ފުރުޞަތުގެ ބޭނުންހިފައި އެންމެން ވެސް ވެކްސިންޖަހަން ރައީސް އިލްތިމާސްކުރައްވައިފި
ރާއްޖޭގައި އުޅޭ އެންމެނަށް ވެކްސިން ޖަހައިދޭނީ ހިލޭ
ރައީސް ޞާލިޙް ރިޔާސީ ބަޔާން ދެއްވަން މަޖިލީހަށް ވަދެވަޑައިގަންނަވަނީ
ރާއްޖޭގެ އިގްތިޞާދު ހަމައަކަށް އަޅުވައި އެންމެނަށް ވެސް އާންމު ދިރިއުޅުމަށް ރުޖޫޢަ ވެވޭނީ ވީ އެންމެ ގިނަ މީހުން ވެކްސިން ޖަހައިގެން ކަމަށް ވިދާޅުވެ މި ފުރުސަތުގައި އެންމެން ވެސް ވެކްސިން ޖަހަން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙު އިލްތިމާސްކުރައްވައިފިއެވެ.
ބުރާސްފަތި ދުވަހު ރައީސް ދެއްވި ރިޔާސީ ބަޔާނުގައި އެމަނިކުފާނު ވަނީ ފާއިތުވެގެންދިޔަ އަހަރު ރާއްޖެ ކޮވިޑް-19އާ ދެކޮޅަށް ކުރި މަސައްކަތްތަކާ މިހާރު އާދެވިފަ އޮތް ހިސާބަށް އަލި އަޅުއްވާލައްވާފައެވެ. އެގޮތުން މިހާރު ރާއްޖެއަށް ކޮވިޑް-19 ވެކްސިން ގެނެވިފައިވާކަން ފާހަގަކުރައްވައި ރައީސް ވިދާޅުވީ ރާއްޖޭގައި ތިބި އެންމެނަށް ވާވަރަށް ވެކްސިން ލިބޭނެކަން މިހާރު ޔަގީންވެފައިވާ ކަމަށެވެ. އަދި ހުރިހާ ދިވެހިންނާއި ރާއްޖޭގައި ދިރިއުޅޭ އެންމެނަށް ވެސް ރާއްޖޭގައި ވެކްސިން ޖަހައިދޭނީ މުޅިން ހިލޭ ކަމަށް ވެސް ވިދާޅުވިއެވެ.
ރައީސް ވިދާޅުވީ ކޮވިޑް-19 ގެ ދަތިތަކަށް ފަހު ސްކޫލްތަކުގެ ކިޔެވުން ފަށައި، ދަތުރުފަތުރު ރަނގަޅަށް ފެށޭނީ ވީހާ ވެސް ގިނަބަޔަކު ވެކްސިން ޖަހައި ބަލިން ރައްކާތެރިކަން ހޯދައިގެން ކަމަށެވެ.
މިދިޔަ އަހަރު ރާއްޖެއަށް ކުރިމަތިވި ކޮވިޑް-19ގެ ހާލަތުން އަރައިގަތުމަށް ކޮށްފައިވާ މަސައްކަތްތަކަށް އަލިއަޅުއްވާލައްވައި ރައީސް ވިދާޅުވީ މިދިޔަ އަހަރުގެ ކުރީކޮޅުން ފެށިގެން ސަރުކާރުގެ ހުރިހާ ހަކަތައެއް ބޭނުންކުރީ އެ ބަލިން ރާއްޖޭގެ ރައްޔިތުން ސަލާމަތްކުރުމަށް ކަމަށެވެ. ބައެއް ފިޔަވަޅުތައް އެޅި އިރު އޭގެ ނަތީޖާ އެނގިތިބެ ވެސް ރައްޔިތުންގެ ރައްކާތެރިކަމަށްޓަކައި އެ ފިޔަވަޅުތައް އަޅަން މަޖުބޫރުވިކަމަށާއި، ބޯޑަރު ބަންދުކޮށް މާލެ ލޮކްޑައުންކުރުމަކީ ފަސޭހަ ނިންމެވުމެއް ނޫން ކަމަށް ރައީސް ވިދާޅުވިއެވެ.
އެމަނިކުފާނު ވިދާޅުވީ އެ ފިޔަވަޅުތަކާއެކު، މިބައްޔަށް ފަރުވާކުރެވޭ ވަރަށް ރާއްޖޭގެ ސިއްޙީ ނިޒާމު ގެ ޤާބިލުކަން އިތުރުކުރުމުގެ މަސައްކަތް ފެށި ކަމަށެވެ. އެގޮތުން ރާއްޖޭގެ ހުރިހާ ހިސާބެއްގައި، އެ ބައްޔަށް ފަރުވާކުރެވޭނެ އިންތިޒާމު ހަމަޖައްސައި ، 362 ސިއްޙީ ޚިދުމަތްތެރިން ތަމުރީންކުރި ކަމަށާއި ދުވާލަކު 5600 އަށްވުރެ ގިނަ ކޯވިޑް ޓެސްޓް ހެދުމުގެ ޤާބިލުކަން ރާއްޖޭގައި މިހާރު ހުންނާނެ ކަމަށް ވެސް ވިދާޅުވި އެވެ.
މި މަސައްކަތްތަކުގެ ނަތީޖާއެއްގެ ގޮތުން ވަރަށް ކުރު މުއްދަތެއްގެ ތެރޭގައި ލޮކްޑައުންއަށް ލުއިދީ ބޯޑަރު ހުޅުވައި ފަތުރުވެރިން އަންނަން ފަށާފައިވާ ކަމަށް ވެސް ރައީސް ވިދާޅުވިއެވެ. އަދި މިހާ ހިސާބަށް އާދެވުނީ ރައްޔިތުން ދިން އެއްބާރުލުމުގެ ސަބަބުން ކަމަށް ވިދާޅުވެ އެކަމަށް ޝުކުރުއަދާކުރެއްވިއެވެ.
މީގެ އިތުރަށް ކޮވިޑް-19 ކޮންޓްރޯލްކުރުމަށް ސަރުކާރުން އެކުލަވައިލި، ނޭޝަނަލް އިމަރޖެންސީ އޮޕަރޭޝަން ސެންޓަރުން ކުރި ބުރަ މަސައްކަތްތަކާއި، ޓެކް ނިކަލް އެޑްވައިޒަރީ ޓީމުން ނިންމި ނިންމުންތަކާއި، މި ބައްޔާ ދެކޮޅަށް އެންމެ ކުރީ ސަފުގައި ތިބި ހިދުމަތްތެރިންގެ މަސައްކަތް ފާހަގަކުރައްވައި އެބޭފުޅުންނަށް ވެސް ރައީސް ވަނީ ޝުކުރުއަދާކުރައްވާފައެވެ.
