އިނގިރޭސި ޕްރިމިއާ ލީގުގައި އާދީއްތަ ދުވަހުގެ ހަވީރު ރެލިގޭޝަން ޒޯނުގައި އޮތް ވެސްޓް ބްރޮމް އަތުން ޓޮޓެންހަމް ހޮޓްސްޕާ މޮޅުވެއްޖެއެވެ.

އަމިއްލަ ދަނޑުގައި ކުޅުނު މެޗުން ޓޮޓެންހަމް މޮޅުވީ 2-0 ގެ ނަތީޖާއަކުންނެވެ.

މި މެޗުގެ ފުރަތަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފުގެ ކުރީކޮޅު ޓޮޓެންހަމުން ވަނީ ގާތްގާތުގައި ދެ ލަނޑު ޖަހާފައެވެ. އެގޮތުން ދެވަނަ ހާފު ފަށައިގެން ނުވަވަނަ މިނެޓުގައި ޓޮޓެންހަމަށް ލީޑު ނަގައިދިނީ އިތުބާރު ފޯވާޑް ހެރީ ކޭންއެވެ. މި މެޗުގައި ކޭން ލަނޑު ޖެހިއިރު، މިއީ ތަނބިކައްޓަށް ލިބުނު އަނިޔާއިން ރަނގަޅުވެ ކޭން ކުޅުނު ފުރަތަމަ މެޗެވެ. އަދި މިއީ މި ސީޒަނުގެ ޕްރިމިއާ ލީގުގައި ކޭން ކާމިޔާބުކުރި 13 ވަނަ ލަނޑެވެ.

މި މެޗުގައި ޓޮޓެންހަމުން ވެސްޓް ބްރޮމުގެ ގޯލާ އަމާޒުކޮށް ގިނަ ހަމަލާތަކެއް އުފައްދާފައިވާއިރު، އެ ޓީމުން ލީޑު ފުޅާކޮށްފައިވަނީ ލީޑު ނެގިތާ ހަތަރު މިނެޓު ފަހުންނެވެ. ލޫކަސް މޯރާ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ފޯވާޑް ސޮން ހުއެން-މިންއެވެ.

މި މޮޅާއެކު ޓޮޓެންހަމް އޮތީ ތާވަލުގެ ހަތްވަނައިގައި ކުޅުނު 22 މެޗުން ލިބުނު 36 ޕޮއިންޓާއެކުއެވެ. ތާވަލުގެ އަށްވަނައިގައި އޮތް ޗެލްސީއަށްވެސް 22 މެޗުން 36 ޕޮއިންޓް ލިބިފައިވާއިރު، ޓޮޓެންހަމަށް ކުރި ލިބެނީ ލަނޑުގެ ތަފާތުންނެވެ. އަދި އާދީއްތަ ދުވަހުގެ ހަވީރު ޓޮޓެންހަމް އަތުން ބަލިވި ވެސްޓް ބްރޮމް އޮތީ ތާވަލުގެ ފުލުން ދެވަނައިގައި 23 މެޗުން 12 ޕޮއިންޓާއެކުއެވެ.