ފުރަތަމަ ލެގުގައި އިންޓަ އަތުން ޔުވެންޓަސް މޮޅުވެއްޖެ
އިންޓަ އަތުން ޔުވެންޓަސް މޮޅުވީ 2-1 ގެ ނަތީޖާއަކުން
އިންޓަ އާއި ޔުވެންޓަސް ބައްދަލުކުރި މެޗުގެ ތެރެއިން: މި މެޗުން ޔުވެންޓަސް މޮޅުވީ 2-1 ން
އިޓާލިއަން ކަޕުގެ ސެމީފައިނަލް ފުރަތަމަ ލެގުގައި އަންގާރަ ދުވަހުގެރޭ އިންޓަ މިލާން އަތުން ޔުވެންޓަސް މޮޅުވެއްޖެއެވެ.
އިންޓަގެ ދަނޑުގައި ކުޅުނު މި މެޗުން ޔުވެންޓަސް މޮޅުވީ ފަހަތުން އަރައި 2-1 ގެ ނަތީޖާއަކުންނެވެ.
މި މެޗުގައި ސަސްޕެންޝަނުގެ ސަބަބުން އިންޓަގެ ތަޖުރިބާކާރު ފޯވާޑް ރޮމެލޫ ލުކާކޫ ކުޅެފައެއް ނުވެއެވެ. އެކަމަކު މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ އިންޓައިންނެވެ. މެޗު ފަށައިގެން ނުވަވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ލަޓާރޯ މާޓިނޭޒެވެ.
އެކަމަކު މެޗުގެ 26 ވަނަ މިނެޓުގައި އިތުބާރު ފޯވާޑް ކްރިސްޓިއާނޯ ރޮނާލްޑޯ ކާމިޔާބުކުރި ޕެނަލްޓީން ޔުވެންޓަސްއިން ވަނީ ނަތީޖާ އެއްވަރުކޮށްފައެވެ. މިއީ ޔުވެންޓަސްގެ ހުއާން ކުއަޑްރާޑޯއަށް އޭރިއާ ތެރެއިން އިންޓަގެ އޭޝްލީ ޔަންގް ކުރި ފައުލަކަށް ރެފުރީ ދިން ޕެނަލްޓީއެކެވެ. އަދި އޭގެ ނުވަ މިނެޓު ފަހުން އިންޓަގެ ޑިފެންޑަރުން ހެދި ގޯހެއްގެ ފައިދާނަގައި ރޮނާލްޑޯ ވަނީ ޔުވެންޓަސްއަށް ލީޑު ނަގައިދީފައެވެ.
ސެމީފައިނަލް ފުރަތަމަ ލެގުން ޔުވެންޓަސް މޮޅުވިއިރު، އެ ޓީމުގެ ދަނޑުގައި ކުޅޭ ދެވަނަ ލެގުގެ މެޗު އޮންނާނީ އަންނަ ހަފުތާގެ އަންގާރަ ދުވަހުގެރެއެވެ. އެ މެޗު އެއްވަރުކޮށްލައިގެންވެސް ޔުވެންޓަސްއަށް ފައިނަލުގެ ޖާގައެއް ހޯދުމުގެ ފުރުސަތު އެބައޮތެވެ.
