ހުޅުމާލޭގައި 2000 ސޯޝަލް ހައުސިން ޔުނިޓު އިމާރާތްކުރުމުގެ އެއްބަސްވުމުގައި ސޮއިކޮށްފި
އެއްބަސްވުމުގައި ސޮއިކޮށްފައިވަނީ ފެބްރުއަރީ 2، 2021 ގައި
ހުޅުމާލެ ދެވަނަ ފިޔަވަހީގައި އެޅުމަށް ނިންމާފައިވާ ފްލެޓްތަކުގެ ޑިޒައިނެއް
ހުޅުމާލޭގައި 2000 ސޯޝަލް ހައުސިންގ ޔުނިޓު އިމާރާތްކުރުމުގެ އެއްބަސްވުމުގައި ސޮއިކޮށްފިއެވެ.
ފެބްރުއަރީ 2، 2021 ގައި މި އެއްބަސްވުމުގައި ސޮއިކޮށް 2000 ސޯޝަލް ހައުސިން ޔުނިޓު އިމާރާތްކުރުމަށް އިންޑިއާގެ ނެޝަނަލް ބިލްޑިންގްސް ކޮންސްޓްރަކްޝަން ކޮމްޕެނީ (އެން.ބީ.ސީ.ސީ)އާއި ޙަވާލުކޮށްފައިވަނީ ރައްޔިތުންނަށް އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމުގެ މަޤުޞަދުގައި އުފައްދާފައިވާ ފަހި ދިރިއުޅުން ކޯޕަރޭޝަން ލިމިޓެޑުންނެވެ.
މިކަމާ ގުޅޭގޮތުން މަޢުލޫމާތު ދެމުން ފަހި ދިރިއުޅުން ކޯޕަރޭޝަނުން ބުނިގޮތުގައި ޤާއިމުކުރި އެއްބަސްވުމުގެ ދަށުން 2000 ސޯޝަލް ހައުސިން ޔުނިޓް ޑިޒައިންކޮށް، ފައިނޭންސްކޮށް، އިމާރާތްކުރުމުގެ މަސައްކަތް އެން.ބީ.ސީ.ސީއާ ވަނީ ހަވާލުކޮށްފައިވާ ކަމަށެއެވެ. މި މަޝްރޫޢުގެ ދަށުން 3 ކޮޓަރި އަދި 3 ފާޚާނާގެ 1400 ޔުނިޓާއި، 2- ކޮޓަރި އަދި 2 ފާޚާނާގެ 600 ޔުނިޓު އެޅުމަށް ވަނީ ހަމަޖެހިފައެވެ. މި މަޝްރޫޢުގެ ފައިނޭންސިންގެ 85 އިންސައްތައާއި 100އިންސައްތަ ހަމަޖައްސާނީ ކޮންޓްރެކްޓަރގެ ފަރާތުންކަމަށް ފަހި ދިރިއުޅުން ކޯޕަރޭޝަން ލިމިޓެޑުން މަޢުލޫމާތުދެއެވެ. އަދި މި މަޝްރޫއުގެ މަސައްކަތް ފަށާތާ 900 ދުވަހުގެ ތެރޭގައި ފުރިހަމަކުރެވޭނެ ކަމަށް ބެލެވޭކަމަށް އެ ކޯޕަރޭޝަނުން ވަނީ ބުނެފައެވެ.
