސްޓް ޕާޓީއާއި ދެމެދު ޚިޔާލު ތަފާތުވެފައިވާ މި މައްސަލައިގައި ވިލާތުގެ އިއްތިހާދުން އަދި ސީދާ ޖަވާބެއް ދީފައެއް ނުވެއެއެވެ.

ބްރެކްސިޓް ޑީލް އެކުލަވާލާފައިވާގޮތުން ވިޔަފާރިކުރުމަށް ބޮޑެތި އުނދަގޫތައް ކުރިމަތިވަމުންދާކަމަށް ވިލާތުގެ ވިޔަފާރިވެރިން ދަނީ ބުނަމުންނެވެ. އިނގިރޭސިވިލާތް، ވިލާތުގެ އިއްތިހާދުން ވަކިވުމަށްފަހު އީޔޫގެ ސިންގަލް މާކެޓުގައި ވިޔަފާރިކުރާއިރު އިތުރު ޓެރިފްއެއް ނުނަގާގޮތަށް އެއްބަސްވެ، ޑިސެމްބަރުމަހުގެ 31 ވަނަ ދުވަހު ވިލާތުގެ އިއްތިހާދުން ވަނީ ވަކިވެފައެވެ. ބްރެކްސިޓަށްފަހު ވިޔަފާރިއަށް އައި ބަދަލުތަކާއި ގުޅޭގޮތުން ވާހަކަދައްކަމުން، އިނގިރޭސި ވިޔަފާރިވެރިން ވަނީ ބްރެކްސިޓް ޑީލް އެކުލަވާލިޔަސް، ވަކި ޤައުމެއްގެ ގޮތުގައި ވިޔަފާރިކުރުމަށް އެކުލަވާލަންޖެހޭ ކަރުދާސްތައް ތައްޔާރުކުރުމުގައި އެ ކުންފުނިތަކަށް ބޮޑެތި އުނދަގޫތައް ހުރިކަމަށް ބުނެފައެވެ.

މިގޮތުން އިނގިރޭސިވިލާތުގެ މި ފިޔަވަޅާއެކު ދެ ފަރާތުގެ ގުޅުން ހީނަރުވެފައިވާއިރު، މިކަމުގައި އިނގިރޭސިވިލާތުގެ ސަރުކާރުން އެ ޤައުމުގެ ކުންފުނިތަކަށް އެންމެ އެކަށޭނަ ގޮތެއްގައި އެހީތެރިވެދީފައިނުވާކަމަށް މި ކުންފުނިތަކުން ދަނީ ބުނަމުންނެވެ. މި ސަބަބަށްޓަކައި އީޔޫގެ ސިންގަލް މާކެޓުގައި ވިޔަފާރިކުރާއިރު އިތުރު ޓެރިފްއެއް ނުނަގާގޮތަށް އެއްބަސްވެފައި އޮތަސް އިނގިރޭސިވިލާތުގެ ކުންފުނިތަކަށް އެކި ޤައުމުތަކުން ކަސްޓަމްސް ޑިއުޓީއާއި މިނޫންވެސް އިތުރު ޓެރިފްތައް ކުރިމަތިކުރާކަމަށް އެ ކުންފުނިތަކުން ވަނީ ބުނެފައެވެ.