އިހަވަންދޫ ފިހާރައަކުން ވައްކަންކުރި ދެ މީހަކު ހައްޔަރުކޮށްފި
އިހަވަންދޫ ފިހާރައެއް ފަޅާލައި ފައިސާ ވަގަށް ނަގާފައިވާ ކަމަށް ރިޕޯޓްކޮށްފައި ވަނީ ޖެނުއަރީ 26ގައި
ހއ. އިހަވަންދޫ
ހއ. އިހަވަންދޫ ފިހާރައެއް ފަޅާލައި ވައްކަންކޮށްފައިވާ މައްސަލައަކާ ގުޅިގެން ދެމީހަކު ހައްޔަރުކޮށް އިހަވަންދޫ ޕޮލިސް ސްޓޭޝަނުން އެ މައްސަލަ ތަހުގީގު ކުރަންފަށައިފިއެވެ.
އިހަވަންދޫ ފިހާރައެއް ފަޅާލައި އެ ފިހާރައިން ގިނަ އަދަދެއްގެ ފައިސާ ވަގަށް ނަގާފައިވާ ކަމަށް މިދިޔަ ޖެނުއަރީ މަހުގެ 26 ވަނަ ދުވަހު ފުލުހުންނަށް ހުށަހަޅާފައިވާ މައްސަލައަކާ ގުޅިގެން ކޯޓުއަމުރެއްގެ ދަށުން ހައްޔަރުކޮށްފައިވަނީ 28 އަހަރުގެ މީހަކާއި 39 އަހަރުގެ މީހެކެވެ. މި ދެމީހުންނަކީ ވެސް ދިވެހި ފިރިހެނުންނެވެ.
އެ މައްސަލައާ ގުޅިގެން އެ ފައިސާ ހޯދުމަށް ފުލުހުންގެ ތަހުގީގުގެ ތެރެއިން ގިނަ މަސައްކަތްތެއް ކޮށް، ވަގަށް ނަގާފައިވާ 230,000 ރުފިޔާގެ ތެރެއިން 72،620 ރުފިޔާ މިހާތަނަށް ހޯދިފައިވާކަމަށް ފުލުހުން ބުނެއެވެ. އެ ފައިސާ ހޯދާފައިވަނީ މޫދުންނާއި އެރަށު ގެއެއްގައި ފޮރުވާފައި ހުއްޓައެވެ.
މި މައްސަލައާ ގުޅިގެން އެ ދެ މީހުންގެ ބަންދާމެދު ގޮތެއް ނިންމުމަށް އިހަވަންދޫ މެޖިސްޓްރޭޓް ކޯޓަށް ހާޒިރުކުރުމުން މިނިސްޓްރީ އޮފް ހޯމްއެފެއާޒުން ކަނޑައަޅައި ތަނެއްގައި ބަންދުގައި ބައިތިއްބައިގެން ތަހުގީގު ކުރިއަށް ގެންދިޔުމަށް 15 ދުވަހުގެ މުއްދަތެއް ވަނީ ދީފައިވެއެވެ.
