ހެޔޮވެރިކަމުގެ ނިޒާމަކީ، ވެރިން އެކަމަށް ޖާގަދިނުމުން ވާކަމެއްކަން ރައީސް ޞާލިޙު ދައްކުވައިދެއްވައިފި: ޝިފާޒް
6 ފެބުރުއަރީ 2021 | ހޮނިހިރު 05:26ހެޔޮވެރިކަމަކީ ނިޒާމަކަށް ކިޔާ ނަމެއް
ރައީސް އޮފީހުގެ މިނިސްޓަރ އަދި އެމްޑީޕީގެ ނައިބު ރައީސް މުހައްމަދު ޝިފާޒު
ހެޔޮވެރިކަމުގެ ނިޒާމަކީ، އަދި ޤާނޫނެއްގެ ލިޔެގެން ލިބޭ އެއްޗެއް ނޫންކަމާ، އެކަމަކީ އެއިރެއްގައި ހުންނަ ވެރިޔަކު އެކަމަށް ޖާގަ ދިނުމުން ވާކަމެއްކަން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙު ދައްކުވައިދެއްވައިފިކަމަށް ރައީސުލްޖުމްހޫރިއްޔާގެ އޮފީހުގެ މިނިސްޓަރ އަދި އެމްޑީޕީގެ ނާއިބު ރައީސް މުހައްމަދު ޝިފާޒް ވިދާޅުވެއްޖެއެވެ.
ރައީސުލްޖުމްހޫރިއްޔާގެ މިއަހަރުގެ ރިޔާސީ ބަޔާނާ ގުޅިގެން "ރާއްޖެޓީވީ"ން ގެނެސްދިން ޚާއްޞަ ކަވަރޭޖްގައި ވާހަކަ ދައްކަވަމުން ޝިފާޒު ވިދާޅުވީ، ރައީސް ޞާލިޙުގެ ވެރިކަމުގެ ދެ އަހަރު ނިމުނުއިރު، ރާއްޖޭގައި ހެޔޮވެރިކުގެ ނިޒާމުގެ ދަށުން، ދައުލަތުގެ ތިންބާރު، އެއްބާރުން އަނެއްބާރަށް ފާރަވެރިވެވޭގޮތަށް، އެއްބާރުން އަނެއްބާރަށް އަރައިނުގަނެ، މިނިވަން މުއައްސަސާތަކަށް ވެސް އެމުއައްސަސާތަކުގެ ގާނޫނީ ޒިންމާ އަދާކުރުމަށް ބާރު އަޅުއްވާތަން ފެންނަމުންދާކަމަށެވެ.
ޝިފާޒު ވިދާޅުވީ، 2008 ވަނަ އަހަރުން ފެށިގެން އަމަލު ކުރަމުންދާ ގާނޫނުއަސާސީން ހެޔޮވެރިކަމެއް ކުރުމަށް ލާޒިމްކޮށްފައިވާއިރު، ރައްޔިތުންގެ ވެސް އެކަމަށް ވަރަށް ބޮޑު އުއްމީދެއްގައި ތިބިކަމަށެވެ. ނަމަވެސް އޭގެ ފޮނިމީރުކަން ރައްޔިތުންނަށް ނުލިބިއޮވެ، ރައީސް ޞާލިޙުގެ ސަރުކާރުގެ ދެ އަހަރު ނިމުނުއިރު، ހެޔޮވެރިކަމަކީ، އަދި ގާނޫނެއްގައި ލިޔެފައި އޮތަސް ލިބޭއެއްޗެއް ނޫންކަމާއި، އެއީ ވެރިންގެ އިޙުލާސްތެރިކަމާ ގުޅިފައިވާކަމެއްކަން ރައްޔިތުންނަށް ސާފުވާ ކަމަށެވެ. އަދި ރައީސް ޞާލިޙުގެ ވެރިކަމުގައި ހެޔޮވެރިކަމުގެ ނިޒާމުގެ ދަށުން ރާއްޖޭގެ ކަންކަން ވަރަށް ރަނގަޅަށް ހިންގަވަމުން ގެންދަވާ ކަމަށް ވެސް ޝިފާޒު ވިދާޅުވިއެވެ.
ޝިފާޒް ވިދާޅުވީ، ރައީސް ޞާލިޙުގެ ދުރު ވިސްނުންފުޅާއެކު ހެޔޮވެރިކަމުގެ ނިޒާމުގެ ދަށުން ކޮވިޑް-19ގެ ޕެންޑަމިކް ތެރޭގައި ވެސް، ސަރުކާރުގެ އެއްވެސް މުވައްޒަފެއް ވަޒީފާއިން ވަކިނުކޮށް، އަދި މުސާރަތައް ވެސް ކުޑަނުކޮށް ދައުލަތް ހިންގަމުން ގެންދެވިއިރު، އަމިއްލަ ފަރުދުންގެ އާމްދަނީއަށް އައި ހީނަރުކަމަށް ވެސް ބޮޑެތި އަދަދުތަކުން ސަރުކާރުން އެހީތެރިކަން ފޯރުކޮށްދީފައިވާ ކަމަށެވެ.
ކޮވިޑް-19 ގެ ޕެންޑަމިކާ ގުޅިގެން މުޅި ދުނިޔޭގެ އިޤްތިޞާދު އިނދަޖެހިފައިވާއިރު، އެންމެބޮޑަށް އިޤްތިޞާދަށް އަސަރުކުރި ގައުމަކަށް ވެސް ރާއްޖެވާނެ ކަމަށާއި، ނަމަވެސް، ލިބެމުންދިޔަ އާމްދަނީ ބޮޑުތަނުން ދަށަށް ދިޔަނަމަވެސް، އާންމު ރައްޔިތުންނަށް ވިޔަފާރިވެރިންނަށް ސަރުކާރުން އެހީތެރިކަން ފޯރުކޮށްދީފައިވާކަމަށް ވެސް ޝިފާޒު ވިދާޅުވިއެވެ. އަދި ސަރުކާރުން ރާއްޖޭގެ ގިނަ ރަށްތަކުގައި ގިނަ އަދަދެއް ތަރައްޤީގެ ޕްރޮޖެކްޓްތައް ވެސް ހިންމުންދިޔަކަމަށް ޝިފާޒު ވިދާޅުވިއެވެ.
މީގެއިތުރުން، ޝިފާޒު ވިދާޅުވީ، ރައީސް ޞާލިޙުގެ ދުރު ވިސްނުންފުޅާއެކު، ކޮވިޑް-19ގެ ޕެންޑަމިކްގެ ތެރޭގައި ބޯޑަރު ހުޅުވާލި ފުރަތަމަ ދެތިން ގައުމުގެ ތެރޭގައި ރާއްޖެ ހިމެނޭއިރު، ރައީސް ޞާލިޙުގެ ވެރިކަމުގައި ދިވެހި ރައްޔިތުންނަށް ކުރިއަށް އޮތީ، ފާގަތި ދުވަސްތަކެއް ކަމަށެވެ.