2018 ވަނަ އަހަރު 1 ބިލިއަން ޑޮލަރަށްވުނެ ގިނަ އަދަދެއްގެ ކޮންސޮލިޑޭޓެޑް ރެވެނިއު ޖެނެރޭޓްކޮށްފައިވާ އެން.ބީ.ސީ.ސީއަކީ އިންޑިއާ ސަރުކާރުން 1960 ވަނަ އަހަރު ގާއިމްކޮށްފައިވާ ބްލޫ-ޗިޕް ކުންފުންޏެކެވެ. އެން.ބީ.ސީ.ސީ އަކީ ޕްރޮޖެކްޓް މެނޭޖްމެންޓް ކޮންސަލްޓެންސީ، ރިއަލް އެސްޓޭޓް ޑިވެލޮޕްމެންޓް އަދި އީ.ޕީސީ ކޮންޓްރެކްޓިން ފަދަ މަސައްކަތްތަކުގައި ހުނަރު ހުރި، ވަރުގަދަ ކުންފުންޏެއްކަމަށް ފަހި ދިރިއުޅުން ކޯޕަރޭޝަނުން މަޢުލޫމާތުދެއެވެ. އަދި ދިވެހިރާއްޖޭގައި އިންޑިއާގެ ގްރާންޓް އެހީގެ ދަށުން ހިންގޭ އެންމެ ބޮޑު މަޝްރޫޢު ކަމަށްވާ އައްޑޫ ސިޓީ ނެޝަނަލް ކޮލެޖް ފޯ ޕޮލިސިން އެންޑް ލޯ އެންފޯސްމެންޓް ސްޓަޑީޒް (އެން.ސީ.ޕީ.އެލް.އީ.އެސް) ގެ މަސައްކަތް ފުރިހަމަ ކުރުމުގައި ވެސް އެން.ބީ.ސީ.ސީގެ ބައިވެރިވުން ހިމެނެއެވެ.
އެން.ބީ.ސީ.ސީ އިން ވަނީ ދުނިޔޭގެ އެކި ގައުމުތަކުގައި މަތީ ފަންތީގެ މަޝްރޫޢުތަކެއް ފުރިހަމަކޮށްފައެވެ. އޭގެ ތެރޭގައި މޮރިޝަސްގެ ޕޯޓް ލުއިސްގައި ހުންނަ އެގައުމުގެ ސުޕްރީމް ކޯޓު އިމާރާތުގެ މަސައްކަތާއި ނޮވެމްބަރ 2020 ގައި އޯ.އައި.ސީ މިނިސްޓަރުންގެ ބައްދަލުވުން ބޭއްވި އިމާރާތްކަމުގައިވާ ނައިޖާގެ ނިއާމޭގައި ހުންނަ މަހާތުމާ ގާންދީ އިންޓަނޭޝަނަލް ކޮންވެންޝަން ސެންޓަރ ބިނާކުރުމުގެ މަސައްކަތް ހިމެނެއެވެ.
ހުޅުމާލޭގައި 2000 ސޯޝަލް ހައުސިން ޔުނިޓު އިމާރާތްކުރުމަށް އެއްބަސްވުމުގައި ސޮއިކޮށްފައިވާއިރު، މިއަހަރުގެ ރިޔާސީ ބަޔާން އިއްވަވައި ދެއްވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވަނީ، މާލޭގެ ބޯހިޔާވަހިކަމަށް ޙައްލެއް ހޯދުމަށް ރޭވި މަޝްރޫޢުތައް، ދިމާވި ބައެއް ސަބަބުތަކާ ހެދި މަޑުޖެހުމަށްފަހު، އެމަޝްރޫޢުތަކުގެ މަސައްކަތް މިހާރު ކުރިއަށް ދާކަމަށް ވިދާޅުވެފައެވެ. އެގެތެރެއިން 1000 ހައުސިންގ ޔުނިޓްގެ އަމަލީ މަސައްކަތް މިހާރު ފަށާފައިވާ ކަމަށް ރައީސުލްޖުމްހޫރިއްޔާ ވިދާޅުވިއެވެ. 2000 ހައުސިންގ ޔުނިޓާއެކު، މިއަހަރު ނިމުމުގެ ކުރިން މަދުވެގެން 5000 ހައުސިންގ ޔުނިޓްގެ އަމަލީ މަސައްކަތް މާލެ ސަރަޙައްދުގައި ފެށޭނެ ކަމަށާއި، އޭގެ އިތުރުން މާލޭގެ ރަށްވެހިންނަށް ބޯހިޔާވަހިކަން ހޯދައިދިނުމަށް، އިތުރު މަޝްރޫޢެއް ފެށުމަށް ރާވަމުންދާކަމަށް ރައީސް ޞާލިޙް ވިދާޅުވިއެވެ.
