ރެއާލުން ފަހަތުން އަރައި ހުއެސްކާ ބަލިކޮށްފި

ސްޕެނިޝް ލީގުގައި ހޮނިހިރު ދުވަހުގެރޭ ކުޅުނު މެޗުން އެންމެ ފަހުގެ ޗެމްޕިއަން ރެއާލް މެޑްރިޑުން ފަހަތުން އަރައި ތާވަލުގެ ފުލުގައި އޮތް ހުއެސްކާ ބަލިކޮށްފިއެވެ.

ރަށުން ބޭރުގައި ކުޅުނު މެޗުން ރެއާލް މޮޅުވީ ފަހަތުން އަރައި 2-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ފެނިފައި ނުވާއިރު، ދެވަނަ ހާފުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީ ހުއެސްކާއިންނެވެ. އެގޮތުން ދެވަނަ ހާފު ފަށައިގެން ތިންވަނަ މިނެޓުގައި ޝިންޖީ އޮކަޒާކީ ނަގައިދިން ހުރަހަކުން މި ލަނޑު ހުއެސްކާއަށް ކާމިޔާބުކޮށްދިނީ ހަވީ ގަލަންއެވެ.

އެކަމަކު އޭގެ ހަތް މިނެޓު ފަހުން ޑިފެންޑަރު ރަފައެލް ވަރާން ވަނީ ލަނޑެއް ޖަހައި، ރެއާލަށް ނަތީޖާ އެއްވަރުކޮށްދީފައެވެ. އޭނާ މި ލަނޑު ކާމިޔާބުކުރީ ކަރިމް ބެންޒެމާ ފޮނުވާލި ހިލޭ ޖެހުން، ގޯލުގެ ދަނޑީގައި ޖެހިފައި ނުކުތް ވަގުތު، އެ ބޯޅަ ބޮލުން ގޯލުގެ ތެރެއަށް ފޮނުވާލައިގެންނެވެ. އަދި މި މެޗުން ރެއާލް މޮޅުކޮށްދިން ލަނޑު މެޗު ނިމެން ހަ މިނެޓަށް ވެފައި ވަނިކޮށް ކާމިޔާބުކޮށްދިނީވެސް ވަރާނެވެ.

މި މޮޅާއެކު ޕްރެޝަރު ކުރިމަތިވެފައިވާ ރެއާލުގެ ކޯޗު ޒިނެދިން ޒިދާނަށް ވަނީ ހިތްހަމަޖެހުމެއް ލިބިފައެވެ. އެގޮތުން މި މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ޒިދާން ވަނީ އޭނާގެ މުސްތަގުބަލާ ބެހޭ ގޮތުން ހަގީގަތާ ޚިލާފު ވާހަކަތައް ފަތުރާތީ އެކަމާ ވަރަށް ބޮޑަށް ހިތްހަމަނުޖެހުން ފާޅުކޮށްފައެވެ. އެގޮތުން ޒިދާން ވަނީ ނޫސްވެރިން އޭނާއަށް ކޮންމެވެސް ވަރަކަށް އިޙުތިރާމުކުރަން ޖެހޭ ކަމަށްވެސް ބުނެފައެވެ.

ހޮނިހިރު ދުވަހުގެރޭގެ މޮޅާއެކު ތާވަލުގެ ދެވަނައަށް ރެއާލް ޖެހިލިއިރު، އެ ޓީމަށް ވަނީ ކުޅުނު 21 މެޗުން 43 ޕޮއިންޓް ލިބިފައެވެ. އެއްވަނައިގައި އޮތް އެތުލެޓިކޯ މެޑްރިޑަށް 19 މެޗުން 50 ޕޮއިންޓް ލިބިފައިވާއިރު، ތިންވަނައިގައި އޮތް ބާސެލޯނާއަށް 20 މެޗުން ވަނީ 40 ޕޮއިންޓް ލިބިފައެވެ. އަދި ރެއާލް އަތުން ބަލިވި ހުއެސްކާ އޮތީ ތާވަލުގެ ފުލުގައި 22 މެޗުން 16 ޕޮއިންޓާއެކުއެވެ.