އިންތިޚާބު ބޭއްވުމަށް ގޮންޖެހުންތަކެއް ހުރުމުން އެކަން އީސީން މަޖިލީހާއި ހިއްސާ ކުރަނީ

ކޮވިޑް-19 އާ ގުޅިގެން ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ނެރިފައިވާ އުސޫލާ އެއްގޮތަށް އިންތިޚާބު ބޭއްވުމުގައި ހުރި ގޮންޖެހުންތައް އިލެކްޝަންސް ކޮމިޝަން (އީސީ)ން މަޖިލީހާ ހިއްސާ ކުރުމަށް ނިންމައިފިއެވެ.

އީސީގެ ރައީސް އަހުމަދު ޝަރީފް ހުކުރު ދުވަހު "ރާއްޖެއެމްވީ"އަށް ވިދާޅުވީ، އެޗްޕީއޭގެ އުސޫލާ އެއްގޮތަށް އިންތިޚާބު ބޭއްވުމަށް މިވަގުތު ބޮޑެތި ގޮންޖެހުންތަކެއް އެބަހުރި ކަމަށެވެ. އަދި އެ ގޮންޖެހުންތައް މަޖިލީހާ ހިއްސާ ކުރުމަށް އީސީން ނިންމާފައިވާކަމަށް ޝަރީފް ވިދާޅުވިއެވެ.

ޝަރީފް ވިދާޅުވީ، އެކަމާ ގުޅޭ މަޝްވަރާތައް ކޮމިޝަނުން ހޮނިހިރު ދުވަހު ކުރިއަށްގެންދާނެ ކަމަށެވެ. އަދި އެއަށްފަހު މަޖިލީހަށް ހުށައެޅުމުގެ ކަންކަން ކުރައްވާނެ ކަމަށް ޝަރީފް ވިދާޅުވިއެވެ.

އެޗްޕީއޭއިން އާންމު ކޮށްފައިވާ ގައިޑްލައިންގައި ކޮވިޑް-19ށް ޕޮޒިޓިވްވެ އެކަހެރިކޮށްފައިވާ މީހުންނާއި، ޕޮޒިޓިވްވެފައިވާ މީހުންގެ ކޮންޓެކްޓުންނާއި، ކޮވިޑް-19ގެ އަލާމާތް ހުންނަ މީހުން ވޯޓުލުމުގައި އަމަލުކުރަންވީ ގޮތުގެ އުސޫލު ބަޔާންކޮށްފައިވާއިރު، ކޮވިޑް-19ގެ ހާލަތުގައި ރައްކާތެރިކަމާއެކު ލޯކަލް ކައުންސިލްތަކުގެ އިންތިޚާބު ކުރިއަށް ގެންދިއުމުގައި ޢަމަލުކުރަންވީ ގޮތުގެ އުސޫލުތައް ވަނީ ބަޔާން ކޮށްފައެވެ.

މި އުސޫލުގެ 10 ވަނަ މާއްދާގައި ބުނެފައިވަނީ ކޮވިޑް-19ށް ޕޮޒިޓިވްވެ އެކަހެރިކޮށްފައިވާ މީހުންނާއި، ޕޮޒިޓިވްވެފައިވާ މީހުންގެ ކޮންޓެކްޓުންނާއި، ކޮވިޑް-19ގެ އަލާމާތް ހުންނަ މީހުން ވޯޓުލުމުގެ ކަންތައްތައް ހަމަޖެއްސުމުގައި އިލެކްޝަންސް ކޮމިޝަނުން ނުވަތަ ވޯޓުލުމުގެ ކަންތައްތައް ބަލަހައްޓާ ފަރާތުން، ވަކި ކަންކަމަކަށް އަމަލުކުރަންވާނެ ކަމަށެވެ.

އޭގެ އިތުރުން، ކޮވިޑް-19ށް ޕޮޒިޓިވްވެފައިވާ މީހުން ވޯޓުލުމަށް އެހެން މީހުންނާއި އެކުނުވާގޮތަށް ވަކި އުޅަނދެއްގައި ރައްކާތެރިކަމުގެ ފިޔަވަޅުތަކާއެކު ވޯޓުލާ މަރުކަޒަށް، ހެލްތް ޕްރޮޓެކްޝަން އެޖެންސީގެ ހުއްދަޔާއެކު އައުމަށް އެންގުން، ނުވަތަ ކަމާގުޅޭ އިދާރާތައް ގުޅިގެން އެކަމުގެ އިންތިޒާމް ހަމަޖެއްސިދާނެކަން އުސޫލުގައި ބަޔާން ކޮށްފައިވާއިރު، އެކަމުގައި ހުރި ދަތިތައްވެސް ގިނަ ބަޔަކު ދަނީ ފާހަގަ ކުރަމުންނެވެ.

އިންތިޚާބުގެ އަސާސަކީ މިނިވަންކަމާއެކު ކެމްޕޭން ކުރުމާއި، ދަތުރުފަތުރު ކުރުމާއި، ތާއީދު ހޯދުމަށް މަސައްކަތް ކުރުމާއި، ވޯޓުލާ މީހުންނަށްވެސް މިނިވަންކަމާއެކު ވޯޓުލެވޭނެ މަގު ތަނަވަސްވެގެން ދިއުންކަން ފާހަގަ ކުރައްވައި މަޖިލީހުގެ ބައެއް މެމްބަރުންވެސް ވަނީ މި ޙާލަތުގައި އިންތިޚާބު ބޭއްވުމަށް ހުރި ގޮންޖެހުންތަކަށް އަލިއަޅުވާލައްވާފައެވެ. އަދި ކޮވިޑުގެ މި ޙާލަތުން އަރައިގަތުމަށް ހިންގާ ވެކްސިނޭޝަން ޕްރޮގްރާމް ފުރިހަމަކޮށް، ޖޫން މަހަށް އިންތިޚާބު ފަސް ކުރުމަށްވެސް ގިނަ ބަޔަކު ގޮވާލާފައިވެއެވެ.