ބަރުލުސްކޯނީގެ ހުކުމް ކޯޓުން ލުއި ކުރުމާއެކު ސިޔާސީ މަގާމް ތަކަށް ފުރުސަތު ތަނަވަސް ވެއްޖެ
13 މެއި 2018 | އާދީއްތަ 04:38ޓެކްސްއަށް މަކަރު ހެއްދެވުމުގެ ކުށުގައި ބަރުލުސްކޯނީ ހުންނެވީ 6 އަހަރު ދުވަހުގެ ހުކުމެއްގައި
ފޯޒާ އިޓާލިއާ ޕާޓީގެ ރައީސް ސިލްވިއޯ ބަރުލުސްކޯނީ
އިޓަލީގެ ކުރީގެ ބޮޑުވަޒީރު ސިލްވިއޯ ބަރުލުސްކޯނީ އަށް ސިޔާސީ މަގާމުތައް ނުފުރޭ ގޮތައް ކޯޓުން ކުރިން ކޯޓުން ކޮށްފައި އޮތް ހުކުމް އިޓަލީގެ ކޯޓަކުން ބާތިލް ކޮށްފިއެވެ.
މީގެ މާނައަކީ ކުރިއަށް އޮތް އިންތިޚާބު ތަކުގައި ބަރުލުސްކޯނީއަށް ވާދަ ކުރެއްވުމުގެ ފުރުސަތު ލިބިވަޑައިގަތުމެވެ.
ޓެކްސް އަށް މަކަރު ހެއްދެވުމުގެ ކުށް ސާބިތުވެ 2013 ވަނަ އަހަރު ބަރުލުސްކޯނީ ވަނީ ގާނޫނު ހަދާ މަޖިލީހުން ބޭރު ކޮށްލައިފައެވެ. އޭގެ އިތުރުން އެއްވެސް އިންތިޚާބީ މަގާމަކަށް ހަ އަހަރު ދުވަހުގެ މުއްދަތަކަށް ވަޑައިނުގެންނެވޭނެ ކަމަށް ވެސް ހުކުމުގައި އޮތީ ކަނޑައަޅާފައެވެ.
ނަމަވެސް އިޓަލީގެ މިލާންގެ ކޯޓަކުން ހޮނިހިރު ދުވަހު ކުރި ހުކުމުގައި ބުނެފައިވަނީ ބަރުލުސްކޯނީގެ މައްޗަށް ކޮށްފައިވާ ހުކުމް އެއް އަހަރު ކުރިން ނިމުމަކަށް ގެނެވިދާނެ ކަމަށާއި، އެ ގޮތައް ނިންމީ، އެމަނިކުފާނު ހުކުމުގެ މުއްދަތުގެ ތެރޭގައި ރަނގަޅަށް އުޅުއްވާފައި ވާތީ ކަމަށެވެ.
ހުކުމް މި ގޮތައް އައުމުން ބަރުލުސްކޯނީގެ ޕާޓީ ފޯޒާ އިޓާލިއާ އިން ބުނީ އެންމެ ފަހުން ފަސް އަހަރު ދުވަހުގެ ބޭއިންސާފު ނިމުމަކަށް އަތުވެއްޖެ ކަމަށާއި އަނެއްކާވެސް އެމަނިކުފާނަށް ކެނޑިޑޭޓަކަށް ވެވަޑައިގެންނެވޭނެ ކަމަށެވެ.
ހުސްވި މާޗް މަހު ބޭއްވި އިންތިޚާބުގައި ބަރުލުސްކޯނީގެ ޕާޓީއަށް ކެމްޕޭން ކުރެއްވުމުގައި އޭނާ ވަރަށް ބޮޑަށް މަސައްކަތް ކުރެއްވި ނަމަވެސް އުއްމީދު ކުރި ނަތީޖާ އެ ޕާޓީއަށް ލިބިފައެއް ނުވެއެވެ.
ބަރުލުސްކޯނީ ވިދާޅުވީ، އުއްމީދު ކުރި ކާމިޔާބީ ޕާޓީ އަށް ނުލިބުނީ އޭރު އޮތް ހުކުމުގެ ސަބަބުން އޭނާ އަށް ބޮޑުވަޒީރު ކަމަށް ވަޑައިނުގެންނެވޭނެ ކަމަށް މީހުންނަށް އެނގޭތީ ކަމުގައެވެ.
