ސައުތު އެފްރިކާއިން ފެނިފައިވާ ވޭރިއެންޓަށް ފައިޒަރ ވެކްސިންގެ އަސަރުކުރާވަރު ދަށް

ސައުތު އެފްރިކާއިން ފެނިފައިވާ ކޮވިޑް-19ގެ އައު ވޭރިއަންޓަށް ފައިޒަރ އަދި ބައޯއެންޓެކުން އުފައްދާފައިވާ ވެކްސިންގެ އަސަރު ކުރާވަރު ދަށް ކަމަށް އިނގިރޭސިވިލާތުން ކުރިއަށް ގެންދިޔަ ދިރާސާއަކުން ދައްކައިފިއެވެ.

މި ދިރާސާގެ ޕްރިލިމިނަރީ ޑޭޓާ ދައްކާގޮތުން އުމުރުން 80 އަހަރުން މަތީގެ މީހުންނަށް އައު ވޭރިއަންޓުން ރަނގަޅަށް ރައްކާތެރިކަން ލިބޭނީ ވެކްސިންގެ ދެ ޑޯޒް ޖެހުމުންނެވެ.

ދިރާސާ ކުރިއަށް ގެންދިއުމުގައި ހަރަކާތްތެރިވި ކެމްބްރިޖް ޔުނިވާސިޓީގެ އިންސްޓިޓިއުޓް ތެރަޕަޓިކް އިމިއުނޮލޮޖީ އެންޑް އިންފެކްޝަސް ޑިޒީސް ގެ ޕްރޮފެސަރއެއް ކަމަށްވާ ރަވި ގުޕްތާ ވަނީ ސައުތު އެފްރިކާގައި އަލަށް ފެނިގެން އުޅޭ ކޮވިޑް-19ގެ އައު ވޭރިއަންޓް އިނގިރޭސިވިލާތުން ފެނުމަކީ ވަރަށް ކަންބޮޑުވާ ކަމެއް ކަމަށް ބުނެފައެވެ. މި ވޭރިއަންޓް އަދި ފެނިފައި ވަނީ މަދު ބައެއްގެ ފަރާތުންނެވެ. އޭނާ ވަނީ މި ވޭރިއަންޓާ ދެކޮޅަށް ފައިޒަރގެ ވެކްސިން އަސަރުކުރާ ވަރު ދަށްވާނެ ކަމަށް ބުނެފައެވެ.

އަންގާރަ ދުވަހު އާންމުކޮށްފައިވާ މި ދިރާސާގައި ފައިޒަރގެ ވެކްސިންގެ ފުރަތަމަ ޑޯޒް ޖަހާފައިވާ 26 މީހުންގެ ލޭގެ ސާމްޕަލް ވަނީ ނަގާފައެވެ. ތިން ހަފުތާ ކުރިން މި ސާމްޕަލްތައް ނަގައި، އިނގިރޭސިވިލާތުގެ ކޮވިޑް-19ގެ އައު ވޭރިއަންޓާއި ސައުތު އެފްރިކާގެ އައު ވޭރިއަންޓަށް ފައިޒަރ ވެކްސިނުން އަސަރުކުރާ ވަރު ވަނީ ބަލާފައެވެ.

އެގޮތުން ޓެސްޓު ކުރެވުނު ސާމްޕަލްތަކުގެ ތެރެއިން 7 މީހުންގެ ސާމްޕަލް ފިޔަވައި އެހެން ސާމްޕަލްތަކުން ވައިރަހާ ދެކޮޅަށް ހަނގުރާމަކުރެވޭނެ ވަރަށް އެންޓިބޮޑީސް ހުރި ކަމަށް ވަނީ ދައްކާފައެވެ. އެހެންނަމަވެސް އިނގިރޭސިިވިލާތުން ފެނިފައިވާ ވޭރިއަންޓްގެ ސާމްޕަލް، ލެއާ އެއްކުރުމުން ވެކްސިނުން ވައިރަަހަށް އަސަރުކުރާވަރު ދަށްވެ ވައިރަހުން ރައްކާތެރިވުމަށް ދެގުނައަށް އެންޓިބޮޑީސް ނިއުޓްރަލައިޒްކުރަން ޖެހޭކަމަށް ދިރާސާއިން ދައްކައެވެ. އަދި ސައުތު އެފްރިކާއިން ފެނިފައިވާ ވޭރިއަންޓްގެ ސާމްޕަލް، ލެއާ އެއްކުރުމުން ވެކްސިނުން ވައިރަަހަށް އަސަރުކުރާވަރު ދަށްވެ ވައިރަހުން ރައްކާތެރިވުމަށް ދިހަގުނައަށް އެންޓިބޮޑީސް ނިއުޓްރަލައިޒްކުރަން ޖެހެއެވެ.

ދިރާސާކުރުމުގައި އިސްކޮށް ހަރަކާތްތެރިވި ޑެމީ ކޮލިއަރ ވަނީ 80 އަހަރުން މަތީގެ މީހުންނަށް ވެކްސިންގެ ފުރަތަމަ ޑޯޒް ދިނުމުން ތިން ހަފްތާފަހުން ވައިރަހާ ދެކޮޅަށް އެންޓިބޮޑީޒް ނުއުފެއްދޭ ކަމަށް ބުނެފައެވެ.

މީގެ ދެ ހަފްތާއެއްހާ ދުވަސްކުރިން ނޮވަވެކްސް އަދި ޖޯންސަން އެންޑް ޖޯންސަންގެ ވެކްސިންތަކުގެ ޓްރަޔަލް ޑޭޓާތައް އާންމުކޮށްފައިވާ އިރު، ސައުތު އެފްރިކާގެ ވޭރިއަންޓަށް މި ވެކްސިންތަކުން އަސަރުކުރާވަރު ދަށް ކަމަށް ވަނީ ދައްކާފައެވެ.

އިނގިރޭސިވިލާތުގެ އިތުރުން ދުނިޔޭގެ ގިނަ ގައުމުތަކަކުން ދަނީ ކޮވިޑް-19 އިން ރައްކާތެރިވުމަށް ފައިޒަރ އާއި ބައޯއެންޓެކްގެ ވެކްސިން ޖެހުމުގެ މަސައްކަތްކުރަމުންނެވެ.