ވޮލީބޯޅައިގެ ބައިނަލްއަގުވާމީ ދެ މުބާރާތެއް މި އަހަރު ރާއްޖޭގައި

ވޮލީބޯޅައިގެ ބައިނަލްއަގުވާމީ ދެ މުބާރާތެއް މި އަހަރު ރާއްޖޭގައި ބޭއްވުމަށް ތާވަލުކޮށްފިއެވެ.

"ރާއްޖެ.އެމްވީ" އަށް މައުލޫމާތުދެއްވަމުން ސެންޓްރަލް އޭޝިއަން ވޮލީބޯލް އެސޯސިއޭޝަނުގެ ރައީސް މުޙައްމަދު ލަތީފް ވިދާޅުވީ އޭވީސީ ސެންޓްރަލް ޒޯން ޗެލެންޖް ކަޕުގެ އަންހެން ޑިވިޝަނާއި، ބީޗް ވޮލީބޯލް ޗެލެންޖް ކަޕުގެ އަންހެން އަދި ފިރިހެން ޑިވިޝަނުގެ މުބާރާތްތައް މި އަހަރު ރާއްޖޭގައި ބޭއްވިގެންދާނެ ކަމަށެވެ.

މީގެ ތެރެއިން އޭވީސީ ސެންޓްރަލް ޒޯން ޗެލެންޖް ކަޕުގެ އަންހެން ޑިވިޝަނަކީ މިދިޔަ އަހަރު ރާއްޖޭގައި ބޭއްވުމަށް އެންމެ ފުރަތަމަ ތާވަލުކުރި މުބާރާތެކެވެ. އެކަމަކު ކޮވިޑް-19 އާ ގުޅިގެން އެ މުބާރާތް ވަނީ މި އަހަރަށް ފަސްކޮށްފައެވެ.

އެއާއެކު އެ މުބާރާތް މި އަހަރުގެ އޮކްޓޯބަރު މަހު ރާއްޖޭގައި ބާއްވާއިރު، މި މުބާރާތުގައި ނުވަ ގައުމަކުން ވާދަކުރާނެއެވެ. އެއީ ރާއްޖޭގެ އިތުރުން ބަންގްލަދޭޝް އާއި، ނޭޕާލާއި، އަފްޣާނިސްތާނާއި، ބޫޓާނާއި، ކިރްގިސްތާނާއި، ތަޖިކިސްތާނާއި، އުޒްބެކިސްތާން އަދި ތުރުކުމެނިސްތާނެވެ.

މި މުބާރާތް ބޭއްވުމުގެ ބިޑް 2019 ވަނަ އަހަރުގެ އޯގަސްޓް މަހު ރާއްޖެއިން ކާމިޔާބުކުރިއިރު، އެ ފަހަރު ރާއްޖެއިން ވަނީ ސެންޓްރަލް ޒޯނުގެ ފިރިހެން މުބާރާތް ބާއްވަންވެސް ކުރިމަތިލާފައެވެ. އެކަމަކު އެ ފުރުސަތު ލިބުނީ ބަންގްލަދޭޝްއަށެވެ.

މީގެ އިތުރުން ބީޗް ވޮލީބޯލް ޗެލެންޖް ކަޕް މި އަހަރު ރާއްޖޭގައި ބާއްވަން ނިންމާފައިވާއިރު، އެ މުބާރާތް އޮންނާނީ ނޮވެމްބަރު މަހުގެ ތެރޭގައެވެ. އަންހެން އަދި ފިރިހެން ޑިވިޝަންވެސް ހިމެނޭ މި މުބާރާތުގައިވެސް ނުވަ ގައުމަކުން ވާދަކުރުމަށް ވަނީ ހަމަޖެހިފައެވެ.

ވޮލީބޯޅައިގެ ބައިނަލްއަގުވާމީ ދެ މުބާރާތެއް މި އަހަރު ރާއްޖޭގައި ބާއްވާއިރު، މީގެ ކުރިން ރާއްޖޭގައި ވަނީ ވޮލީބޯޅައިގެ ބައިނަލްއަގުވާމީ ދެ މުބާރާތެއް ބާއްވާފައެވެ. އެއީ 2017 ވަނަ އަހަރު ރާއްޖޭގައި ބޭއްވި ވޯލްޑް ޗެމްޕިއަންޝިޕް އަންހެން ވޮލީބޯޅަ މުބާރާތުގެ އޭވީސީ ކޮލިފައިންގ ބުރާއި، ސީނިއާ މެންސް ސެންޓްރަލް ޒޯން ވޮލީބޯލް ޗެމްޕިއަންޝިޕެވެ.