ތިނަދޫ ރީޖަނަލް ޕޯޓް: ފެން ހިންދާ ނިޒާމް ޤާއިމުކުރުމުގެ 50 އިންސައްތަ މަސައްކަތް ނިމިއްޖެ
މި މަޝްރޫޢުއަކީ 15 މިލިއަން ރުފިޔާ ޚަރަދު ކުރާނެ
ތިނަދޫ ރީޖަނަލް ޕޯޓް ތަރައްޤީ ކުރުމުގެ މަޝްރޫޢުގެ ތެރެއިން
ތިނަދޫ ރީޖަނަލް ޕޯޓް ތަރައްޤީކުރުމުގެ މަޝްރޫޢުގެ ތެރެއިން ފެންހިންދާ ނިޒާމް ޤާއިމުކުރުމުގެ 50 އިންސައްތަ މަސައްކަތް ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ބުނެފިއެވެ.
އެމް.ޓީ.ސީ.ސީ. އިން ބުނީ ގދ. ތިނަދޫ ރީޖަނަލް ޕޯޓް ތަރައްޤީކުރުމުގެ މަޝްރޫޢުގެ ފުރަތަމަ ފިޔަވަހީގެ މަސައްކަތުގެ %30 ނިމިފައިވާ ކަަމަށާއި ލެވެލް ކުރުމާއި ސަރވޭ ކުރުމުގެ މަސައްކަތްތައް ވެސް ނިމިފައިވާ ކަމަށެވެ.
މި މަޝްރޫޢުގެ ދަށުން 4500 ކިއުބިކް މީޓަރުގެ ސަރަޙަދެއްގެ ނެރު ފުންކުރުމާއި 3000 އަކަ މީޓަރުގެ ސަރަޙައްދެއްގައި ރީއިންފޯސް ކޮންކްރީޓް އެޅުމާއި ފެން ހިންދާ ނިޒާމެއް ޤާއިމުކުރުމަށް ނިންމާފައިވާ ކަމަށް ވެސް އެ ކުންފުނިން ބުނެއެވެ.
މި މަޝްރޫޢުއަކީ 15 މިލިއަން ރުފިޔާ ޚަރަދުކޮށްގެން ހިންގުމަށް ނިންމާފައިވާ މަޝްރޫޢުއެކެވެ. އެމް.ޓީ.ސީ.ސީ.އާ މި މަސައްކަތް ޙަވާލުކޮށްފައިވަނީ 45 ދުވަހުގެ ތެރޭގައި ނިންމާ ގޮތަށެވެ.
ތިނަދޫ ޕޯޓުގައި 180 ފޫޓުގެ މަގަތުފާލަމަކާއި މުދާ ބަހަށްޓާ ބޮޑު ގުދަންތަކަކާއި، އަދި 1200 އަކަފޫޓުގެ އޮފީސް ޢިމާރާތެއް ހުންނަގޮތަށް ޕްލޭން ކުރެވިފައިވެއެވެ.
މި މަޝްރޫޢު ނިމިގެންދާއިރު ރީޖަނަލް ޕޯޓް ގާއިމްކުރާ ސަރަޙައްދުގެ ބިން އެއްވަރުކޮށް ސްޓޯމް ވޯޓަރ ޑްރެއިނޭޖް ގާއިމްކޮށް ސެކިއުރިޓީ ފެންސް ޖެހިގެންދާނެއެވެ. އަދި މި މަސައްކަތް ނިމެންވާއިރަށް ޕޯޓްގައި ބޭނުންކުރާ ވެހިކަލްތަކާއި ސާމާނު ގެނައުމަށް ވެސް ވަނީ ހަމަޖެހިފައެވެ.
