ސައުދީގެ މަދަދާއެކު ޔަމަންގައި ހިންގާ ހަމަނުޖެހުންތަކަކަށް މަދަދުވެރިއެއް ނުވާނަން: ބައިޑަން

ސައުދީގެ މަދަދާއެކު ޔަމަންގެ ސަރުކާރުން އިދިކޮޅު ހޫޘީންނާ ދެކޮޅަށް ހިންގާ ހަމަނުޖެހުންތަކަކަށް އެމެރިކާއިން ދެން މަދަދުވެރިއެއް ނުވާނަނެކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.

ބައިޑަން މިހެން ވިދާޅުވެފައިވާއިރު، އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައި ސައުދީ އާއި އެމެރިކާގެ ގުޅުން ވަނީ ވަރަށް ބޮޑަށް ބަދަހިވެފައެވެ. އަދި ސައުދީގެ ވަލީއަހުދު މުހައްމަދު ބިން ސަލްމާނާއި އެމެރިކާގެ އޭރުގެ ރައީސް ޓްރަމްޕަކީ ގާތް ދެ އެކުވެރިންކަމަށް ގިނަ ފަރާތްތަކުން ސިފަކުރެއެވެ. އެމެރިކާގެ ވެރިކަން ބަދަލުވެ އިދިކޮޅު ޑިމޮކްރެޓުން ވެރިކަމަށް އައިސް މި ގުޅުން ބަދަލުވެގެންދާނެކަމަށް ގިނަ ބަޔަކު ޤަބޫލުކުރިއެވެ. ކަންތައް ވެގެން ގޮސްފައި ވެސް ވަނީ މިފަދައިންނެވެ. އެގޮތުން މިދިޔަ ޖަނަވަރީމަހު ހުވާކުރެއްވި އެމެރިކާގެ އައު ރައީސް ޖޯ ބައިޑަން މިވަނީ ސައުދީގެ މަދަދާއެކު ޔަމަންގެ ސަރުކާރުން އިދިކޮޅު ހޫޘީންނާ ދެކޮޅަށް ހިންގާ ހަމަނުޖެހުންތަކަކަށް އެމެރިކާއިން ދެން މަދަދުވެރިއެއް ނުވާނެކަމަށް ވިދާޅުވެފައެވެ.

ބައިނަލްއަޤުވާމީ ގޮތުން ބަލައިގަނެފައިވާ ޔަމަނުގެ އޭރުގެ ރައީސް އަބްދުއް ރައްބު މަންސޫރު ހާދީގެ ސަރުކާރަށް ވާގިވެރިވުމުގެ ގޮތުން ޔަމަނުގެ ހަނގުރާމައިގެ ތެރެއަށް ސައުދީގެ ގުޅިފައިވާ ލަޝްކަރުން ވަނީ 2015 ވަނަ އަހަރުގެތެރޭގައެވެ. އެ ލަޝްކަރުން މަސައްކަތްކުރީ ޔަމަނު ސަރުކާރާ ދެކޮޅަށް ހަނގުރާމަކުރަމުންދިޔަ ހޫޘީން މަތަކުރުމަށެވެ. އެގޮތުން ދިން އަސްކަރީ ވައިގެ ޙަމަލާތަކުގައި އާންމުންގެ އެތައް ހާސް މީހުން މަރުވިއެވެ. މީގެތެރޭގައި ސްކޫލްތަކާއި، ހޮސްޕިޓަލްތަކާއި، ބާޒާރު ޞަރަޙައްދުތަކަށްދޭ ޙަމަލާތަކުގައި މަރުވާ މީހުންގެ އަދަދު ގިނަކަމުން ސައުދީގެ ގުޅިފައިވާ ލަޝްކަރަށް ބައިނަލްއަޤުވާމީ ޤައުމުތަކުގެ ފާޑުކިޔުންތައް އަމާޒުވިއެވެ.

ޔަމަންގެ މައްސަލައަށް ހައްލު ހޯދުމަށް އދ.އިން ވެސް ދަނީ މަސައްކަތް ކުރަމުންނެވެ. ޔަމަންގެ ސުލްޙައިގެ ވާހަކަތަކުގައި ވާދަވެރި އެއްވެސް ފަރާތެއްގެ ކޮޅަށް އދ. ބުރަނުވާ ކަމަށް އދ. ގެ ސެކްރެޓަރީ ޖެނެރަލް އެންތޯނިއޯ ގުތޭރޭޝް ވަނީ ވިދާޅުވެފައެވެ.

ޔަމަންގެ ރައީސް އަބްދުއް ރައްބު މަންސޫރު ހާދީއަށް ފޮނުއްވި ސިޓީއެއްގައި ގުތޭރޭޝް ވަނީ ޔަމަންގެ ސުލްޙައިގެ ވާހަކަތަކުގައި އދ.ގެ މަންދޫބު މާޓިން ގްރިފިތްސް ހޫޘީންގެ ކޮޅަށް ބުރަވެވަޑައިގަންނަވާ ކަމަށް ވިދާޅުވެ ހާދީ ކުރެއްވި ތުހުމަތުތަކަށް އިންކާރު ކުރައްވާފައެެވެ. ގުތޭރޭޝް ވިދާޅުވީ އދ. އަކީ ނަޒާހަތްތެރި މެދުވެރިއެއް ކަމަށާއި، މިކަމުގައި އެއްވެސް ފަރާތަކުން އދ.އަށް ގޯސް ތުހުމަތުތަކެއް ކުރުމަކީ ހިތާމަ ހުރިކަމެއް ކަމަށެވެ. މި މޭމަހުގެ ސާދަވަނަ ދުވަހު އދ.ން ވަނީ ޔަމަންގެ ބަނދަރުމަތީ ރަށްތައް ކަމަށްވާ ހުދައިދާ، ސަލީފް އަދި ރައްސުއީސާއިން ހޫޘީންގެ ބާރުތައް ފޭބިކަން އިޢުލާންކޮށްފައެވެ.

އެހެންނަމަވެސް ހާދީގެ ސަރުކާރުންވަނީ އދ.ން ބުނިގޮތަށް އެކަން ނުހިނގާކަމަށް ބުނެ، ހޫޘީންގެ ކޮޅަށް ބުރަވާކަމުގެ ތުހުމަތު އދ.ގެ މަންދޫބު މާޓިން ގްރިފިތްސްގެ މައްޗަށް ކޮށްފައެވެ.