ރިޔާސީ ބަޔާން 2021: ފަނޑިޔާރުގެ އިޞްލާޙުކުރުމަށް ކުރެއްވި މަސައްކަތުގެ ނަތީޖާ ފެންނަންފަށައިފި
މީގެ ދެ އަހަރު ކުރިން ވެރިކަމާ ހަވާލުވިއިރު، ޢަދުލު އިންޞާފުގެ ނިޒާމަށް، ރައްޔިތުންގެ ހިތުގައި އެއްވެސް އިތުބާރެއް ނެތް
ރައްޔިތުންގެ މަޖިލިސް މިއަހަރަށް ހުޅުވުމާއި ރިޔާސީ ބަޔާން އިއްވުމަށް ބުރާސްފަތި ދުވަހު ބޭއްވި ޖަލްސާގައި މަޖިލީހުގެ ރައީސް މުހައްމަދު ނަޝީދުއާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ފަނޑިޔާރުގެ އިޞްލާޙުރުމަށް މިސަރުކާރުން ފެށި މަސައްކަތުގެ ނަތީޖާ ފެންނަން ފަށައިފިކަމަށް ރައީސުލްޖުމްހޫރިއްޔާ އިބްރާހީމް މުހާއްމަދު ޞާލިޙް ވިދާޅުވެއްޖެއެވެ.
ރައްޔިތުންގެ މަޖިލިސް، މިއަހަރަށް ހުޅުވުމާއި، ރިޔާސީ ބަޔާން އިއްވުމަށް ބުރާސްފަތި ދުވަހު ބޭއްވި ޖަލްސާގައި ރިޔާސީ ބަޔާން އިއްވަވާދެއްވަމުން ރައީސް ޞާލިޙު ވިދާޅުވީ، މީގެ ދެ އަހަރު ކުރިން ވެރިކަމާ ޙަވާލުވިއިރު، ޢަދުލު އިންޞާފުގެ ނިޒާމަށް، ރައްޔިތުންގެ ހިތުގައި އެއްވެސް އިތުބާރެއް ނެތް ކަމަށާއި، އެގޮތުން ފަނޑިޔާރުގެ އިޞްލާޙުކުރުމަށް މިދިޔަ ދެ އަހަރު ކުރި މަސައްކަތުގެ ނަތީޖާ ފެންނަން ފަށައިފިކަމަށެވެ.
ރައީސް ޞާލިހު ވިދާޅުވީ، ދައުލަތުގެ އެހެން ބާރުތަކުގެ ނުފޫޒުން މިންޖުވެ، މައްސަލަތައް ނިންމުމުގެ މިނިވަންކަން، އެންމެ މަތީ ކޯޓުން ފެށިގެން އެންމެ ދަށު ކޯޓާ ހަމައަށް، މިހާރު އެބައޮތް ކަމަށެވެ. ޝަރުޢީ މަރުޙަލާ އަވަސްކޮށް، އިންޞާފު ލިބޭނެ އިންތިޒާމް ކަށަވަރުކުރުމަށްޓަކައި، ސަރކިޓް ކޯޓް ތަޢާރަފް ކުރުމަށް ބޭނުންވާ ޤާނޫނުގެ ބިލު އެކުލަވާލައި، މިއަހަރުގެ ތެރޭގައި ރައްޔިތުންގެ މަޖިލީހަށް ހުށަހަޅަން ޤަޞްދުކުރައްވާކަމަށް ވެސް ރައީސް ވިދާޅުވިއެވެ.
ރައީސް ޞާލިޙު ވިދާޅުވީ، ރައްޔިތުންނަށް ޚިދުމަތްކުރަން މިސަރުކާރު ނުކުމެ ތިބި އިރު، މިކަމުގައި އެމަނިކުފާނަށާއި އެމަނިކުފާނުގެ ސަރުކާރަށް އެންމެ ބޮޑު އެހީތެރިކަމެއް ލިބެނީ، މިހާރު ހިނގަމުންދާ 19 ވަނަ ރައްޔިތުންގެ މަޖިލީހުންކަން ޝުކުރުވެރިކަމާއެކު ފާހަގަކުރައްވާކަމަށެވެ.
ރައީސް ޞާލިޙު ވިދާޅުވީ، މިދިޔަ އަހަރު މަޖިލީހުން ފާސްކޮށް ތަޞްދީޤުކުރުމަށްޓަކައި އެމަނިކުފާނާ ހަމައަށް ފޮނުވި 35 ބިލު ވާނީ ތަޞްދީޤު ކުރައްވާފައި ކަމަށެވެ. ޑިމޮކްރެސީގެ ހަމަތަކާ އެއްގޮތަށް، ހެޔޮ ވެރިކަމުގެ އުޞޫލުން، ރާއްޖެ ކުރިއަރުވައި ތަރައްޤީކުރުމަށް ބޭނުންވާ އިތުރު ޤާނޫނުތަކުގެ ބިލުތައް، އިރާދަކުރެއްވިއްޔާ މިއަހަރުގެ ތެރޭގައި ވެސް މަޖިލީހަށް ފޮނުއްވާނެކަމަށް ރައީސް ވިދާޅުވިއެވެ. އަދި އެ ބިލުތައް، ރައްޔިތުންގެ މަންދޫބުންގެ މަޝްވަރާއާއި ފުން ބަހުސްތަކުން މުއްސަނދިކުރައްވައި، މި މަޖިލީހުން ފާސްކޮށްދެއްވާނެކަމާ މެދު އެމަނިކުފާނުގެ ހިތުގައި އެއްވެސް ޝައްކެއްނެތް ކަމަށްވެސް ރައީސް ޞާލިޙު ވިދާޅުވިއެވެ.
ރައީސް ޞާލިޙު ވިދާޅުވިގޮތަށް، މިސަރުކާރުން ވަނީ ވޭތުވެދިޔަ ދެ އަހަރު ޖުޑީޝަރީ އިޞްލާޙުކުރުމުގެ މަސައްކަތްތަކެއް ކުރައްވާފައެވެ. އެގޮތުން، މިހާރު ހިނގަމުންދާ 19 ވަނަ ރައްޔިތުންގެ މަޖިލިސް އެކުލަވައިލުމާއެކު، ޖުޑީޝަލް ސަރވިސް ކޮމިޝަން (ޖޭއެސްސީ)ގެ ޤާނޫނަށް ބޮޑެތި އިސްލާޙުތަކެއް ގެނެސް، ޖޭ.އެސް.ސީ އަލުން އެކުލަވާލައި، ސަރުކާރާއި ރައްޔިތުންގެ މަޖިލީހާއި ޖޭ.އެސް.ސީ.އާއެކު ކުރެވުނު މަސައްކަތްތަކުން، ޖުޑީޝަރީއަށް ވަނީ ބޮޑެތި އިޞްލާޙީ ހެޔޮ ބަދަލުތަކެއް ގެނެވިފައެވެ.
