އެމެރިކާގެ ކުރީގެ ޚާރިޖީ ވަޒީރު ޖޯޖް ޝޫޒް އަވަހާރަވެއްޖެ

އެމެރިކާގެ ކުރީގެ ޚާރިޖީ ވަޒީރު ޖޯޖް ޝޫޒް އިއްޔެ އަވަހާރަވެއްޖެއެވެ.

އަވަހާރަވިއިރު އުމުރުފުޅަކީ 100 އަހަރެވެ. ޖޯޖް ޝޫޒަކީ ރައީސް ރޮނަލްޑް ރޭގަންގެ ދައުރުގައި 6 އަހަރު ޚާރިޖީ ވަޒީރުކަން ކުރެއްވި ބޭފުޅެކެވެ.

ފާއިތުވި 75 އަހަރުގެ ތެރޭގައި އެންމެ ދިގު މުއްދަތަކަށް އެމެރިކާގެ ޚާރިޖީ ވަޒީރުކަން ކުރެއްވި ބޭފުޅަކީވެސް ޖޯޖް ޝޫޒް އެވެ. ޝޫޒްގެ ޚާރިޖީ ވަޒީރުކަމުގެ ދައުރުގައި އޭނާ އިސްނަންގަވައިގެން ދުނިޔޭގެ ސުލްޙއާއި ހަމަޖެހުމަށްޓަކައި ވަރަށް ބޮޑު ދެކަމެއް ކާމިޔާބު ކުރެއްވިއެވެ.

ފުރަތަ ކަމަކީ ނިއުކުލިއަރ މިސައިލް މަދުކުރުމުގެ އެއްބަސްވުމެއް ރޫސީވިލާތާއެކު ގާއިމު ކުރެއްވުމެވެ. ދެވަނަ ކަމަކީ މެދުއިރުމައްޗަށް ދާއިމީ ސުލްޙައެއް ގެނައުމުގެ ގޮތުން މަޝްވަރާ މޭޒުދޮށަށް އަރަބީންނާއި އިސްރާއީލީން ގެނެސް އެޖެންޑާއެއް ގާއިމުކުރެއްވުމެވެ.

މިކަމުގައި އެމެރިކާގެ ބައިވެރިވުން އިތުރުކުރެއްވުމެވެ. ޖޯޖް ޝޫޒްގެ ޑިޕްލޮމެޓިކް ކާމިޔާބީތަކާއި އެހެނިހެން ޚިދުމަތްތަކުގެ އަގު ވަޒަންކޮށް އެމެރިކާގައި މަދަނީންނަށް ދެވޭ އެންމެ މަތީ ޝަރަފުކަމަށްވާ ޕްރެޒިޑެންޝަލް މެޑަލް އޮފް ފްރީޑަމް 1989 ގައި އޭނާއަށް އަރުވާފައިވެއެވެ.

ޖޯޖް ޝޫޒް ނިސްބަތްވެވަޑައިގެންނެވީ ރިޕަބްލިކަން ޕާޓީއަށެވެ. ރޭގަންގެ ދައުރުގައި ޚާރިޖީ ވަޒީރުކަން ކުރެއްވުމުގެ ކުރީގައި ރިޗަރޑް ނިކްސަންގެ ދައުރުގައި ލޭބަރ ވަޒީރުކަމާއި މާލީ ވަޒީރުކަން ވެސް ކުރެއްވިއެވެ.

ޖޯޖް ޝޫޒް އަވަހާރަވުމާ ގުޅިގެން އެމެރިކާގެ ކުރީގެ އެހެން ޚާރިޖީ ވަޒީރެއް ކަމަށްވާ ކޮންޑޮލީޒާ ރައިސް ވިދާޅުވެފައިވަނީ ޖޯޖް ޝޫޒްގެ ޒިކުރާ ދެމިގެންދާނީ ދުނިޔެ އިހަށްވުރެ އަމާން ރައްކާތެރި ތަނަކަށް ހެއްދެވި ޚިކުމަތްތެރިއެއްގެ ގޮތުގައި ކަމަށެވެ.